Siraw Panyinyirin ni Agor
1Siraw nyayaw chirin saw ni Agor a pōtot ni Jakeh. Nya, ki naispiritwan a minsāhi na:
Binata nya tawo da Ityel kan Okal.
2“Yaken, akmakoy animal a abos kapangtokto.
Aba dyaken kapakaāwat a myan do tawo.
3Nananawo kwabaw kinasīrib,
as kan abaw kapakatoneng ko do Masantwanaw.
4Sino tawo a naypatohos kan gominchin a yapo do hanyit?
Sino makakalawop so salawsaw do pālad na?
Sino makapongos siras ranom saya do laylay na?
Sino napatnek siras letteng do intīrwaya lōbong?
Āngo ngaran na, kan āngo ngaran anak naw a mahakay?
Ibahey mo an chapatak mo, ah!
5“Kāda chirin no Dyos, ki mapagtalkan.
Iya, ki akmay sarāpa dan machikāmit saw dya.
6Nayōnan mo sabaw chirin na,
ta āngwan paydabdab naymo, as ipaneknek naymo a asa maybayataw.”
Siraw Kadwan a Panyinyirin
7“Ariw dadwa a akdawen ko dyimo mo Āpo Dyos.
Dyi mo pakono yaken a baywan sakbay a madiman ako.
8Manma, pabawahen mo yaken do dya oyod kan kapaybayataw.
Somarono, pagpobrihen mana pagbaknangen mwaba yaken.
Torohan mo pa yaken so kosto lang a chabyay ko,
9ta an bomaknang ako, āngwan ilibak koymo,
kan batahen ko a ‘Sino si ĀPO?’
Mana an pomobri ako, as manakaw ako,
ki asnesnekan konchiw ngaran no Dyos ko.
10“Parahrahten mwabaw adīpen do āmo na,
ta āngwan abayen naymo, kan imonchiw maglak-am.
11“Myan saw mangabay siras āmang da sa,
kan aba polos kapagdāyaw da dyirad ānang da.
12Myan saw madalos do kapakaboya da,
ki madalos saba do oltimo a kalapos da.
13Myan saw mapangas so kapanyideb.
Makatotohos kikimit da do kairoromen das kadwan!
14Myan saw nyepen da, ki akmay ispāda,
as no kamangsasanga da, ki akmay imoko
a mamatawos siras mapopobri yapo do tanaya
kan siraw makachitaw do tabo a tawotawo.
15“Iyaw alimātek, ki myan dadwa anak na a mabakes
a mangagagay sa a kon da, ‘Manoroh ka! Manoroh ka!’
“Myan saw tatdo a dya polos a mapnek.
Bāli, apat a dya polos a mangibahey so ‘Manawob dana!’:
16iyaw tanem, iyaw mabakes a hopes,
iyaw tana a dya marnek so ranom,
kan apoy a dya mawsepan.
17“No mangoyaw so āmang na
kan mangiroromen so kapangnanawo ni ānang na,
ki bawbawan danchi no kak mata na
kan kanen danchi no kangkang.
18“Myan tatdo a taywara a makaskasdāaw dyaken.
Bāli, apat a dyi ko a maāwatan:
19iyaw kasayap no kangkang do tohos,
iyaw kakayab no boday do bato,
iyaw kayam no gapor do tāw,
kan iyaw kapagayat no baro do balāsang.
20“Nyaw kaparin no machikamalāla a mabakes:
koman as kaponas nas dangoy naw,
as kabata na sya abo kaparin na madi.
21“Myan saw tatdo a pamirpiran no tanaya.
Bāli, apat a dyi na marawa:
22iyaw adīpen a mayparin a āri,
iyaw abos arang a mabsoy do kanen,
23iyaw makapsopsok a mabakes an makakabahay,
kan iyaw tobotoboyen a mabakes a machitādi do āmo na.
24“Myan saw apat a dedekey a parswa do tanaya,
ki taywara sa so kasīrib:
25Siraw bohawo, mayit saba,
ki kapyahen daw chabyay da an rayon.
26Siraw koniho, ki mabīleg saba a parswa,
ki makapaybahay sa do yanan bato.
27Siraw kabaga, abaw āri da,
ki maornos kasayap da.
28Iyaw geget, maparin mo a tiliwen do kakamay mo,
ki madongso mo sa do palasyo da saw no ar-āri.
29“Myan saw tatdo a makaay-āyo so kayayam.
Bāli, apat a akmay āri iyaw kayam da:
30iyaw lion a kabibilēgan do tabo no animal
a dya magsonod do aran āngo,
31iyaw kapangas a kayam no sabongan, iyaw tōro a kalding,
kan iyaw āri do salapen dan bōyot na.
32“An nayparin ka na a abos arang, kan pinatohos mo inawan mo,
mana an nagpangta ka so marahet,
bengbengen mos tanoro mwaw dangoy mo.
33Ta akmas kapamīs so naydyad a nyoy,
kan kapamisipis so momodan tan magdaringongo,
komwan kapangoyikoyid so soli a mangkiras so kapaydidiman.”