Bàu Pariaq Hnài Da Miq Baq
1Ô con, tàng con khoi rùp bàu am ngè baxon dèh ca mangai haten hatìa đòiq ca'naih dòih,
loq tàng con jao dèh tì ca mangai enh gùng,
2Tàng con 'bìq hlòp dèh ca bàu khoi hùaq,
wa hlòp dèh ca bàu khoi anoi 'noh,
3Ô con, 'màng aih con khoi mùt ta tì mangai haten hatìa,
broq bìac cô wa dŏih cla beq: Paha'neq dađeh, xìn mangai haten hatìa aih beq;
4Paq am baiq toq mat con cùi,
loq canình mat con ca'nhip hlài;
5Dŏih claih dađeh tìah ca jìu ragiang claih enh tì mangai lam axan,
tìah ca chìm claih enh tì mangai bet rahoch.
6Ô mangai aroh, lam ngan hmŏch beq;
khòh hamrìh ngan trong caq ŏi da haq wa hŏc yŏc khôn rabiaq.
7'Nhac ca ùh i ca bùa,
craq gòm ngan, craq wèq cwìang,
8Haq xôq padon dahwèq caq jò mùa padrang,
chaq đòiq ca dađeh dahwèq caq jò mùa gat 'mau.
9Ô mangai aroh, ìh ca'nùng cùi trùh jò leq hòm?
Jò leq ìh rìu enh cùi?
10Cùi mòiq rahyàc, ca'nhip mat mòiq rahyàc,
cwat bao ca'nùng mòiq rahyàc.
11Èh bìac pa jah trùh ca ìh tìah ca mangai atùng,
wa bìac thìuq tìah ca mangai atùng wê ranac tajêh ca ìh.
12Mangai hadrùq hadriang, mangai ngang dù, aih mangai 'màng leq?
Wì haq rìh caq i bàu loq 'nùt amòng.
13Haq cachìac mat, jôiq jènh,
wa yŏc hadrang tì pa'noh teo;
14Ta manoh haq i bìac amùa amech;
haq tình ca broq dù yôt yôt, wa rai 'noh bìac ta'miaq.
15Taiq nen aih, can ranàc trùh ca haq da'ngàc;
ta mòiq 'mang raq haq 'bìq raliang, pi i ca trong jah dèch dŏih haq.
16I tadràu bìac Chuaq git,
wa tapèh bìac Haq ramòt:
17Mat loq catèh, rapet loq amòng,
tì ta-ùc mahem mangai ùh i ca tôiq;
18Manoh tình ca broq trong dù,
jènh cadàu renh trùh ta bìac dù,
19Mangai anoi hlài 'nùt wa capoch amòng,
mangai rai 'noh bìac ta'miaq ŏi ta oh daq.
Pariaq Wia Claih Ca Gu Cadrì Tango Anang
20Ô con, wèq bàu thê da baq beq,
paq cađac bàu hnài da miq con.
21Achìh đòiq haq ta manoh con hloi hloi,
wa bac haq ti ranŏng con.
22Jò con lam, bàu aih jah 'nong con; jò con cùi, haq wèq con;
wa jò con rìu, haq capoch tùang ca con.
23Ma jah 'màng aih bàu thê aih đen, bàu hnài aih can 'ngah,
wa bìac baxa hnài đòiq pariaq hnài, aih trong can rìh.
24Đòiq wèq con claih ca mangai cadrì ngang dù,
wa claih ca rapet pađôm da gu cadrì tango anang.
25Manoh con paq ham ca can lem lình haq enh gùng,
paq đòiq mat haq rùp yŏc con.
26Ma jah 'mang aih gù cadrì tango anang broq ca mangai calô toq ŏi i mòiq ha'nech 'benh raq;
gu cadrì tango anang broq hnhung ca can rìh haq.
27I mangai calô leq jah đòiq ùnh mùt ta achong,
ma eo quàn haq ùh cheo 'mòh?
28Loq i mangai jah cadiang lam ta ngia ùnh hi jènh haq ùh padŏc 'mòh?
29Mangai leq lam trùh ta mai mangai haten ca haq hadai 'màng aih;
mangai leq đùng trùh haq ùh claih ca 'bìq baxa.
30Wì ùh khìn mangai atùng,
tàng haq atùng caq taiq haq pangot;
31Mahaq tàng haq 'bìq rùp, haq ep đèn hlài tapèh yàng;
loq phai 'noh dìq cùng hang da hnem haq.
32Mangai leq broq tôiq tango anang ca gu cadrì, aih mangai pi i ca manoh loq 'nì;
cabô broq 'màng aih jah broq ca dađeh 'bìq raliang đac.
33Mangai aih 'bìq habau wa 'bìq khìn,
bìac camaih haq ùh jah bahnhung;
34Taiq bìac tarènh, broq ca mangai ŏng nòih dìq jaq;
ta hì tabroq chao, haq pi xa-ŏch toq xìt leq;
35Haq ùh chìuq nhàn 'nhac ca am bàc 'bac,
'nhac ca am toq leq haq xôq ùh waq.