8
ዓይኑሞ ሱኡጋሢ ዓይሣ ጎይፆና ሹሉንጎና ዓይናዺንታ ዳውቴ ዓይኑሞ
ፆኦሲ ዼኤፑሞና ዓሲኮዋ ቦንቾ
1 ናንጊና ናንጋ ጎዳ ማዔ ኑ ፆኦዛሢዮ!
ሱንፃ ኔኤኮ ሳዖ ቢያይዳ ዼኤፒ ዔርቴያኬ።
ኔኤኮ ቦንቻኣ ጫሪንጮኮ ዑፃ ማዒ ዼጌኔ።
2 ኔ ሞርኮኮ ዻንጎ ባይዛኒ
ዻኮ ናኣቶንታ ዻንፆ ዻንቃ ናኣቶንታ ኔና ጋላታንዳጉዲ ኔ ማሄኔ። 8፡2 ማቲ. 21፡16።
3 ኔ ማዤ ጫሪንጮ ታ ዛጋኣና
ፔ ቤዛ ቤዛ ኔኤኒ ጌሤ
ዓጊኖንታ ዦኦጋሢንታ ታ ዛጋኣና
4 ኔ ማሊ ጶቂሣንዳጉዲ ዓሲንሢ ዓይጎ ባኣዚዳይ?
ሃሣ ኔ ዔያቶ ዛሎ ማላንዳጉዲ ዓሲ ዓይጌንዴዳይ? 8፡4 ዒዮ. 7፡17-18፤ ዓይኑ. 144፡3፤ ዔብ. 2፡6-8።
5 ኪኢታንቻ ዓኣ ጎይፃፓ ዻካሮ ኔ ዔያቶ ኬይሴቴያ
ቦንቾና ዼኤፑሞና ኔ ዔያቶም ዒንጌኔ።
6 ኔ ማዤ ባኮኮ ቢያ ዑፃ ማሂ
ዔያቶ ኔኤኒ ዶኦሬኔ፤
ቢያ ባኮ ዔያታ ዎይሣንዳጉዲ ኔኤኒ ማሄኔ። 8፡6 1ቆሮ. 15፡27፤ ዔፕ. 1፡22፤ ዔብ. 2፡8።
7 ማራቶንታ ባኣቶንታ፥ ካዮ ቦዖዋ ዓይሱዋዖ
8 ጫሪንጮ ካፖንታ ባዞ ሞላሢንታ
ባዞ ዋኣፆ ዴማ ናንጋ ባኮ ቢያ
ዔያታ ዎይሣንዳጉዲ ኔኤኒ ማሄኔ።
9 ናንጊና ናንጋ ጎዳ ማዔ ኑ ፆኦዛሢዮ!
ሱንፃ ኔኤኮ ሳዖ ቢያይዳ ዼኤፒ ዔርቴያኬ።