1No nāw na matoleng aran masanyib kapaydabdab sya,
maychihat a marārayaw kan apabaw rimīdyo na.
2Do kapagtoray dan malinteg, chasoyot no tawotawo,
ki do kapagtoray no marahet, magāsog tawotawo.
3No madaw so kinasīrib, paragsaken na si āmang na,
ki no kayrayay dan balangkantis, boslonen naw kinabaknang na.
4Do kinalinteg, pahnyihen no āriw pagāryan na,
ki iyaw maāgom do pasoksok, rārayawen naw nasyon na.
5No mangpasablog so karoba na,
akmay mapawkoy so asdok do tokapan na.
6No marahet a tawo, ki matolo do bōkod na a gatos,
ki no malinteg, ki magkanta kan masoyosoyot.
7No malinteg a tawo, chapatak na saw kalintegan dan mapobri,
ki no marahet, maawātan nabaw komwan saya a kapakatoneng.
8Siraw mangoy-oyaw, mabyayan daw riribok do syodad,
ki siraw masisīrib, masboyan daw kasoli.
9An mangiyangay masīrib a tawo so abos arang do pangokoman,
iyaw abos arang, tod a manyido do kasoli na kan chamimyeng na, as kan abaw talna.
10Siraw mangdimdiman, ipsok daw tawo a abo so gatos,
kan chichwasen da a dimanen iyaw malinteg a tawo.
11No abos arang, pabtaken naw soli na,
ki no masīrib a tawo, mapenpen na.
12An mangadngey magtoray so bayataw a chirin,
mayparin anchi a marahet tabo a opisyalis na.
13No mapobri kan no mangidadanes, ki myan payengayan da:
torohan sa dadwa ni ĀPO so kapanyideb do mata da.
14An mapagtalkan kapangokom no āri dyirad mapobri,
mahay anchiw kapagtoray na.
15Iyaw kapagbāot kan disiplīna, manoroh so kinasīrib,
ki iyaw anak a mainonolay, pakasnesnekan ānang na.
16Do kapaypāro dan marahet, ki maypāro gatos,
ki sisasaksi sanchiw malinteg do karārayawan da.
17Disiplināen mo anak mo, kan itoroh nanchi dyimo kaydamnayan no kapangtokto mo.
On, itoroh nanchiw pakaragsakan mo.
18An abo parmata a yapo do Dyos, tokatokapan dan tawo linteg,
ki magāsat tawo a magtongpal do linteg no Dyos.
19Do chirin aba lang kachita no kapangkosto so adīpen,
ta aran maāwatan na, ki tongpalen naba.
20Maboya moriw tawo a tarantādo a maychirin?
Arwaro paw manamnāma do abos arang a tawo kan iya.
21An pabos-oyan mo adīpen mo a yapo do kadēkey na,
mangriribok anchi do panawdyan na.
22No masosolihen, mapahtot so kapaydidiman,
as iyaw malisto a komohat, mamarin so āro a gatos.
23Iyaw kapangas no tawo, mapabodis sya,
ki iyaw mapakombaba, mangrawat so dāyaw.
24No kasmang no manakanakaw, ipsok naw mismo na inawan.
Magsapata do pangokoman, ki abaw ipodno na.
25Iyaw kāmo no tawo, ki mayparin a asdok dya,
ki no masaray di ĀPO, ki abaw kaparoparwan na.
26Āro tawo a makey a mangay di āri a mapadādaw,
ki si ĀPO, iyaw makaikeddeng so kinalinteg.
27Siraw malinteg, ipsopsok daw dya malinteg,
ki iyaw marahet a tawo, ipsopsok naw malinteg a tawo.