1Sinpangan na, binata ni ĀPO di Moyses a kāna, “Mangay ka na di Paraon, kan ibahey mo dya a kon mo, ‘Nyaw bata ni ĀPO a kāna, “Palabōsan mo sa komaro tawotawo kwaya tan maidāyaw da yaken. 2An baywan mo sa komaro, mapantad ako so āro a tokak a mangdidigra so intīrwaya nasyon mo. 3Mapnonchiw oksongaw a Nile so tokak. Makaraya sanchi a mangasdep so palasyo mo kan aran do kwarto mo, as kan do pakaychehan mo. Mangasdep sanchi do bahabahay dan opisyalis mo saw kan siraw tawotawo mo, as kan aran do panotongan mo saw kan do pagmasāan mo saw so tināpay. 4On, lagtohen danchimo no tokak saw kan siraw tawotawo mo kontodo tabo opisyalis mo.” ’ ”

5Sinpangan na, binata ni ĀPO di Moyses a kāna, “Ibahey mo di Aaron, a kon mo, ‘Ilāyat mo igpet mwaya a sarokod do ok-oksong saya, siraw kanal saya, kan ahbeng saya tan mapakaraya siras tokak saw do tana a Egipto.’ ”

6Dawa, inlāyat ni Aaron sarokod naw do hapotayan ranom saya do Egipto, kan nakaraya saw tokak saw kan winarasan daw intīro a tana a Egipto. 7Ki siraw magmadmādyik saw, ki tinōlad da met a yapo do madyik da. On, nakapamarin sa so tokak saw a nakaraya do tana a Egipto.

8Do dāwri, pinatawag ni Paraon sa Moyses kan Aaron, kan binata na a kāna, “Paydasal nyo di ĀPO tan pakarohen na saw nya tokak do yanan kwaya kan tawotawo ko saya, as palobōsan ko na saw tawotawo nyowaya a mangay a mangidāton so binyay da saw di ĀPO.”

9Ki binata ni Moyses di Paraon a kāna, “Itoroh ko dyimo pammadāyaw a mangikeddeng so ōras a kaidasal ko dyimo kan siraw opisyalis mo saya kontodo tawotawo mo saya tan inyo kan bahay nyo saya, ki karwan daranan tokak saya malaksid dyirad myan dana saya do oksong a Nile.”

10Binata ni Paraon a kāna, “Namna, anchan delak dana ah.”

Initbay ni Moyses a kāna, “Sigi, maparin a akmas binata mwaya tan matonngan mo a aba polos iyaw akmas ĀPO a Dyos namen. 11On, karwan danchimo no tokak saya, bahabahay mo, opisyalis mo saya, kan tawotawo mo saya. Omyan dana sanchi lang do oksong a Nile.”

12Do nakakaro daranaw da Moyses kan Aaron di Paraon, sipapasnek si Moyses a nangdaw di ĀPO a pakarohen na saw tokakaw a pinasabat na di Paraon. 13Pinarin ni ĀPO iyaw inyahesaw ni Moyses. Oyod nadiman saw tokak saw a myan do irahem no bahabahay, do atat saw, kan do bengkag saw. 14Chinpeh da sa no taga Egipto saw nadiman saw a tokak kan namonmonton, as kan nangyobek do tana no Egipto. 15Ki do nakaboyaw ni Paraon a maganay danaw kayayan da, pinatwa naranaw pōso na, kan inadngey na pa saba sa Moyses kan Aaron a akmas binataw ni ĀPO.

16Sinpangan na, binata ni ĀPO di Moyses a kāna, “Ibahey mo di Aaron a kon mo, ‘Ilāyat mo sarokod mwaya, as kaibāot mo sya do tanaya tan mayparin anchi a kanyit ahbek saya do tanaya do intīro a tana a Egipto.’ ” 17Pinarin da Moyses kan Aaron binataw ni ĀPO. Do nakailāyataw ni Aaron so sarokod naw kan inbāot na do tanaw, tabo saw ahbek do intīro a tana a Egipto, ki nayparin a kanyit, kan nachikolkol sa do tawotawo kan siraw binyay saw. 18Ki do nakapādas daw sya no magmadmādyik saw ni Paraon so mamarin so kanyit sigon do madyik da, naparin daba. Dawa, myan saw kanyit a nachikolkol do tawotawo kan siraw binyay saw.

19Do dāwri, binata dan magmadmādyik saw di Paraon a kon da, “Oy! Samna! Kaparin dana no kakamay no Dyos nyaya.” Ki alit na matwaw pōso ni Paraon, kan inadngey na saba sa Moyses kan Aaron a akmas binataw ni ĀPO.

20Sinpangan na, binata ni ĀPO di Moyses a kāna, “Masāpa kanchi a maybangon an delak, kan yangay mo a bayaten si Paraon anchan mosbos do oksongaw, kan batahen mo dya a kon mo, ‘Nyaw bata ni ĀPO a kāna, “Palobōsan mo sa komaro tawotawo kwaya tan maidāyaw da yaken. 21An dyi mo sa palobōsan a komaro tawotawo kwaya, manoboy ako so mapangepangen a nīsep a mangay dyimo kan siraw opisyalis mo saw, siraw tawotawo mo, kan do irahem no bahabahay mo. Siranchiw bahabahay daw no taga Egipto saw, ki aribongbongan danchi no nīsep kan aran dīno do tana daw. 22Ki do dāwrinchi a araw, padichanen konchiw tanaw a Gosen a iyaw yanan daw no tawotawo ko. Abanchiw pangen saw no nīsep do dawri a yanan tan mapatakan nyonchi a yaken a ĀPO, ki myan do dya a tana. 23On, paytarken ko sanchiw tawotawo kwaya kan tawotawo mo saya. As iyaw nya pangilasīnan, ki maparin anchan delak.” ’ ”

24Oyod a pinarin ĀPO nyaya. Pinangepangen a nīsep omnaribongbong do palasyowaw ni Paraon kan do bahay da saw no opisyalis naw, as kan do intīro a tana no Egipto, ki narārayaw maynamot do nīsep.

25Do dāwri, pinatawag ni Paraon sa Moyses kan Aaron, as nakabata na sya dyira a kāna, “Ngay, may kamo a mangidāton do Dyos nyowaya do dya tana.”

26Ki tinbay ni Moyses a kāna, “Namna, kosto abaw nawri, ta siraw idāton namen a binyay di ĀPO a Dyos namen, ki chababa dan taga Egipto. An parinen namen komwan a maboya da, ay samna, oboren da paro aba yamen? 27Machita a manakey kami so tatdo a karaw a komwan do let-ang a mangidāton so binyay saw di ĀPO a Dyos namen a akmas inbilin naw dyamen.”

28Ki tominbay si Paraon a kāna, “Sigi, palobōsan koynyo a mangay a mangidāton so binyay saw di ĀPO a Dyos nyo do let-ang, ki makateng kamo aba ah. Changori, paydasal nyo yaken.”

29Ki tominbay si Moyses a kāna, “Basta nakakaro ako na, maydasal ako di ĀPO tan anchan delak karwan daymo no mapangepangen saw a nīsep kontodo opisyalis mo saya kan siraw tawotawo mo saya. Ki syirtwen mo ah a dyi mo yamen a allilāwen dana mirwa, kan dyi mo na sa palobōsan tawotawowaya mangay a mangidāton so binyay saw di ĀPO.”

30Katayoka no nya, kinarwan Moyses si Paraon, as kan naydasal di ĀPO. 31Pinarin ni ĀPO pinaydasalaw ni Moyses. Inabo naw pangen saw a nīsep do yanan da Paraon kontodo opisyalis na saw kan tawotawo na saw. Abaw aran asa natokos a nīsep. 32Ki aran do dyaya, alit na pinatwa ni Paraon pōso naw, kan pinalobōsan na saba komaro tawotawo saw.