Phatsula usikale mzuzu
1Mwanangu, napho ukadzilavya kuimirira deni ra mutu wanjina,
napho ukaahidi kuzamini mjeni,
2phahi ukadzihega na manenogo mwenye,
na ukadzifunga na kauliyo mwenye.
3Umanye phahi u tsini ya mamlaka ga mutu wanjina, na uchilonda kudziphatsula, henda hivi:
phiya upesi ukamrai akurichire.
4Usiriche ukagbwirwa ni usingizi,
wala kukuka.
5Phatsula upesi dza chiphala kula mikononi mwa muindza,
dza nyama wa mapha aphatsulavyo agbwirwapho ni muhego.
6We mvivu! Phiya ukalole tsungutsungu,
karirikane njiraze ili uphahe ikima.
7Tsungutsungu kana chilongozi,
afisa, wala mtawala.
8Ela anadziikira chakurya minga ya mwaka,
anadzikusanyira akiba siku za mavuno.
9We mvivu! Undalala ta rini?
Undalamuka rini kula usingizini?
10 Lala vichache, senukira vichache,
na kundza mikono magoni, udzioyeze!
11Ndipho uchiya undakugbwavukira dza mnyangʼanyi,
na kutsowa kundakpwedzera dza jaili.
12Mutu mui, mutu asiyefwaha chitu,
anadengereka na maneno ga ovyo.
13Nkufwinya dzitso kuakocheza anjina,
anahenda ishara na chigulu na kuoloha na chala.
14Moyowe mui, utunga mai,
chila aphiyapho anazula kondo.
15Kpwa ajili ya higo, mai gandamphaha gafula,
mara mwenga andalumizwa vibaya na kandaphola.
16Kuna vitu sita ambavyo vinamtsukiza Mwenyezi Mlungu,
ee, kamwi ni sabaa ambavyo wavimena:
17Mutu wa shobo,
lilimi rigombaro handzo,
mikono imwagayo milatso isiyo hatiya,
18Moyo utungao mipango mii,
magulu gazorerago kuhenda mai,
19Shaidi agombaye handzo
na ye aphandaye mbeyu ya ufyakatsi kahi za ndugu.
20Mwanangu, gbwira malagizo ga sowe,
wala usiriche mafundzo ga mayoo;
21Gaike moyoni chila mara,
gavwale mwako singoni.
22Gandakulongoza kpwenye njirazo,
gandakurinda ulalapho,
gandakushauri ulamukapho.
23Mana shariya hizi ni taa,
na mafundzo higa ni mwanga,
nako kuonywa na kutiywa adabu
ni njira ya uzima,
24Mafundzo higa gandakurinda na mchetu mui,
na manenoge ga kurusa.
25Usiaze unonowe mwako moyoni,
wala usikubali akuvwehe kpwa kukutsuphira nyusi.
26Malaya andakurehera uchiya,
mchetu mzindzi nkuindza maishago ambago ni ga samani.
27Dze, unaweza kuika moho chifuwani
na nguwozo zisiphye?
28Dze, unaweza kuvyoga makala ga moho
na nyayozo zisiphye?
29Ndivyo mutu alalaye mkpwaza myawe akalavyo,
yeyesi amgutaye mkpwaza myawe andatiywa adabu.
30Atu taabera sana muivi aiyapho
ili ause ndzala,
31ela achiphahikana andaripha kano sabaa,
tsona andaripha na malize zosi arizo nazo.
32Aziniye kana achili kamare,
ahendaye hivyo anaangamiza maishage mwenye.
33Andalumizwa na kuberwa,
waibu ndiouphaha taundafutika tse.
34Kpwani wivu wa mlume unamuhenda akale msiru sana,
anaphoriphiza chisasi kana mbazi.
35Kandakubali maripho gogosi,
wala kuhurizwa ni unji wa malu.