1Chinpeh ni Moyses tabo tawotawo no Israel, as nakaibahey na sya dyira a kāna, “Siraw nyaw inbilin ni ĀPO a parinen nyo: 2Myan anem a karaw a kapaytarabāko nyo, ki do chapapito naw a karaw, ki masantwan a araw dyinyo a iyaw Araw a Kapaynaynahah a para di ĀPO. Aran sino a maytarabāko so aran āngo do dyaya araw, ki machita a maipadiman. 3Mamyay kamo aba so apoy do irahem no aran āngo a bahay nyo do Araw a Kapaynaynahah.”

4Binata ni Moyses dyirad tabo tawotawo no Israel a kāna, “Nyaw inbilin ni ĀPO: 5Mangyangay kamo so or-or di ĀPO. Kāda madādam a manoroh, ki magor-or so balitok, pirak, kan tombāga; 6mabondal a bolabola a matatarek so kīta a asol, obi kan mabaya, kan mapīno a tela; boboh no kalding; 7lālat no malloko a karniro a napanyibaya; lālat no lombalomba;* kayo no akasya; 8lana a olibo a para dyirad paysohwan saw; bangbanglo a mailaok do lanaw a para pasanto kan para do mabanglo a insinso; 9mapapateg saw a bato a onyks, kan kadwan pa saw a masileng a bato a mapangay do laylayaw no matohosaw a pādi a mayngaran so epod kan do pangbarōkong naw.”

10“Tabo a sanay a myan dyinyo, ki siraw mangay a mamarin siras nya tabo a inbilin ni ĀPO: 11iyaw tabirnakolwaw magrāman toldaw kan siraw panalob naw, sasadyit saw kan parey na saw, sintas saw, parey saw kontodo pangsapatos da saw; 12iyaw Lakāsanaw no Tōlag magrāman iisiw na saw, kan iyaw tohong no pachipakawananaw so gatos, kan kortinaw a lilibeng na. 13Mamarin sa pa so lamisaan magrāman iisiw na saw, kan tabo rimīnta na kan tināpayaw a maidāton do Dyos; 14iyaw pamadatōkanaw so soho magrāman tabo rimīnta na saw, siraw soho saw kan lana da saw; 15iyaw altaraw a paysosohan so insinso magrāman iisiw na saw, lanaw a mangpasanto kan mabanglwaw a insinso, iyaw kortinaw para do asdepanaw do tabirnakolwaw; 16iyaw altaraw a paysosohan so dāton magrāman tombāga a raratag na, siraw iisiw naw, kan tabo rimīnta na, paylablabanaw kan dadātok naw; 17siraw kortinaw do atat magrāman parey da saw kan sapatos da saw, iyaw kortinaw para do asdepanaw no atataw; 18pāsok saw no tabirnakolwaw kan pāsok saw no atataw, kan hobid da saw; 19siraw naabel saw a laylay a mapaylaylay do kapagsīrbi do masantwanaw a yanan, pachiramānan dan masantwan saw a laylay a para di Aaron a pādi kan siraw laylay da saw no pōtot na saw do kapagsīrbi da a pādi.”

20Sinpangan na, komnaro sa tabo Israelitaw do salapenaw ni Moyses. 21Do dāwri, kāda tawo a madādam kan kāda tawo a nasalid so pōso, ki nangyangay so or-or na di ĀPO a maosar para do Toldaw a Pachibayabayatan, para do tabo kapagdaydāyaw, kan para dyirad masantwanaw a laylay dan papādi. 22Tabo saw nasalidaw so pōso a mahahakay kan mababakes, nangyangay sa so āro a matatarek a kīta no alāhas a balitok. Intoroh da sa tabo nyaya balitok a para do dāton a kapangitangkayag di ĀPO. 23As kāda asa a myan so mabondal a bolabola a matatarek so kīta a asol, obi mana mabaya, mana mapīno a tela, mana boboh no kalding, mana lālat no malloko a karniro a napanyibaya, mana lālat no lombalomba, ki inyangay da. 24Tabo a makaor-or so pirak mana tombāga, inyangay da a dāton di ĀPO. Masaw tabo a myan so kayo a akasya a maparin a maosar do tarabāko daw, ki inyangay da. 25As tabo a mababakes a sanay a mamarin so mabondal a bolabola, inyangay daw naparin daw a asol, obi mana mabaya so kīta, kan mapīno a tela. 26Masaw tabo mababakes a sanay a nasalid so pōso, ki namarin sa so bolabola a yapo do boboh no kalding. 27Siraw pangpangōlo da saw, ki nangyangay sa so mapapateg saw a bato a onyks kan kadwan pa saw a masileng a bato a maikolimas do laylayaw no matohosaw a pādi a mayngaran so epod kan do pangbarōkong naw. 28Nangyangay sa pa so bangbanglo kan lana a para dyirad paysohwan saw, as kan lanaw a mangpasanto† kan para do mabanglo a insinso. 29Tabo sa no Israelitaw, mahahakay kan mababakes a nasalid so pōso, nangyangay sa so or-or da di ĀPO. Libri sa a nanoroh sigon do kadādam da a para do tabo tarabāko a inbilin ni ĀPO di Moyses.

30Sinpangan na, binata ni Moyses dyirad Israelita saw a kāna, “Chiban nyo. Pinidi ni ĀPO si Besalel a pōtot ni Ori kan apoko ni Hor a yapo do trībo no Joda. 31Inapno na so Ispirito no Dyos tan myan so kabaelan, kapakaāwat, kan kapakatoneng do tabo kīta no kapangar-arti. 32Makaar-arti so mapipintas, kan kāya na a parinen do pirak, balitok, kan tombāga. 33Masaw a makapōtar kan makaikolimas so bato, makakitikit so kayo, kan tabo a kīta no ar-arti. 34Insāgot ni ĀPO dya kan di Oholiab a pōtot ni Ahisamak a yapo do trībo no Dan iyaw kabaelan da a mangnanawo so kapangar-arti do kadwan. 35Inapno na sa so kabaelan tan makaparin sa so tabo a kīta no tarabāko a mangar-arti, mangkitikit, mangborda a yapo do mabondal a bolabola a matatarek so kīta a asol, obi kan mabaya do mapino a tela, kan maglaglaga. Kayangkāya da tabo kapangar-arti.”