1Binata ni ĀPO di Moyses a kāna, 2“Itatārek mo sa a dyaken tabo matotoneng a mahahakay. On, siraw matotoneng saw a mahahakay a Israelita mana binyay, ki dyira ko.”

3Sinpangan na, binata ni Moyses dyirad tawotawo saw a kāna, “Naknakmen nyo nyaya araw, ki araw a nakaikaro nyo a yapo do Egipto. On, nakaikaro nyo do tana a nakaadīpenan nyo maynamot ta inkaro naynyo ni ĀPO a yapo do panakabalin na. Dawa, koman kamo aba so tināpay a myan so yapo.* 4As sicharaw do bohan Abib, ki komaro kamo na. 5Anchan yangay naynyo ni ĀPO do tana daw no Kananeo, Heteo, Amoreo, Hibeo, kan Jeboseo a insapata na dyirad kapoonan nyo saw a itoroh na dyinyo iyaw tanaw a mataba kan maasi, ki machita a silibraren nyonchiw nyaya a pista do dyaya a bohan. 6Do irahem no papito a karaw, ki koman kamo so tināpay a dya napangayan so yapo. As do chapapito naw anchi a araw, ki pistaan nyo si ĀPO. 7On, koman kamonchi so tināpay a abos yapo do irahem no nawri a papito a karaw. Machita a abaw tināpay a myan so yapo mana yapo a masarakan do tābo a tana nyo. 8Do dāwrinchi a araw, ilawlawag nyo dyirad anak nyo saw a parinen nyo nya a maynamot do pinarin ni ĀPO dyinyo do nakaikaro nyowaw do Egipto. 9Iyaw pariparinen no nyaya pista, ki akmanchiw sinyal do tanoro nyo kan pakanaknakman do moyen nyo† tan iyaw linteg ni ĀPO, ki myan pakono do dangoy nyo. Ta si ĀPO, ki inkaro naynyo do Egipto maynamot do panakabalin na. 10Machita a tongpalen nyo nya pangeddeng do naikeddeng a chimpo a tinawen.”‡

11Binata pa ni Moyses a kāna, “Yangay nanchi inyo ni ĀPO do tana daw no Kananeo a iyaw insapata naw a itoroh dyirad kapoonan nyo saw kan inyo. Anchan itoroh na dyinyo nawri a tana, 12machita patarken nyonchi a dyira ni ĀPO tabo a matotoneng a mahahakay kontodo matotoneng a malloko a binyay nyo. Ta tabo matoneng, ki dyira ni ĀPO. 13Kāda matoneng a malloko no asno nyo, patādyan nyo so orbon karniro a nawriw idāton nyo a pangsobbot sya. Ki an dyi nyo a masobbot, pototen nyo lagaw naw. As kāda matoneng a mahahakay nyo, machita a myan pangsobbot nyo sya di ĀPO.

14“Do masakbayan sanchi a araw, anchan yahes dan anak nyo saw a kon da, ‘Āngo chakey a batahen nyaya?’ ibahey nyonchi dyira a, ‘Maynamot do panakabalin ni ĀPO, inkaro na yamen a yapo do Egipto a tana a nakaadīpenan namen.’ 15Ta do taywara a kaskeh a mangpalōbos dyamen ni Paraon a komaro, ki diniman ni ĀPO tabo matoneng a mahahakay a tawo kan binyay do tana a Egipto. Dawa, idāton ta di ĀPO tabo matoneng a mahahakay, ki sobboten ta saw matotonengaya anak a mahahakay do kapangidāton ta so orbon a karniro. 16As kan iyaw nyaya, ki akmanchiw sinyal do tanoro nyo kan do moyen nyo, ta si ĀPO, ki inkaro na yaten do Egipto do panakabalin na.”

17Do nakapalōbosaw ni Paraon siras Israelitaw a komnaro, pinalongo saba ni Āpo Dyos do rarahanaw a magkelsat do tana dan Pilisteo a aran masngesngen. Ta binata ni Āpo Dyos a kāna, “An somalap sa do gobat, āngwan manādiw kapangtokto da as maybidi sa do Egipto.” 18As dawa, pinalongo san Āpo Dyos tawotawowaw a naglīkaw do rarahanaw do let-ang a komwan do Mabaya a Tāw. Siaarmas saw Israelitaw a komnaro do Egipto a para do gobat.

19Pinanawbi ni Moyses tohatohangaw ni Jose maynamot ta pinagsapata sa ni Jose siraw kapotōtan ni Israel do kachwaw a komwan parinen da. Binata ni Jose do kasibibyay na paw a kāna, “Masigorādo a sidongan nanchi inyo ni Āpo Dyos. Do dāwrinchi, panawbi nyonchiw tohatohang ko anchan komaro kamo do dya a yanan.”§

20Do nakakaro daw do Sokkot, nagkampo sa do Etam do payisaw no let-ang. 21Indaōlwan sa ni ĀPO do māraw maynamot do tominnekaw a demdem a akmay plastar no toroso a parey a ononotan da. As an mahep myan tominnek a apoy a akmaw parey a mangsēdang sira tan komwan maparin daw mayam a māraw mana mahep. 22Nāw na do paypakwanan daw tominnekaw a demdem do māraw kan iyaw tominnekaw a apoy do mahep.