Pola Taitusmo tiratna timbiŋ rapar
Outna kam
Taitusa ma Iudana wiwitna ramootta wanaiŋ. Na an mɨnna ma Iesusna rɨtɨpacna ramoot ian ndarurina, na ma Polmo Iesusna up aŋgɨrena ramtaɨrta aiŋa otaca morena. Na Pola ma Taitusmo Kirit muta tɨkcarica eacrina, te, ma anna Iesusna rɨtɨpaikta meikramtaɨrta tumbunmo bubuocna aiŋa mona.
Na outta gan timbiŋ rapara gaindopatna, Kiritnaŋgepta tɨpemb kirarira laiŋ koinda wanaiŋ. Ainda moca ramootta Iesusna rɨtɨpaikta meikramtaɨrta tumbunna ramoot paŋanna laruna mo te, ma tɨpemb kirarir laiŋga matau ŋgoinna raŋgairaŋ. Na iŋmbaia Pola Taitusmo meikramtaɨrta wiwit kabe, kabemo riptina tɨp kirara mboprina, na anna ramtaɨr bagrarapa, meik bagrarapa, ramtaɨr ŋgaibapa, mina tuombta aiŋir kamndera morena meikramtaɨrap.
Na gan timbiŋ raparna mamamaina kambca ma gaind, Taitusa ma meikramtaɨrmo riptica mina iroar inkara kabe ndeacna, na kabena meikramtaɨrmo ndiarna tɨp kirara momonan, na mina kaega mona kambca kai mbop teac, na runduikta kambca kai mbop teac.
Taitusa Kirit muta eacrena Iesusna rɨtɨpaikta meikramtaɨrta tumbunna rɨtɨpacapa, tɨpemb kirarirmo, moa wandoŋairina
1
(1—3)
Aku Pol, aku Raraŋ Aetaniacna mbaiŋna ramootapa, Iesus Karaisna up aŋgɨrena ramoot. Na Iesus Karais, ma aukmo mandaca aku taŋga Raraŋ Aetaniaca ma ndo larapacrina meikramtaɨrta rɨtɨpaikca moi gagrana. Na aku minmo otaca mina kam gidikna landamŋi aŋgɨca mana tɨpembta kirarira raŋgaina. Ro 16.25, na Kol 1.27, na 2 Ti 1.1, na 1.9, na 1 Pi 1.20Aintik aku minmo otaca mina gagra rɨpac te, Raraŋ Aetaniacmo lambica ma minmo iarwarna eteacna wat neaŋna. Na atu ŋgoinna Raraŋ Aetaniaca reac ianna mo laru ŋgocor ndeacri, ma babuatna, ma an iarwarna eteacna watta ma aimo neaŋnandet. Na ma mba parurena. Epe 1.9-10, na 1 Te 2.4, na 1 Ti 1.1, na 1.11, na 2.3, na 2 Ti 1.10, na Ta 2.10, na 3.4Na an mɨnna ma ndo larapacrinanna, ma ramtaɨr ndeidta, iroara moi ŋgepca mina mana kammo wiwitica mbopatna, na an kirar mbuŋa ma ndona kammo moa laruca raekca tɨkatna. Aintik Raraŋ Aetaniac, ma ndo aimo mac nda aŋgɨna Ramoot, na ma ndo mbopatke, aku an wiwitirina aiŋa aŋgɨrina.
Ro 1.7, na 2 Ko 8.23, na Gal 2.3, na 2 Ti 1.2, na 4.10Aintik Taitus, u aukna nuoc ŋgoin tik, aku unmo gan timbiŋ rapara tirca neaŋga makɨpek, na an rɨtɨpaca aia rɨpacrenanna u toco anap. Ainda moca Raraŋ Aetaniacapa, aimo mac nda aŋgɨna Ramoot, Karais Iesus, maniŋa unmo kadmaica una iro inikmo moi wewettaca laŋ ndeacraŋnandet.
Taitusa ramtaɨr paŋaind laiŋmo larapacna
Na aku unmo Kirit muta tɨkcaririnanna, u an aiŋir tɨpembmo wandoŋaica korwina. Te, an kirara ŋgaua aku unmo mboprinanna, u an auŋembta Iesusna rɨtɨpaikta meikramtaɨrta tumnambta ramtaɨr paŋaindmo larapacna. Te, an ramtaɨr paŋainda, mina aiŋa Iesusna rɨtɨpaikta meikramtaɨrta tumbunna ŋginaŋa mona ramtaɨr. 2 Ti 2.24-26 1 Ti 3.2-7Na u larapacekna ramootta, ma meikramtaɨrta lamnik ŋgoutmo ma makukar kocor, na meac kabe niŋgikap laŋgoca eacrenan. Na an ramootna mombonikca mina Karaisa rɨpacrena, na mina tɨpemb ŋaŋao ŋgorikca kai raŋgai teac, na mina ndorita aemaetmo kai garuru teac. TN 10.9, na 1 Ko 4.1, na Epe 5.18, na 1 Pi 5.2Na u lamŋirena, Iesusna rɨtɨpaikta meikramtaɨrta tumbunna ŋginaŋa morena ramoot paŋanna, ma Raraŋ Aetaniacna aiŋna ŋginaŋa morena ramoot. Aintik ma Raraŋ Aetaniacna aiŋa mo te, ma wandoŋ ndeac te, meikramtaɨra manmo wat te, ma makukar kocor. Na ma ndomo gainda kai lamŋi teac, ma iapna ramoot, na ma meikramtaɨrmo paŋanmbaia tɨkraŋna. Na ma mba tawia nikkatrena ramoot. Na ma puk gargarapa wainna pukca kai amca ŋaŋaorena ramoot. Na ma kabena meikramtaɨrmo tamtamma mba ruŋrena ramoot. Na ma kituknduk aniac ŋgoin aŋgɨnake, mba toŋgorena ramoot. Wanaiŋ. Na meikramtaɨra mana kac nakɨp te, ma minmo actɨkca ma ndiarna tɨpna kirara mo. Na ma tɨpemb kirarir laiŋmo toŋgorena, na ma iroar laiŋ tiŋgikca raŋgairena. Na ma tɨpemb kirarir wandoik laiŋapa, Raraŋ Aetaniacna tɨpemb kirarirmo muruŋcamiŋa raŋgairena. Na ma ndona eteacna watmo ma mataua bubuocrena ramoot. 1 Ti 1.10, na 1.15, na 2 Ti 1.13, na 2.15, na 4.3, na Ta 2.1Na an kam gidikca mina manmo riptirenanna, ma anmo utiŋga gagararina. Ainda moca an meikramtaɨrmo ma minmo kam gidikca riptica mina anna rɨpac te, ma mina iroar inkara moi ŋgepca mina an kamma raŋgainande. Na an meikramtaɨra kammo nda mboprenanmo, ma gagraca mbop te, mina ndorita makukarmo wat rapacna.
Kirit mutna ramtaɨr wɨtta kabena meikramtaɨr ndeidta rɨtɨpacmo moa ŋgocrairena
10  1 Ti 1.6, na 4.7Na Kirit mutna Iesusna rɨtɨpaikta meikramtaɨrta tumbunna wɨtta mina kam gidikmo nda mboprena, na mina an wanaiŋna nininina kamb wɨtmo mbopca meikramtaɨrta iroar inkarmo parurenan. Na an ramtaɨra mina wɨtta Iudana wiwitnan. Na an wiwitta mina tikiŋit kakatacna gagrarena. Aintik u ŋginaŋa mona ramtaɨr paŋaind laiŋmo riaca larapac. 11  Mt 23.14, na In 10.12, na 1 Ti 6.5, na 2 Ti 3.6, na 1 Pi 5.2Ainda moca an ramtaɨra mina tɨpemb kirarir ŋgorikca mona morenan, na meikramtaɨrta kitukndukarmo wanaiŋ naaŋgɨrena taupna ŋgorerena, aintik mina minmo tɨpemb kirarir ŋgorikca riptirena, na aia an tɨpemb kirarirmo mona mɨnna wanaiŋ. Na an tɨpemb kirarir puŋga mina meikramtaɨr ndeidapa, mina wiwitna meikramtaɨrta rɨtɨpaikca moa ŋgocrairena. Ainda moca u minmo kɨraca mina ainta kambca kai mbopi mo teac. 12 Na atua Kiritna landamŋina ramoot aniac ianna ma gaindopatna, “Kiritnanda mina paparuna meikramtaɨr koind, na mina raŋna amta ŋgoaebta kirar toc, na mina meikramtaɨr ŋgorik. Na mina gagam niŋgikca ndamŋirena, na mina meikramtaɨr boborar.” 13  2 Ti 4.2, na Ta 2.2Na an kamma anna gidik. Ainda moca u minmo kam gargara neaŋga mina tɨpembmo wandoŋaina, te, mina Iesusmo gidikca rɨpacna. 14  1 Ti 4.7, na 2 Ti 4.4Na mina Iudana titocna paparuna nininiarmo kourmo kai ikca warac teac, na mina kam gidikmo iŋ neaŋrena meikramtaɨrta titoc, titocna paparuna tɨpemb kirarir toco kai warac teac.
15  Mt 15.11, na Lk 11.39-41, na Ro 14.14, na 14.20, na 14.23, na 1 Ko 6.12Na meikramtaɨra Raraŋ Aetaniacna lamnɨac ŋgoutmo rat ndeac te, titocna kainta reik toco rat ndeacnandet. Na meikramtaɨra Raraŋ Aetaniacna lamnɨac ŋgoutta tɨpemb kirarir ŋgorik rat ŋgocortanna raŋgairenan, mina Karaismo mba rɨpacrenan. Ainda mo te, reac ianna mba ratit, na mina nikinik iroapa, iroara Raraŋ Aetaniacna lamnɨac ŋgoutta kocnaia mba ratitndait. 16  Ro 1.28, na 2 Ti 3.5, na 3.8, na 1 Io 1.6, na 2.4, na Iu 1.4Ainda moca mina upemb puŋga gaindoprena, “Aku Raraŋ Aetaniacmo lamŋirena.” Na mina tɨpemb kirarira gainda wandacrena, mina manmo iŋ neaŋrena. Na Raraŋ Aetaniaca minap reikca momoa ma kari ŋgoin. Na kammo nda ipuŋrena ramtaɨra, mina reac laŋ ianna mona mɨnna wanaiŋ ŋgoin.

1:2 Ro 16.25, na Kol 1.27, na 2 Ti 1.1, na 1.9, na 1 Pi 1.20

1:3 Epe 1.9-10, na 1 Te 2.4, na 1 Ti 1.1, na 1.11, na 2.3, na 2 Ti 1.10, na Ta 2.10, na 3.4

1:4 Ro 1.7, na 2 Ko 8.23, na Gal 2.3, na 2 Ti 1.2, na 4.10

1:6 2 Ti 2.24-26

1:6 1 Ti 3.2-7

1:7 TN 10.9, na 1 Ko 4.1, na Epe 5.18, na 1 Pi 5.2

1:9 1 Ti 1.10, na 1.15, na 2 Ti 1.13, na 2.15, na 4.3, na Ta 2.1

1:10 1 Ti 1.6, na 4.7

1:11 Mt 23.14, na In 10.12, na 1 Ti 6.5, na 2 Ti 3.6, na 1 Pi 5.2

1:13 2 Ti 4.2, na Ta 2.2

1:14 1 Ti 4.7, na 2 Ti 4.4

1:15 Mt 15.11, na Lk 11.39-41, na Ro 14.14, na 14.20, na 14.23, na 1 Ko 6.12

1:16 Ro 1.28, na 2 Ti 3.5, na 3.8, na 1 Io 1.6, na 2.4, na Iu 1.4