1No masīrib a mabakes, maganay kapatnek nas pamilya na,
ki iyaw maychabobos arang a mabakes, rakraken naw pamilya na do kabon sīrib na.
2No maybibyay a malinteg, chāmo na si ĀPO,
ki no maybibyay a masīkap, chahanyinyi na si Āpo.
3No chirin abos arang, manoroh so kapakabāot no bokot na,
ki no kapaychirin dan masīrib, iyaw mangaywan dyira.
4An abo bāka, abaw irek do hosagan,
ki no kayit no bāka, pakayapwan āro a āpit.
5No mapodno a sistīgo, maybayataw aba,
ki no palso a sistīgo, maynana bayataw ibahey na.
6No mangoy-oyaw, maychichwas so kinasīrib, ki makasārak aba polos,
ki no kapakatoneng, maydamnay a machichwasan no myan so kapakaāwat.
7Pachibawan mo abos arang a tawo,
ta madongso mwabaw chirin a myan so kapakatoneng.
8Iyaw kinasīrib no mangtokto a nainsirīban, mangipaboya an maypāngo kabibyay na,
ki no kabon sīrib dan abos arang, mangallīlaw.
9Siraw abos arang, oyawen daw kapangidāton a para do gatos,
ki dyirad malinteg a tawo, ganāsen daw pakahwahokan no Dyos.
10Kāda tawo, chapatak naw bōkod na a kaliday no pōso,
as abaw aran sino a machipangdidiw dya so soyot na.
11Iyaw bahay no marahet a tawo, marārayaw anchi,
ki maytēnek panchiw tolda no malinteg a tawo.
12Myan ayaman a akmay kosto do asa tawo,
ki no pandan na, do kadiman a lomongo.
13Aran do kamyeng, myan naitayo a karahmet,
as no pandan no kasoyot, maparin a mamayo.
14No tomadyichokod do kinalinteg, apīten nanchiw maiparbeng dya,
as no maganay a tawo, magon-gonaan anchi sigon do pinarin na.
15No machononot, anohdan naw aran āngo a naibahey dya,
ki no mangtokto a nainsirīban, sintiren na saw dakwang na.
16No masīrib a tawo, siaannad kan pachibawan naw karahet,
ki no abos arang a tawo, taykalo kan tarantādo.
17No malisto a makasoli, parinen naw abos arang a kaparin,
as no mangipangta so marahet, maipsok anchi.
18No machononot, magtāwid anchi so kabon sīrib,
ki siraw mangtokto a nainsirīban, akma say nakoronaan so kapakatoneng.
19Siraw marahet, magrōkob sanchi do salapen dan maganay,
kan magrōkob sanchi do rowangan daw no malinteg.
20No mapobri, chaskeh no aran karoba na,
ki siraw mababaknang a tawo, āro sīt da.
21No mahanyinyi do karoba na, maygatos,
ki mabindisyonan tawowaw a māsi dyirad mapobri.
22Siraw magpangta so marahet, somiwal sabawri?
Ki siraw magplāno so maganay, machichwasan danchiw kadaw kan kapodno.
23Do tabo malidyat a tarabāko, myan maganay a asi na,
ki no tod a maychiychirin, mapawnot lang do kapobri.
24Iyaw kinabaknang dan masīrib, akmay korona da.
Ki no kabon sīrib dan abos arang, ki iparang naw kabon sīrib.
25No mangipaneknek so oyod, mangisalākan so byay,
ki no maybayataw a sistīgo, manglipot so tawotawo.
26No tawo a mamo di ĀPO, myan kahnyi no kapagtalek na,
as kan siraw anak na, ki myan anchiw kamāngan da.
27Iyaw no kaanyib di ĀPO, akmay akbod a manoroh so byay
a mapadichan so tawo do asdok saw no kadiman.
28Iyaw kāro no itorayan no āri, nawriw dayag na,
ki an abo itorayan no prinsipi, marārayaw.
29No dya malisto a makasoli, myan dyaw rakoh a kapakaāwat,
ki no taykalo a komohat, pakatetēnek naw kabon sīrib na.
30No kaydamnayan no kapangtokto, manoroh so salon-at no inawan,
ki no āpal, akmay ganyit a mangrōnot so tohatohang.
31No mangidadanes so mapobri, iroromen naw Namarin dya,
ki no māsisyen siras makachitaw, dayāwen naw Dyos.
32No dyīdo a kaparin no marahet a tawo, mangasday sya,
ki no malinteg a tawo, myan kamāngan na aran do kadiman na.
33Iyaw kinasīrib, omyan do kapangtokto no myan so kapakaāwat,
as kan aran dyirad abos arang, ki maipakatoneng dyiraw kinasīrib.
34Iyaw kinalinteg, mapatohos so asa nasyon,
ki no kapaygatos, mapabodis so dāyaw no aran sino.
35No pakahwahokan āri, myan do masīrib a pachirawatan,
ki no kasoli na myan do tobotoboyen a mangasnesnek.