Bàu Pariaq Wa Bàu Pa'yèp
1Apaq catèh ca hì da èh;
taiq ìh ùh loq ca hì da èh glàm bìac cleq.
2Đòiq mangai 'noiq manè padèch ìh, hacùng ìh ùh khòh doi.
Đòiq mangai enh gùng padèch ìh, blìa hacùng ìh paq capoch.
3Hmu trap, braih hadai trap;
mahaq can nòih da mangai blùng yi trap ca baiq hiniq aih.
4Bìac nòih pagah hùng hang, wa can nòih tìah ca diac halùih loh;
mahaq cabô yòng nui ŏi jang ngìa bìac git tarènh?
5Mòiq nà bàu tagàih lech paro,
yi hnao ca can loq waq cadoc hlèp.
6Bua lem broq loh habau,
yi hnao ca 'bài hìp 'nùt da mangai git.
7Mangai panàc khìn đac diac xùt;
mahaq ca mangai pangot, xang xô loh nhim.
8Mangai manhaq hangai dèh ca nòi ŏi,
tìah ca chìm pan ta cô ta tau hangai dèh ca pù.
9Dàu wa jreo thùm broq manoh bùi;
bàu pariaq loh enh manoh bua hadai èm ai 'màng aih.
10Apaq cađac bua ìh, loq bua baq ìh;
ta hì ranàc paq lam trùh ta hnem oh daq da ìh:
mangai tamoi broi ŏi haten mahaq mòiq manoh, yi hnao ca oh daq ŏi hangai.
11Ô con au, phai khôn rabiaq oq, wa broq bùi manoh au oq,
đòiq au jah tèo hlài mangai broq ca au camaih.
12Mangai wèq dèh manoh hèm hnoq adroi bìac ranàc,
haq jah lam mot; mahaq mangai blùng glàm mùt wa pòq bìac ranàc.
13Yŏc eo da mangai yòng pagàu thai am ca mangai tamoi,
èh padràng hlài haq tiaq ngè baxon, yi nhet hòm taiq aih mangai gu cadrì tango anang.
14Tàng mangai leq rìu xrŏih, dêh bàu waiq xôq ramŏt dèh ca bua,
bàu waiq xôq ramŏt aih jah doi, aih bàu waiq hanip.
15Mòiq ngai gu cadrì loq rahen yôt yôt,
aih tìah ca diac mè yôt yôt catôh ta hnem.
16Cabô enh tàt haq, ùh crài ca tàt cayeo,
wa tìah ca tì pah 'ma cadop dàu.
17Mem calenh hin ca mem, hadai 'màng aih,
mangai calenh mangai.
18Cabô wèq long pŏc, jah caq plì aih;
wa mangai leq patìh dèh ca craq haq èh jah padèch.
19Hadrò ngan patô dèh hadrò ta diac 'màng leq,
manoh mangai ngan patô manoh mangai hadai 'màng aih.
20Mat mangai ngan ùh 'nì mech,
tìah ca can cachìt wa bìac raliang ùh jò leq loq hêq.
21Gŏc pai mem thù 'bac, tanùh ùnh thù wang;
mòiq ngai jah thù nhò bàu manè padèch haq.
22'Nhac ca ìh yŏc adrì pêh mangai blùng ta apao pajùm ca phi,
èh bìac blùng da haq xôq ùh wia khoi ca haq.
23Phai ran loq ca bìac calùh trìu da ìh beq,
wa lo wèq ngan calùh 'bo da ìh;
24Ma jah 'màng aih bìac padrŏng can ùh ŏi hloi hloi,
calôp bùa hadai ùh ŏi hloi hloi ta dìq 'nhòng.
25Jò nhat croh hnhung đac, nhat nga plôh,
wa wì gop yŏc cachiq ŏi ta bôi wang.
26Xàc trìu con đòiq am ca ìh broq eo cwàn,
wa bubi calô jah đòiq rŏt đùng taneh.
27Diac tôh bubi tàu ca ìh broq dahwèq caq,
ca mangai ta hnem ìh, wa đòiq ban hapŏng cadrì da ìh.