'Bài Xôq Ramŏt da Bìac Khôn Rabiaq
1Ma ùh xài bìac khôn rabiaq khoi creo,
wa bìac loq 'nì khoi hloh bàu 'mòh?
2Bìac khôn rabiaq yòng ti bôi 'bài nòi ha'nhèq,
ti trong ti 'bài halah pôn.
3Haten ti 'mang phôq, ti nòi mùt ta phôq,
jang ngìa 'mang phôq, bìac khôn rabiaq cachech dêh doi:
4Ô mangai, au creo ca pì,
wa bàu au tawìh ta con mangai!
5Ô mangai blùng, phai loq wèq dèh manoh hèm;
ô mangai ranhùa, phai loq bìac khôn rabiaq.
6Tamàng beq, cô au anoi bìac lem,
au pèh blìa hacùng hnài bìac lem jang.
7Taiq hacùng au capoch bàu joq 'nàng;
bìac ngang dù aih can ramòt ca blìa hacùng au.
8Rìm bàu enh hacùng au, dìq ta-atoq,
ta bàu aih ùh i ca bìac leq tagùt loq 'nùt.
9Dìq ro rang am ca mangai loq 'nì,
wa lem jang am ca mangai leq chaq jah bìac loq 'nì.
10Nhàn yŏc bìac au hnài pariaq, paq nhàn 'bac,
wa nhàn yŏc bìac 'nì loq, aih yi hnao ca wang;
11Taiq bìac khôn rabiaq i jaq yi hnao ca hmu anì canaq,
wa rìm ngè canaq dìq ùh jah achùa ca bìac khôn rabiaq.
12Au cô khôn rabiaq ŏi pajùm ti bìac wèq dèh manoh hèm; au
chaq jah bìac 'nì loq wa bìac loq hèm broq troq.
13Bìac crè yùq ca Chuaq aih git ca ngang dù;
au git bìac loq catèh rataoq, trong dù,
wa hacùng capoch lìq.
14Bìac tah bàu wa can khôn rabiaq ŏi pah au; can 'nì loq;
cwìang wèq dìq ŏi pah au.
15Nhò au, 'bài bùa wèq cwìang,
wa 'bài cwan càn 'noh pajaq bìac ta-atoq.
16Nhò au, 'bài cwan, mangai gù craq loq wèq cwìang,
dìq dŏng wì wèq cwìang ta-atoq.
17Au loq waq wì ma loq waq au,
mangai ti chaq au dìq ca manoh jah glàm au.
18Bìac padrŏng can wa bìac tìang 'bang dìq ŏi ta au;
padrŏng can wa bìac ta-atoq aih jah cajap dùnh.
19Riang plì au yi hnao ca wang, yi hnao hloi ca wang ma ùh alôn;
riang plì da au i lòiq yi hnao ca 'bac lem.
20Au lam ta trong ta-atoq,
ta 'bài trong lem jang,
21Đòiq am cùng hang ca 'bài mangai loq waq ca au,
wa broq halùih ca 'bài kho da wì haq.
22Chuaq khoi broq wìa au enh jò baxèm tiaq trong da Haq,
enh jò calah nèh, adroi ca rìm bìac Haq broq.
23Au khoi jah broq wìa adroi calah nèh,
adroi baxèm, adroi ca jò i plình crŏng taneh.
24Jò 'nhòq i ralùng jrùq,
jò diac tamŏc 'nhòq bình halùih, au khoi jah loh.
25Adroi ca jò i wang rôm,
wa adroi ca i 'bài go ha'nhèq, au khoi jah i.
26Adroi ca jò Chuaq broq crŏng taneh,
'bài đùng tamang wa blo taneh baxèm.
27Jò Boc Plình broq 'bài lòp plình,
wa 'nac đòiq teo dawenh ta diac raxìq ta plì taneh, i au ŏi ta aih.
28Jò Haq broq hagao 'bài lòp yùc ti 'nhèq,
wa broq xèm ca 'bài diac tamŏc ta ralùng jrùq cajap;
29Jò Haq pajaq acang ca diac raxìq
đòiq diac ùh hìaq làn cwa ca acang Haq ma pajaq,
wa jò Haq broq loh xèm plì taneh;
30Au ŏi ti Haq tìah ca thòq pagàu,
rìm hì Haq lem bùi ca au;
au hloi hloi lem bùi ŏi jang ngìa Haq;
31Au lem bùi ca plình crŏng taneh, plì taneh da Haq,
wa bùi manoh ca con caiq mangai.
32'Màng aih ô 'bài con, manàiq tamàng au oq;
cabô wèq trong hnài au jah i xôq ramŏt.
33Khòh dì tiaq bàu hnài, wa rìh tiaq khôn rabiaq,
paq hèt ca haq.
34Xôq ramŏt ca mangai leq loq tàng bàu au;
rìm hì ŏi gòm ti 'mang au, wa ŏi gòm ti jrang 'mang ta hnem au.
35Taiq mangai leq chaq hnoq au, jah i can rìh,
wa jah xôq ramŏt da Chuaq;
36Mahaq mangai leq broq tôiq tajraq hlài ca au, èh broq raliang ca dađeh;
dìq ca mangai git ca au, loq waq can cachìt.