Misemo ya Selemani
1Hino ni misemo ya Selemani:
Mwana ariye na achili anahamira ise,
ela mwana achikala mzuzu anarehera sonono nine.
2Mali iphahikanayo na njira mbii taina baraka,
ela haki inativya mutu na chifo.
3Mwenyezi Mlungu karicha mwenye haki akale na ndzala,
ela tamaa za atu ayi kazimendze.
4Uvivu unareha uchiya,
mkpwono wa mutu mwenye chadi unatajirisha.
5Mwenye achili nkukusanya siku za mavuno,
ela mwana alalaye siku za mavuno nkureha waibu.
6Baraka nkukala chitswani pha mutu wa haki,
ela maneno ga mutu mui nkufwitsa mai.
7Mwenye haki andatambukirwa na mahendoge manono,
ela mutu mui andayalwa tsetsetse.
8Mwenye moyo wa achili andatii shariya,
ela azuzu adererekao maneno manji andaangamika.
9Aishiye maisha ga haki ana usalama,
na aishiye vii gakpwe gandamanywa.
10Afwinyiraye dzitso mutu andazula tabu,
ela mzuzu asiyetsambula maneno, andadziangamiza.
11Mromo wa mwenye haki nchisima cha uzima,
ela mromo wa mutu mui u tele jeuri.
12 Kuzirana kuna sababisha kuheha,
ela kumendzana kunasitiri makosa gosi.
13Maneno ga ikima gala mromoni mwa mwenye achili,
ela asiye achili andapigbwa fwimbo ya mongo.
14Atu enye ikima nkuika akiba ya marifwa,
ela azuzu nkudzigombera na kudzirehera tabu.
15Tajiri nkurindwa ni malize,
mgbwayi akagayiswa ni ugayiwe.
16Mshahara wa atu a haki ni maisha manono,
ela mapato ga atu ayi mwishowe ni kutiywa adabu kpwa sababu ya dambi.
17Akubaliye kuhenda adabu anaelekeya njira ya uzima,
ela iye aremaye kudemurirwa andaangamika.
18Mutu aziraye myawe chisiri-siri ni munafiki,
na akatiraye ni mzuzu.
19Phenye maneno manji taphakosekana dambi,
ela anayezuwiya mromowe ana achili.
20Maneno ga mwenye haki ni dza feza swafi,
ela achili ya mutu mui taina samani.
21Maneno ga enye haki ganafwaidi atu anji,
ela azuzu aolagbwa ni kukosa achili.
22Baraka za Mwenyezi Mlungu ndizo zinazotajirisha,
wala kareha sonono phamwenga nazo.
23Mpumbavu anafwahirwa ahendapho mai,
ela mwenye ikima nkufwahirwa ni ufahamu.
24Mutu mui achiogopha dzambo rindamfika,
ela ariazaro mwenye haki ndiro ndirohewa.
25Phuto rinaphotsupa atu ayi nkuphepheruswa,
ela enye haki andadumu hata kare na kare.
26Viratu vira digbwa rihendavyo gandzi menoni au mosi uawisavyo matsoni,
ndivyo mvivu alumizavyo achiomuandika kazi.
27Kumuogopha Mwenyezi Mlungu kunareha maisha mare,
ela maisha ga atu ayi gandafupishwa.
28Kuluphiro ra mwenye haki rinareha furaha,
ela tazamio ra atu ayi tarindakala.
29Mwenyezi Mlungu ni chimbiriro ra enye haki,
ela atu ayi nkuaangamiza.
30Enye haki taandangʼoka kula kpwenye tsi yao,
ela atu ayi taandasala bii.
31Mromo wa mwenye haki unafundza ikima,
ela lilimi ra mutu wa handzo rindakatwa.
32Miromo ya enye haki igomba maneno ganagofwaha,
ela miromo ya atu ayi inagomba machafu bahi.