41
ዓይኑሞ ሱኡጋሢ ዓይሣ ጎይፆና ዓይናዺንታ ዳውቴ ዓይኑሞ
ዓሲ ሃርጊንታዖ ሺኢቃ ሺኢጲሢ
1 ማንቆ ዓሶ ማኣዳ ዓሳ ዓንጂንቴያኬ፤
ዔያታ ሜታዼ ዓቦና ናንጊና ናንጋ ጎዳ ዔያቶ ማኣዳኔ።
2 ዒዚ ዔያቶ ካፓኔ፤
ሼምፔናኣ ጌሣኔ፤
ሳዖይዳ ዔያቶ ዓንጃኔ፤
ዔያቶኮ ሞርኮማኣ ዓኣሢ ዒንጉዋሴ።
3 ሃርጊንቲ ዔያታ ላሃዛ ናንጊና ናንጋ ጎዳ ዔያቶ ማይሣኔ፤
ፓሢያ ዔያቶ ፓሣኔ።
4 ታኣኒያ፦ «ናንጊና ናንጋ ጎዳሢዮ!
ታ ዻቤሢሮ ታና ሚጪንቲ ማኣሬ፤
ሃርጎይዳፓኣ ታና ፖዒሴ» ጌዔኔ።
5 ታ ሞርካ ታ ዑፃ ፑርቱሞ ጌስታዖ፦
«ዓይዲ ዒዚ ሃይቃንዳይ?
ሱንፃ ዒዛኮ ሳዖይዳፓ ዋሊንታንዳሢ ዓይዲ ናንዳይ» ጋዓኔ።
6 ታና ዔያታ ዖኦጫኒ ሙካሢ ዒናፓቱዋሴ፤
ታ ዑፃ ፑርታ ባኣዚ ጌስታኔ፤
ዱማ ዱማ ቤዞ ሃንቲ ሃንቲ ሱንፆ ዔያታ ታኣኮ ፑርቲሳኔ።
7 ሞርካ ታኣኮ ዎላ ፔቴ ማዒጋፓ ታ ዑፃ ካሽካሻኔ፤
ፑርታ ታና ሄላንዳጉዲ ፑርቱሞ ማላኔ።
8 ዔያታ ማላዖ፦ «ዒዚ ሃርጊንቲ ሃይቃኒ ዑኬኔ፤
ማይ ላሄ ቤዛፓ ዒዚ ዔቃዓኬ» ጋዓኔ።
9 ታኣኮ ካሦ ታኣና ዎላ ሙዔሢ
ታ ጉሙርቃ ዑኬ ማዔ ላጋሢ
ዬይያ ዓቱዋዖ ሞርኬ ማዒ ታ ጊዳ ዔቄኔ። 41፡9 ማቲ. 26፡23፤ ማር. 14፡18፤ ሉቃ. 22፡21፤ ዮሃ. 13፡18።
10 ናንጊና ናንጋ ጎዳሢዮ! ኔኤኒ ጋዓንቴ ታና ሚጪንቴ፤
ታ ሞርኮ ኮሜ ታ ኮፃንዳጉዲ ታና ፓሤ።
11 ታ ሞርካ ታና ባሺፆና ዎዛዺ ዴዒንዱዋሴ፤
ዬያና ኔኤኒ ታና ናሽካያ ማዔሢ ታ ዔሬኔ።
12 ታኣኮ ፂሉሞሮ ኬልቂ ኔ ታና ዓርቄኔ፤
ናንጊና ኔ ኮራ ኔኤኒ ታና ናንጊሻንዳኔ።
13 ናንጊና ናንጊ ሄላንዳኣና
ናንጊና ናንጋ ጎዳ ማዔ ዒስራዔኤሌ ፆኦዛሢ ጋላቲንቶንጎ! 41፡13 ዓይኑ. 106፡48።
ዓኣሜን! ዓኣሜን!