Hay Tugun nan Alin hi Lemuel
1Hiyatuy hinapit han Alin hi Lemuel hi intugun inana ay hiya an inalinay,
2“Waday numbino'ob'on an alyo' ay he"an imbaluy'un lala'i
ti immannung an nawada'an dimmalat din nangiluwalua' ay Apo Dios.
3Bo'on hay binabaiy pangpuham hi pihhum ya bi'ahmu
ti hiyah ne dimmalat hi nun'abahbahan din udum an a'ali.
4Hay oha goh, Lemuel, ya maphod hi un adi mun'am'aminul nan ap'apu
an uminum hi bayah ya nan numbino'ob'on an bumutong.
5Ti gulat ta uminumda ta mabutongda
at aliwanda nan Uldin,
at inganuyda nan nun'awotwot an munhapul hi badang.
6Hay mabalin hi uminum hinan limminun bayah ya nan tagun ay matomatoy
an adi pa"edpol hinan dogohna.
7Ta inumonda ay at olom ya aliwanday anawotwotda ya nan nidugah an munha'it.
8Mahapul an badangam nan tatagun adi pa'abbaliw hi odolda an umat hinan mahmo' ya nawotwot
ti gulat ta iyalida didan idiklamuh nan punhumalyaan at mahapul an ma'andong di atom an mumpanuh hinan midiklamu.
9At mahapul an hay immannung di panumalyam ay dida ta mabaliwanda.”
Hiyah ne hinapit nan Alin hi Lemuel.
Nan Nalhin an Babain Nahamad di Pangatna
10Naligat ahan hi anapon nan babain nahamad di pangatnan ahawaon
ti nan umat hinay aatna ya nabalbalul ya un nan do'ol an na'angnginan batu.
11At nan ahawan nen babai ya ongol di pangedenolanan hiya
ti inilanan nidugah di punhulbiana,
12ya maphod di aton nen babain hiya,
ya minaynayun an adina paligaton hiyah an amin hinan ataguna.
13Ya hiya ya mahlun umabo'abol hinan lo'ob,
ya mundenol hiyan muntamu,
14ya mahlu goh an umuy manganap hi onondan hina"aman ta"on un adagwiy pangngalana.
15Hiya ya ag'agan bumangon hinan helhelong ta idadaanay onon nan pamilyana,
ya intudunay aton nan tagalana.
16Ya hamadonah mahhun nan lutah un maphod ya unna pola'on,
ya nan bino'lanay usalona ta tammanah greyp heden penla'na.
17Ya hiya ya mabi'ah,
ya mahlun muntamu.
18Ya inilana an maphod di aat di pungkumilduana,
at ta"on un nan mahdom ya gun muntamu
19ti hiya ya gun munlubid ya mun'abol hinan lubungda.
20Hiya ya adi na'ikot an pun'idatana nan tatagun nun'awotwot an ama'ma"idan,
21ya adi numanomnom an ta"on hi un madatngan di lawang an tungnin
ti waday mun'a'ugtul an lubung nan pamilyana.
22Ya iyammanay na'al'altian an abo'da,
ya hay lubungna ya ma"aphod di tigawna.
23An amin nan tataguh nan pi'babluyanda ya e'gonandah ahawana
an hiyay ohah mangipangpangulun dida an himpamabluy.
24Ya henen babai ya mun'ammah lubung ya balikis ta ila'unah nan mungkumildu.
25Hiya ya mi'id al'alih aatna,
ya e'gonanda hiya,
ya adi numanomnom hi nitaguan hi udum di algaw ti waday denolna.
26Ya dumalat di ananomnomana ya ma'ulay di panapitna,
ya nala'eng an tumugun.
27Hiya ya ihamadnan mangipapto' hinan ma'ma'at hi abungda,
ya adi napayad hi tamuna.
28Nan imbabaluyna ya wagahanda hiya,
ya umat goh ay ahawana an ipabagtuna hiya
29ti alyonay, “Do'olday binabain mun'aphod di pangatdan ahawada,
mu he"ay ma"ap'aphod ya un dida!”
Hiyah ne alyona.
30Umu'uddum ya un bumalbali nan maphod an tigaw di baba'i ya nan amaphodna ti adi munnanannong,
mu nan babain hi Apo Dios di dayawona ya hiyay mipabagtu.
31At midatan hiyah pulimyuna ti hiyah ne bino'lana.
At nan ina'inatnay dumalat hi pange'gonan an amin di tataguh nan babluy ay hiya.