1Napahabas nawri, sinōot no Dyos si Abraham. Tinawagan na a kāna, “Abraham!”

Ki tominbay si Abraham a kāna, “Ari ako dya, mo Āpo.”

2Binata no Dyos a kāna, “Apen mo iyaw moybohaya pōtot mwa si Isaak a chadaw mo, as kangay mo do tana a Moryas. Idāton* mo dyaken si Isaak do asaya a tokon a ipaboya konchi dyimo.”

3Nanganohed si Abraham. Dawa, minhep a naybangon do kamabekasanaw. Nangasdasda so kayo a pangorno nas dāton naw, as inkarga na do asno naw a pinasangaan na. Inhap nas Isaak kan siraw dadwaw a adīpen na, as nakaisiknan da so kominwan do inbaheyaw no Dyos dya. 4Do chatatdo naw a araw, binangon ni Abraham oho naw, ki naboya naw kabawa no nawri a yanan. 5Binata na dyirad adīpen na saw a kāna, “Myan kamo na dya kontodo asnwaya, ta may kami kan pōtot kwaya dwadaw a magdaydāyaw do Dyos, as maybidi kaminchi dyinyo.”†

6Do dāwri, inhap ni Abraham sindasda naw a kayo a pangorno nas dāton naw, as inpaisabhay nad Isaak a pōtot na. Somarono, inhap naw bahayang naw, as nanghap so inmaya a pamyay na, as nakayam da. 7Do kayan daw a mayam, naychirin si Isaak di āmang na a kāna, “Mo āmang.”

“Āngo yahes mom barok?” binata ni Abraham.

“Āngom āmang, ta myan inmaya kan kayo, ki abayaw idāton ta a orbon a karniro?” inyahes ni Isaak.

8Initbay ni Abraham a kāna, “Iyaw Dyos makatoneng anchi a manoroh dyaten so orbon a karniro a idāton ta.” Katayoka na nangibahey syay, tinongtong daw nayam.

9Do nakapakarapit daw do yananaw no inbaheyaw no Dyos dya, namarin si Abraham so pangidātonan, as nakapaychichipeh nas sindasda naw a kayo do hapotaw no pangidātonan na. Sinpangan na, binahod‡ nas Isaak, as nakapakabat na sya do kayowaw. 10Do dāwri, inhap naw bahayangaw, tan dimanen naranaw pōtot naw. 11Ki nanyeng a naychirin iyaw anghil ni ĀPO§ a yapo do hanyit a kāna, “Abraham, Abraham!”

Ki tinbay ni Abraham a kāna, “Ari ako dya, mo Āpo.”

12Inchirin no anghilaw a kāna, “Dimanen mwabaw pōtot mwaya. Paynyinan mwaba. Masigorādo a chapatak ko na a oyod a manganohed ka kan magdāyaw ka do Dyos maynamot ta aran iyaw moybohaya a pōtot mo, ki chinaskeh mwaba itoroh dyaken.”*

13Sinpangan na, binangon ni Abraham oho naw, ki naboya na myan malloko a karniro a nachisadyit olong na saw do kayowaw a mabodis. Yangay na inhap, as pinarti na a indāton do Dyos a tādi no pōtot naw. 14Pinangaranan Abraham nawri a yanan so “Si ĀPO Manoroh.”† Aran sichangori, ki batabatahen da pan tawotawo a, “Do tokon ni ĀPO, ki maitoroh anchi.”

15Do dāwri, minirwa a naychirin iyaw yapwaw do hanyit a anghil ni ĀPO di Abraham a kāna, 16“Abraham, yaken si ĀPO a maychirin dyimo, kan yaken magsapata dyimo do mismo a ngaran ko a maynamot do pinarin mwaya, as kan abaw wedwed mo a mangitoroh so pōtot mwaya moyboh, 17taywara bindisyonan koymo. On, paypārohen ko saw kapotōtan mo a akmas kāron bitohen do tohos mana akmas kāron anay do payis no kanayan. Abāken danchi no kapotōtan mo nasnasyon saya a kabōsor da. 18As maynamot do kapotōtan mo, mabindisyonan sanchiw tabo tawotawo do tanaya maynamot do kapagtongpal mwaya so bilin ko.”‡

19Sinpangan na, naybidi sa Abraham kan Isaak do yanan daw no adīpen na saw. Nakapaybidi darana do Beerseba, kan dawriw niyanan Abraham.

20Napahabas nyaya, nadāmag ni Abraham a myan saw anak ni Milka a baket ni kakteh na Nahor. 21Siraw mahahakay a anak na, ki si Os, iyaw matoneng, si Bos a adyen na, kan si Kemwel a āmang ni Aram. 22Myan pa saw anak ni Milka a mahahakay a sa Kesed, Haso, Pildas, Jidlap, kan Betoel. 23Si Betoel, ki āmang ni Rebekka. Siraw nyaw wawaho a anak ni Milka di Nahor a kakteh ni Abraham. 24Si Reoma a minabakes ni Nahor, ki myan pa saw anak na mahahakay a sa Teba, Gaham, Taas, kan Maakah.