-6-
1Anchan machihanghang ka do matoray a tawo,
iktokto mo a maganay an sino kasalap mo.
2An masaraw ka, ep-epen mo.
3Pakakdekden mwabaw magkakaīmas a kanen na,
ta makaallīlaw saw nawri a mākan.
-7-
4Mayhohopag kaba a manglakat so kinabaknang.
Masīrib ka pakono a mamenpen so inawan mo.
5Do kakimit no mata, mabo kinabaknang,
ta akmay tomobo a panyid
kan somayap do kademdeman a akmay kangkang.
-8-
6Koman kaba so kanen no koripot a tawo.
Pakakdekden mwabaw magkakaīmas a kanen na.
7Ta iya, ki akmas tawowaw a mangarkarkolo so balor na.
Batahen na dyimo a kāna, “Ngay, koman ka kan minom ka!”
ki komwan abaw myan do aktokto na, ta sin-aawis lang.
8Iyota monchiw taydedekeyaw a nākan mo,
as sayang anchiw makahwahok saw a inchirin mo dya.
-9-
9Paychirinan mwabaw abos arang,
ta chahanyinyi nanchiw nainsirīban a chirin mo.
-10-
10Paydisen mwabaw adan a mohon do sīgodaw a yanan na,
as kan hapen mwabaw tana da no olīla,
11ta mabīleg Mangalāngon da.
Iyanchi a mismo mangidarom dyimo.
-11-
12Ipasnek mo a iktokto kapangnanawo,
kan adngeyen mo a maganay chirin saw no kapakatoneng.
-12-
13Magalangan kaba a mangdisiplīna so anak,
ta chadiman nabaw kabāot mo sya.
14An baōtan mo iya so bāot,
isalākan monchiw byay na do kadiman.
-13-
15Anak ko, an masīrib ka,
ayket, masoyot ako panchi.
16Taywara a masoyot akonchi
an madngey koymo a maychirin so kosto.
-14-
17Apalan mo sabaw maygaygatos,
ki nāw mo a tongtongen iyaw kaanyib mo di ĀPO.
18An komwan, syirto a maganay anchiw masakbayan mo,
as kan mabo abanchiw namnāma mo.
-15-
19Anak ko, mangadngey kan maypasīrib ka,
as nāw mo a iktokto kosto a rarahan.
20Machibarkāda kaba dyirad maboboken
mana siraw masasaraw saw.
21Ta siraw maboboken kan masasaraw, magpobri sanchi,
kan iyaw kapakaycheh daw, mapagrotrot dyira.
-16-
22Adngeyen mos āmang mo a nakaotāngan mos byay mo,
kan chahanyinyi mo abas ānang mo anchan bakket dana.
23Gatāngen mo oyod kan ilāko mwaba.
Ahapen mo kinasīrib, disiplīna, kan kapakaāwat.
24Taywara masoyot āmang an malinteg anak.
Iyaw āmang no masīrib so anak, charagsak nanchiw anak na.
25Pakaragsakan mo pakono āmang kan ānang mo,
as chasoyot pakono imo ni ānang mo a nangyanak dyimo.
-17-
26Anak ko, italek mo pa dyaken aktokto mo,
kan nāw mo a sipōtan dadakay ko.
27Ta iyaw maglaklāko so asi na, ki akmay marahem a abot.
As no baket a dya mapodno, ki akmay malopit a bobon.
28Madibadibat a mangnanaya a akmay manakanakaw,
kan paypārohen na saw dya mapodno a mahahakay.
-18-
29Sino makakāsi? Sino myan so kaliday?
Sino pirmi a machidiman? Sino pirmi a magriklāmo?
Sino nabigaran a abos paynamotan?
As sino manyibaya so mata?
30Sino pa an dya siraw ditā daw do palek
a siraw pirmyaw a mangpadas so natimpla a arak.
31Chiban mwabaw palek an mabaya,
an somilsilap do irahem no bāso,
kan malamōyot a akdenen.
32Do kapanawdyan na, manbat a akmay boday,
kan manoktok a akmay madīta a marem.
33Iyaw mata mo, maychakarwa dananchiw kapakaboya mo,
kan madyido dananchiw mohtot do dangoy mo.
34Akma ka nanchis asaw a maypoktad do hobok no tāw,
mana akmas asaw a manapenapet do tōtok no palo.
35Batahen monchi a, “Kinabil daw yaken, ki naynyinan akwabaw!
Minālo daw yaken, ki nadidiw kwabaw!
Āngonchan mayokay ako?
Maychichwas ako nanchi so inomen ko.”