Hay Idat nan ay Babain hi Anomnoman
1Ya intuluy goh Solomon an nangulgud hi nipa"el an inalinay,
“He"an imbaluy'u,
hay maphod ya ihamadmun donglon nan itugun amam ta luma'eng'a.
2Nan itudu' ay he"a ya ma"ap'aphod,
at mahapul an adim inganuy.
3Hidin a'ung'ungnga' hi wada' hi abung ama ya unna' oh'ohhan imbaluy ina,
ya pa'ahhalimunana' ay dida,
4ya intudtuduwana' ay ama an inalinan ha"in di,
Adim al'alliwan nan itudu',
ya mahapul an unudom tun itudu' ta umadaog'a ya matagu'a.
5At adim al'alliwan unu du'gon nan hinapihapit'u,
at innilaom di atom ta paddungnay mi'ligwa'ah nan babain hi Anomnoman ta manomnoman'a
ya ta abalinam an innilaon nan na'ahhamad.
6Ya adim inganuy hi Anomnoman ti Hiyay mangibaliw ay he"a,
ya gulat ta pohpohdom Hiya at Hiya goh di manalimun ay he"a.
7At hay ma'ahhapul hi atom ya pot'om hi Anomnoman ta Hiyay engham,
ya ta"on hi un nidugdugah di balul nan bunungna mu bayadam damdama
ta abalinam an innilaon nan na'ahhamad.
8Ti gulat ta pohdom Hiya at umannung an ipabagtu da'a,
ya gulat goh ta lo'mom Hiya at umannung an Hiyay mange'gon ay he"a.
9Ya Hiyay mangidat ay he"ah mapmaphod an pulimyum an ay uklup di ali an iyuklupnah ulum.
Hiyah ne intudun aman ha"in.
10At he"an imbaluy'u, donglom nan hapito',
ya ihamadmun mangunud ta dumu'du"oy di pi'taguam hitun luta.
11Intuduwa' he"ah atom an paddungnay mi'yahawa ay Anomnoman,
ya intudu' goh nan nahamad an atom eten atagum.
12At hay pundalanam ya mi'id ah humaliwan he"a,
ya gulat ta tumagtag'a at adi'a munlu'bub.
13Ya ihamadmu ta adim al'alliwan hanan intugun'u
ti hiyay dumalat hi pi'taguam.
14Ya mahapul an adi'a mitnud hinan way ayan nan tatagun nappuhiy ato'atonda,
ya adim goh eng'enghon nan nappuhin ato'atonda.
15Mahapul an du'gom dida ta adim ahan aton nan nappuhi,
ya butiwom ta nan nahamad di unudom.
16Ti adi umali enlo'da ta engganay unda aton di nappuhi,
ya adida molo' ta nangamung hi un way atondah nappuhih nan ibbada.
17Ya hay amnawandah ato'atonda ya nan nappuhi,
ya hay laylaydonda ya unda gun pumatoy.
18Mu nan dalan an pange'wan nan nahamad di pangatda
ya umat hinan pa'abbuhu' an potang an gun pumatpatal ta nangamung hi un muntonga.
19Mu nan dalan an pange'wan nan mangamangat hi nappuhi ya pa'ahhelong,
at adi mattig di pange'wanda,
at himbumagga ya mun'ahalibdudda.
20He"an imbaluy'u, ihamadmun ingaon tun hapito',
ya pa'addonglom tun itugun'u
21ta adim hin'ing'ingaon,
ya ihihi'almu ta humalatom hi nomnommu.
22Ti nan mangabulut hitun itugun'u ya hiyay dumalat hi pi'taguanda ya pumhodanda,
23at hay mahhun ahan hi atom ya hay panalimunam hinan nomnomom
ti hiyay alpuwan di ataguam.
24Ya adim ahan hapiton nan agguy immannung,
ya du'gom nan layah an hapit.
25Ya adim abuluton an mataktak nan ninomnommuh atom hinan nitaguam
an umat hinan tagun hay dalanonay papuutanan tigon,
26ya mahapul an ihamadmuy aatmu ta an amin nan atom ya adi mibahhaw,
at waday punhulbiana.
27Ya mahapul an adiyu ihingngih nan nibahhaw an dalan,
ya du'gonyu nan nappuhin ma'ma'at ta nan ma'andong an dalan di pange'wanyu.”