1Nan babain nanomnoman ya inilanay atonan mangipaphod hi ma'ma'at hi punhituwanda,
mu nan babain nakudang di nomnomna ya unnaat goh pupuhion nan ma'ma'at hidi.
2Nan tagun nahamad di pangatna ya e'gonanah Apo Dios,
mu nan tagun nappuhiy pangatna ya pihulona Hiya.
3Nan hapiton di tagun nakudang di nomnomnay dumalat hi agilatanah pidwa,
mu nan hapiton nan nala'eng an taguy dumalat hi mangehwang ay hiyah nan nappuhin ma'at.
4Gulat ta mi'id di nuwang hi pun'aladu ya mi'id ah paguy hi miyalang,
mu wada ay at mapnuy alang.
5Nan nahamad di ugalinan mun'ihtigu ya immannung an adi munlayah hi pangihtiguna,
mu nan nappuhiy ugalinan mun'ihtigu ya layah ya anggay di hapitona.
6Nan mapihul an tagu ya mid anomnomana an ta"on hi unna adalon,
mu nan nanomnoman an tagu ya nalakay luma'engana.
7Maphod nan tagun man'ug hinan udumnan tagun nakudang di nomnomna
ti mi'id maphod hi adalonan hiya.
8Nan nala'eng an tagu ya inilanay maphod hi ato'atona,
mu nan tagun nakudang di nomnomna ya hay inilana ya maphod di atona, mu nahihinnu.
9Nan nakudang di nomnomda ya abatlanday pumbaholanda an adidaat goh ipaphod,
mu nan tatagun nahamad di ugalida ya pohdondan ag'agan aliwan Apo Dios di baholda.
10Nan nidugah an punlungdayaan di ohan tagu ya anggay hiyah munle'na ti adi mabalin an mitolman hinan ibbanan tagu,
ya umat goh hinan umamlongana an adi mabalin an mi'godway udum.
11Nan nunhituwan di nappuhiy pangatna ya ag'agan ma'ubah,
mu munnanannong di nunhituwan nan tagun maphod di pangatna.
12Nan udumnan tatagu ya hay nomnomonda ya maphod di nitaguanda,
mu hay angunuhna ya milahhindan Apo Dios hi mi'id pogpogna.
13Ta"on hi un mi'yab'abatol nan udumnan tagu mu munha'it di punnomnomanda an adi mattig,
mu wa ay ta malpah di pi'yam'amlonganda ya wagwada damdama nan punlungdayaanda.
14Hay lagbun nan man'ug ay Apo Dios ya nan nappuhi goh an miyunnudan hinan inatna,
ya hay lagbun nan tagun maphod di pangatna ya mipabangngad goh nan maphod ay hiya.
15Nan tagun nakudang di nomnomna ya kulugonan amin di ibagadan hiya,
mu nan nala'eng an tagu ya hamadonah mahhun hi un immannung ya unna abuluton.
16Nan nanomnoman an tagu ya elana, at du'gonay nappuhin ma'ma'at,
mu nan tagun nakudang di nomnomna ya ag'agan bumungot an adina nomnomon hi un maphod hi aton unu nappuhi.
17Umamu'amungaw nan tagun nalakan bumungot,
ya mapahiw nan tagun bumalbalih nan ibanan tagu.
18Hay lagbun nan nawongwong an tagu ya mipaddung hinan ato'atona an mi'id di poto'na,
mu nan nanomnoman an tagu ya hay a'ud'udman di la'engnay lagbuna.
19Nan tatagun nappuhiy ato'atonda ya mipa'ampadah awni
ti la'tot ya umuydah wadan nan mumpapto' ay dida an nan tatagun nahamad di pangatda ta mumpahmo'dan dida ta mumpabadangda.
20Nan tagun nawotwot ya mi'id di mamhod ay hiya an ta"on nan heneggona,
mu do'ol di mamhod an mi'ligwah nan adangyan an tagu.
21Mumbahol nan tagun mamahiw hinan hennegona,
mu nan mammo' hinan nawotwot ya immannung an mawagahan.
22Undan agguy nibahhaw di planun nan munnomnom an mangat hi nappuhi?
Mu nan munnomnom hi maphod an pangat ya hiyay midatan hi pamhod nan liligwanah enggana.
23Hay lagbun nan mahmahlun muntamu ya nan itaguana,
mu nan tagun un hay humapihapit an mi'id ah tinamuana ya hiyay mi'id di tanudna.
24Nan nanomnoman an tagu ya ma'ud'udman di inadangyana,
mu nan manangpah ya gun miyal'allay amanangpahna.
25Nan nahamad an mangipa'annung hi pangihtigunay mamaliw hi ataguan nan tatagun mi'id inatdah nappuhi,
mu nan munlayah an ihtiguy dumalat hi amoltaanah nappuhi.
26Nan mange'gon ay Apo Dios ya maphod di punnomnomana ti hi Apo Dios di pangehdolana,
ya ta"on un nan pamilyana ya alyonday hi Apo Dios di ihi'uganda.
27Immannung an nan pange'gonan ay Apo Dios ya umat hinan obob an umidat hi ataguan,
ya hiya goh di mangibaliw hi adi atayan.
28Nan do'ol ahan an tatagun ipapto' nan aliy dumalat hi ipabagtuana,
mu gulat ta gun umitang di tataguna at la'tot ya mi'id hulbin di pumpapto'ana.
29Nan tagun ma'uya ya madpol ya makulug an nanomnoman,
mu nan tagun mabanbannungot ya nakudang di nomnomna.
30Malenggop ay di nomnom di tagu ya maphod goh di punle'nana,
mu nan tagun umamoh hi ibbana ya nipaddung hinan dogoh an bumulu' hi odolna.
31Nan tagun mamaligat hinan nun'awotwot ya paddungnay hi Apo Dios an nunlumun diday pinihulna,
mu nan ma'ulay hinan nun'awotwot ya e'gonanah Apo Dios.
32Nan tatagun nappuhiy pangatda ya henen ato'atondan nappuhiy dumalat hi a'abakanda,
mu nan tatagun nahamad di pangatda ya mahanianda an ta"on hi unda matoy.
33Nan nanomnoman an tagu ya gun luma'eng,
mu nan tagun nakudang di nomnomna ya mabalin goh an luma'eng hi unna adalon nan aat di anomnoman.
34Nan nahamad an pangat nan tataguy dumalat hi ipabagtuan nan himpampun an tatagu,
mu ababain ahan hi un hay pumbaholan di ato'atonda.
35Nan ali ya mun'am'amlong hi un nan u'upihyalna ya iniladay maphod hi atondah nan tamuda,
mu pahiwona nan mungngohoy an adi mangat hinan ipatamuna.