1Nawayakan aba ni Āpo Dyos sa Noyi kan tabo animal saw a kinayrayay dad birayaw. Dawa, pinaysasalawsaw ni Āpo Dyos do tanaya a nawri danaw siniknanan nakain-īnot no ranomaw a minelda. 2Nagsardeng danaw ranomaw a tominbod do irahem no tana, as kan nahangan dana, ta naseraan danaw pakayapwan naw no ranom. 3In-īnot a mineldaw ranomaw a mandan tayokaw no 150 a karaw. 4Ki do nakapakarapit no asa poho kan papito a karaw do chapapito naw a bohan,* nakabat birayaw do asa tokon do tokotokon saw do tana no Ararat. 5Naypaypadēkey ranomaw, as do manōmaw a araw no chaasa poho naranaw a bohan, nakachibaw tōtok saw no tokotokonaw.

6Napahabas pa so apat a poho a karaw, as nakapanyiwang ni Noyi do pinarin naw a bintan no biray, 7as nakapangari na so asa kak, ki naybidi aba, ta nāw na somnayasayap a naydidibon a mangnanaya so kayachi no ranomaw. 8Sinpangan na, napasayap pas Noyi so boyit tan chiban na an nayachan danaw ranomaw, 9ki abaw naboyan boyitaw a adnan na, ta natonep pa no ranom iyaw tanaw. Dawa, naybidiw boyitaw do birayaw, as kan pinabidi ni Noyi do irahem. 10Do dāwri, napahabas si Noyi so papito pa karaw, as nakari na minirwa so boyitaw. 11Ki naybidi dya do kapaysarisari, kan nangisem boyitaw so ablak a bohong no olibo. Nyaw nakatonngan Noyi a minelda danaw ranomaw. 12As dawa, ninanaya na paw papito pa karaw, as nakapasayap narana minirwa so boyitaw, ki naybidi paba dya.

13Do chanem naranaw a gasot kan asa a katawen no kabyay ni Noyi, do manōmaw a araw no manōma bohan, nayachan danaw ranom. Rinakrak ni Noyi iyaw atepaw no birayaw a nangtalamadan nas tana, ki naboya na makey dana mabkohan. 14Do chadadwa naranaw a poho kan papito a araw do chadadwa naw a bohan, nabkohan dana golpiw tana.

15-16Binata ni Āpo Dyos di Noyi a kāna, “Mohbot kamo na kan baket mo, as kan siraw pōtot mwaya kan siraw babbaket da saya. 17Pahtoten nyo sa tabo manomanok, tabo animal saya, kan tabo komayakayab saw do tana, tan maymanganak sa, kan maypāro sa do hapotayan tana.”† 18Dawa, gominchin si Noyi kan si baket na, as kan siraw pōtot naw kan siraw babbaket da saw. 19Tabo saw animal, komayakayab do tana, kan manomanok, ki minohbot sa do birayaw sigon do kapāpayngay daw a kīta.

20Napatnek si Noyi so pangidātonan na di ĀPO, as nakahap na so tayisa dyirad maibidangaw a madalos‡ a animal kan manomanok, as nakasosoh na sira§ do pangidātonanaw tan idāton na di ĀPO. 21Ki do nakangotaw sya ni ĀPO, chinadaw na. Dawa, binata na do aktokto na a kāna, “Abayen ko pabanchi a polos tanaya maynamot do pinariparin no tawo, ta chapatak ko a marahet aktokto da a yapo do kadēkey da. Dimanen ko pabanchi a polos a tabo sibibyay a parswa a akmas pinarin kwaya. 22Mandanchan machipandaw tanaya, nāw narananchi a myan chimpo no kapaymoha kan chimpo no kapagāpit. Masaw a myan chimpon kahanebneb kan chimpon kakohat, chimpon rayon kan chimpon ammyan, māraw kan mahep.”