No Kapachitōlag no Dyos di Noyi
1Binindisyonan ni Āpo Dyos sa Noyi kan siraw pōtot naw. Binata na dyira a kāna, “Maypāro kamo tan omyan sanchiw kapotōtan nyo saw do tabo a yanan do tanaya. 2Tabo a animal, manomanok, komayakayab do tana, kan among, ki chamo danchinyo a tawo, ta inyonchiw mangitoray so tabo a nabyay do tanaya. 3Sichangori, maparin nyo sa ichan a tabo nya, ta itoroh ko dyinyo a chabyay nyo a akmas nakaitoroh kwaw dyinyo so magla saya mohamoha do nakarahan. 4Maganay sa tabo a ichan malaksid do karni a myan pas raya. Baywan ko, ta no raya, ki nawri danaw yanan byay. 5Aran sino a mangdiman so tawo, ki madōsa anchi. As an mangdiman animal so tawo, ki machita pa madiman. 6On, no aran sino a mangdiman so kapayngay na a tawo, ki dimanen anchi no kapayngay na a tawo. Ta an maynamot do tawo, ki pinarin ko a akma dyaken a Dyos.
7“As inyo, maypāro kamo tan omyan sanchiw kapotōtan nyo saw do tabo a yanan do tanaya.”
8Binata pa no Dyos di Noyi kan siraw pōtot naw a kāna, 9“Sichangori, machitōlag ako dyinyo kan siraw kapotōtan nyo saw 10kan tabo a sibibyay a parswa, siraw manomanokaw kan animalaw a siraw tabo a rārayay nyo a minohtot do birayaw. 11Nyayaw tōlag ko dyinyo: Ikari ko a pirwahen ko pabanchi a dimanen so layos tabo nabyay, as polos a apabanchiw layos a mangrārayaw so intīro a tana. 12Nyaw pakaboyan so abos pandan a nakapachitōlag ko dyinyo kan siraw sibibyayaya a parswa: 13pangayen ko karirang ko do kademdeman, ta nyaw pakaboyan anchi so nakapachitōlag ko dyinyo a myan do tanaya. 14Kāda paykonemen ko do kademdeman, as mohtot karirangaya, 15naknakmen konchi iyaw nakapachitōlag kwaya dyinyo kan siraw animal saya a iyaw kabo dananchi a polos no layos a mangdiman so tabo nabyay. 16Kāda mohtot karirangaya do kademdeman, chiban konchi, as manakem konchiw abwayas pandan a nakapachitōlag ko do tabo a sibibyay a parswa do tanaya.”
17Binata pa no Dyos di Noyi a kāna, “Nyaw pakaboyan so nakapachitōlag ko do tabo a sibibyay a parswa do tanaya.”
Si Noyi kan Siraw Pōtot Naw
18Siraw pōtotaw ni Noyi a minohbot do birayaw, ki sa Sem, Ham, kan Japet. Si Ham, ki āmang ni Kanaan. 19Siraw nya tatdwa pōtot ni Noyi, ki siraw kapoonan dan tabo a tawo do tanaya.
20Do dāwri, si Noyi, ki asa maymohamoha, as iyaw nanōma a naymoha so āro a ōbas. 21Myan naypisa a mininom so palek no ōbas, ki nabok. Dawa, naybahabahas, as nakapakaycheh na do tolda naw a silalābos. 22Do dāwri, naboya ni Ham a āmang ni Kanaan si āmang na a silalābos, ki minohtot a yangay na inbahey dyirad dadwaw a kakakteh na. 23Ki do nakadngey daw sya da Sem kan Japet, sigīda nanghap sas ayob, as nakapakekeh da sya, kan tomnadyichokod sa a somindep. Do dāwri, inayoban da, kan minididit saba tan dyi da maboya si āmang da a silalābos. 24Sinpangan na, do nakapakaosawaw ni Noyi, natonngan naw pinarinaw dya ni Ham. 25Dawa, binata na a kāna,
“Mabay pakononchiw kapotōtan Kanaan,
kan mayparin sa pakononchi a adīpen dan kapotōtan kakakteh naw.
26Maidāyaw si ĀPO a Dyos ni Sem!
As iyaw kapotōtan ni Kanaan,
ki adīpen danchi no kapotōtan Sem.
27Payparahawahen pakono no Dyos tana dan kapotōtan saw ni Japet,
as omyan sanchi a machisīt dyirad kapotōtan ni Sem.
Siraw kapotōtan ni Kanaan,
ki mayparin pa adīpen no kapotōtan Japet.”
28Do nakatayokaw no layos, nabyay pa si Noyi so 350 a katawen. 29Nadiman do nakapagtawen nas 950.