Kuluphira Mlungu na moyoo wosi
1Mwanangu, usiyale mafundzo gangu,
ela gbwira malagizo gangu na moyoo wosi.
2Kpwa kukala zindakupha siku nyinji,
maisha mare na kpwenderera vinono katika mambogo gosi.
3Mendzwa na uaminifu usirichane nawe,
uvwale mwako singoni, uandike mwako moyoni.
4 Ndipho undakubalika na kutogolwa
mbere za Mwenyezi Mlungu na mbere za mwanadamu.
5Mkuluphire Mwenyezi Mlungu na moyoo wosi,
wala usiadamire achilizo mwenye;
6Chila uhendaro muadamire iye
naye andagolosa njirazo.
7 Usidzione kukala u mwerevu,
Muogophe Mwenyezi Mlungu na uriche kuhenda mai.
8Iyo indakala dawa mwako mwirini,
na chitu cha kutiya nguvu mifuphayo.
9Muishimu Mwenyezi Mlungu kpwa malizo,
na seemu ya mavuno ga kpwandza ga chila uphandacho.
10Uchihenda hivyo vitsagavyo vindakoterwa,
na simikiro zindaodzazwa uchi wa zabibu.
11 Mwanangu, Mwenyezi Mlungu achikutiya adabu ili kukulongoza vinono,
usigatsukurire madide, na achikukanya, usivundzike moyo.
12 Mana Mwenyezi Mlungu nkumtiya adabu ye ammendzaye
dza vyo baba amtiyavyo adabu mwanawe ammendzaye.
Unono wa ikima
13Baha mutu aphahaye ikima,
na mutu awezaye kuelewa.
14Ikima ni bora kuriko feza,
ina fwaida kuriko zahabu.
15Ikima ni bora kuriko mawe ga samani,
takuna chitu chochosi cha kuazika chinachoweza kulengana nayo.
16Indakupha maisha mare, utajiri na ishima.
17Njiraze ni nono,
zosi zinaelekea kpwenye amani.
18Ikima ni muhi wa uzima kpwa osi anaoiphaha,
ana baha osi anaogbwirana nayo.
19Kpwa ikima Mwenyezi Mlungu waika misingi ya dunia,
na kpwa ufahamu Mwenyezi Mlungu wadumisha dzulu mlunguni.
20Kpwa marifwage vilindi vya madzi vyatsembuka,
na maingu ganatweneza manena.
21Mwanangu, gbwira ikima na uhende achili,
usiviriche bii.
22Navyo vindakupha maisha manono,
dza mkpwufu uhendavyo singoyo ikakala nono.
23Ndipho undaweza kuphiya vyako kpwa usalama,
wala chigulucho tachindakpwala.
24Ulalapho, kundakala na hofu,
undaphaha usingizi mnono.
25Usiogophe tisho ra gafula,
wala shambulizi kula kpwa atu ayi.
26Kpwa mana Mwenyezi Mlungu andakala kuluphiroro,
andakuepusha usedze ukagbwirwa ni muhego.
27Usimlafye mutu alondaye msada,
ichikala una uwezo wa kuhenda hivyo.
28Usimuambire jiranio,
“Phiya wedze muhondo, nindakpwedza nkuphe,”
ichikala cho chitu unacho phapho.
29Usipange mai dzulu ya jiranio,
anayeishi phephi nawe vinono bila wasiwasi.
30Usihehe na mutu bila chisa,
ichikala kadzangbwekuhendera uyi wowosi.
31Usimuonere wivu mutu wa fujo,
wala usiige mwendowe.
32Mana atu ayi ntsukizo kpwa Mwenyezi Mlungu,
ela ye nkuamini atu ambao njira zao zagoloka.
33Mwenyezi Mlungu anaapiza nyumba za atu ai,
ela anabariki za enye haki.
34 Iye nkubera enye chibero,
ela nkuonera mbazi a pole.
35Enye ikima andavuna ishima,
ela azuzu andaifiwa.