1Do asa karaw, nangay a nagpasyar si Dina* a balāsang da Jakob kan Lea dyirad babbalāsang saw a omyan do dawri a tana a Kanaan. 2Do kayan naw a magpasyar ni Dina, ki naboya ni Sikem a baro ni Hamor a asa magtoray do dawri a tana no Hibeo saw a tawo. Do dāwri, minanchaan ni Sikem si Dina, ta rinames na a namarinan so chakey na. 3Do nakatayoka naw, tomnobo kapagayat ni Sikem di Dina a pōtot ni Jakob, as kan nadidiw ni Sikem a myan danaw ayat na dya. Dawa, naychirin di Dina so makahwahok. 4Sinpangan na, inbahey ni Sikem di āmang na a kāna, “Mo āmang, ipamosposan mo pa an maypāngo a makabahay ko nawri a mabakes.”

5Do dāwri, natonngan ni Jakob iyaw pinarinaw ni Sikem di Dina. Ki maynamot ta myan pa saw pōtot naw a mahahakay do pagpaspastoran daw so binyay da, naylilyak aba mandad nakapaybidi da.

6Sinpangan na, nangay sa Hamor kan Sikem a baro na a nachisarīta di Jakob. 7Do kayan daw a magsasarīta, kosto sa mawaraw pōtot saw ni Jakob a mahahakay a yapo do nagpaaraban daw siras binyay da saw. Ki nableg kan pinagmamayo da do nakadngey daw so naparinaw do kakteh daw. Taywaraw kasoli da di Sikem, ta inasnesnekan naw tabo tawotawo no Israel do nakalapos nas dāyaw ni Dina, as kan iyaw kaparin a akma syay, ki rebbeng naba maparin komwan.

8Ki aran komwan, inpapāti ni Hamor a kāna, “Oyod nas kadaw ni Sikem a anak ko so balāsang mwaw. Dawa, chāsi nyo yaken, ta ipakabahay nyo dya. 9Asa pa, maganay āno an maychakabahay saw anak ta saya? Itoroh nyo saw babbalāsang nyo dyamen a kabahay namen, as kan kabahayen nyo saw babbalāsang namen saw. 10Ta an komwan, maparin nyo omyan dyamen do tana namenaya, ta baywan namen abaynyo a omyan dya. On, omyan kamo dya. Magnigosyo kamo dya, kan gomātang kamo dya so bōkod nyo a tana.”

11Sinpangan na, binata ni Sikem di āmang ni Dina kan siraw kakakteh na saw a mahahakay a kāna, “An chāsi nyo yaken kan itoroh nyo nyaya balāsang a kabahay ko, aran āngo akdawen nyo, ki itoroh ko. 12Ibahey nyo an papiraw pagbāyad ko kan rigālo ko dya, ta itoroh kwa aran āngo iyaw chakey nyo dyaken. Basta ipakabahay nyo dyaken si Dina.”

13Maynamot do pinarinaw ni Sikem a marahet di Dina a kakteh da, myan sīkap dan pōtotaw ni Jakob a mahahakay do initbay daw dyirad may-āmangaw. 14Binata da dyirad may-āmangaw a kon da, “Mapalobōsan aba a machikabahay kakteh namenaya do dya nakogit, ta pakasnesnekan namen nawri an parinen namen. 15Makey kami an basta mayparin kamo a akma dyamen. Ipakōgit nyo sa tabo mahahakay dyinyo. 16An parinen nyo nyaya aket, maparin taw maychakabahay. Omyan kami pa dyinyo, kan machichasa kami na dyinyo. 17An maskeh kamo a magpakōgit aket, hapen namen si Dina, as kan komaro kami do dya logar.”

18Do nakadngey sya da Hamor kan pōtot na si Sikem, naktokto da a akmay maganay dyiraw inakdaw daw. 19Naybabalay aba si Sikem a mangtongpal so tōlag daw a maynamot do kapagkogit, ta oyod nas kadaw si Dina. Si Sikem, ki iyaw mabigbigbig do tabo kakakteh na do bahay ni āmang na.

20Do dāwri, nangay sa Hamor kan pōtot naw a si Sikem do rowanganaw no idi daw do pagmimitingan no konsiho, as nakapachisarīta da dyirad kapayngay da saw a mahahakay a omidi do dawri a idi. 21Nyaw binata no may-āmangaw dyira a kon da, “Makey sa machisīt nya saya mahahakay dyamen. Dawa, rawaten ta sa a omidi dya, kan baywan ta saba a magnigosyo so chakey da, ta marahawaw tana taya. As maparin ta pa kabahayen pōtot da sa, kan komwan maparin da kabahayen pōtot ta sa. 22Ki chakey daban nya saya mahahakay omyan dya kan machichasa dyaten, an dya makōgit tabo mahahakay dya a akma dyira. Nawriw paglintegan da. 23Syimpri dyira ta na sanchiw binyay da saw, tabo a warawara da, kan tabo kadwan saw a animal da. Oyod abawri? Dawa, machitōnos ta a magpakogit, yaten a tabo a mahahakay tan omyan sa dyaten.”

24Do dāwri, nakey sa tabo mahahakayaw a myan daw do rowanganaw no idyaw do inbahey daw da Hamor kan Sikem. As dawa, do dawri a idi, nagkōgit sa tabo mahahakay.

25Do katayokaw no tatdwa karaw, ki minrakamah danaw kōgit daw. Do dāwri, siraw mismo kaktehaw ni Dina a sa Simeon kan Lebi a pōtot ni Jakob, ki sililimed sa somindep do idyaw. Sinpangan na, ināsot daw bahayang daw, as kan diniman da tabo mahahakayaw daw. 26Tinabtaban da pa sa a diniman sa Hamor kan Sikem a pōtot na, as nakahap da si Dina do bahayaw ni Sikem, as nakakaro da. 27Katayoka da Simeon kan Lebi a nangdiman siras mahahakayaw daw, nagsamsam saw tabo pōtotaw ni Jakob a mahahakay so warawara do dawri a idi, tan mabahes daw nakarārayawaw no dāyaw ni Dina a kakteh da. 28Inhap da tabo karniro, bāka, kan asno. Inhap da paw tabo myan saw do irahem no idi kan do hakawan da saw. 29Inkaro da pa sa tabo kinabaknang daw. Inkaro da saw babbaket kan adedekey da saw, as somindep sa do kāda bahay a nangsamsam so tabo chakey da a warawara.

30Do nakatonengaw ni Jakob so pinarin daw no pōtot na saw, binata na di Simeon kan Lebi a kāna, “Taywara kamwaya! Inyo pakayapwan riribok kwaya. Changori, maynamot do pinarin nyowaw, ipsok darana yaken no tawotawo saya a Kananeo kan siraw Pereseo saya a omyan dya. Dēkey saw tawo ko saya, as an payrarapahen da tabo tawo da, as gobaten da yaken, syirto a madiman ako kan intīro a pamilya ko.”

31Ki tominbay sa a kon da, “On, mo āmang, ki maparin namen aba a ibidang kakteh namenaya a akmay asa mabaybayādan a mabakes.”