Nan Hapit Apo Dios

Nan Kanta an Waday Nipa"elana
1Donglonyu ta ikantaa' nan engha'
an waday intanomnah greyp hinan ma'allumong an duntug.
2At binu'ayna ta nun'aanay batu,
ya tinammanah nan pinilinan mun'aphod an greyp.
Ya impiyammanay pa"ata'nang an abung an pun'adugan hinan way gagwana,
ya numpa'amma goh hi pun'apalanah di.
At unna mahkay hodon di malum hi bungada,
mu hidin nun'alumda ya umalinu.
3At inalin din engha' di,
“Da'yun iJudah an namaman da'yun iJerusalem
ya ibaagyuy dumalat ta umat hinay imbungan nan intanom'u.
4Hay ngadan nin di agguy'u inat hinan intanom'u ta numbalin hi umalinu?
Ya wan hay namnamao' ahan ya munlameeh!
5At hay ato' ya pun'aan'un amin di luhad nan intanom'un greyp,
ya numpa"i' di allupna ta umuydah diy animal,
ya nun'igatinda ta mun'apa"i.
6Ya ingnganuy'uh den intanom'u ta mumbalin hi inalahan
an hay holo' ya hubit di dumo'ol hidi.
Ya adi' iyabulut di alian di bunut ta mi'id di umudananah di.”
7Ya hay nipaddungan nan intanom nan nidugah di abalinanan Dios
ya ditu'un holag Israel an gunna impapto'.
Ya ditu'un iJudah an namnamaonay ibunga tu'uh maphod an pangat tu'uh i'ibba tu'u
di numbalin at goh hi un hay pumatpatoy.
At nan namnamaonan nepto' an pangat tu'uh i'ibba tu'un tatagu,
ya un at goh hay pumpahpahmo'an nan paligligaton tu'uy dodonglona an Dios!
Hay Moltan nan iJudah an Nun'appuhiy Pangatda
8Mahmo' ayun tatagun gun pumla' hi luta ya abung
hinan nun'eheggon hinan lutayu ya abungyu
ta la'tot ya mi'id di heneggonyu
ta da'yu ya anggay di mihinah nan gagwan nan ambilog an lutayu!
9Ya dengngol'u nan hinapit Apo Dios an nidugah di abalinanan inalinay,
“Immannung an pumbalino' hi mi'id di hulbina
nan mun'aphod ya o"ongol an a'abung ti mi'id di mumpunhituh di.
10Ya nan ambilog an nun'atamman hi greyp
ya un lemay galon ya anggay hi ma'inum hi pumbalinan di ma'alah di.
Ya nan himpulun halub an oho'
ya un hinhalub ya anggay di ma'ala.”
11At mahmo' ayu ahan an bumuwabuwah an bumangon
an un hay inum di iyabangunanyuh engganah un mahdom
ti engganay un ayu ma'abbutong.
12Ya manu kogoh ti nan a'am'amunganyu ay an pun'am'amlonganyu ya idadaanyuy ma'an ya ma'inum,
ya manu ti muntukal ayuh alpa, ya lyre, ya tambourines, ya nan tungngali.
Mu adiyu ahan pi'nomnom nan ina'inat Apo Dios,
ya mid ahan pange'gonyun Hiya!
13At hiyanan ditu'un tatagun Apo Dios ya iyuy ditu'uh nan buhul hi udum an babluy,
at ta"on hi un nan a'ap'apu ya matoydah hinaangda,
ya ado'lan ay ditu'uy mun'atoy hi inuwawda.
14At nan lubu' ya umambilog
ta way ilubu'an di adadangyan hitun ad Jerusalem
ya nan do'ol an tatagun humehel.
15At mabainan tu'un amin,
ya mipa'ampa nan mumpahiya.
16Mu nan nidugah di abalinanan Dios ya imannung an midaydayaw
an dumalat nan nahamad an atonan mangipanuh hi tatagu.
17At hay pumbalinan ten babluy mahkay ya matawan
ta way panganan di kalnilu ya gandeng.
18At mahmo' ayun tatagun
manginaynayun hinan nun'appuhin ato'atonyu.
19Ya da'yun mangali goh udot hi,
“Mu ta ginalon ya nunnaudon at udot Apo Dios an dayawonmin holag Israel
an aton nan ninomnomnan aton ta tigonmi!”
20Ya mahmo' ayun nahuhunniy nomnomnan mangalih un maphod nan nibahhaw,
ya mangalih un maphod nan nappuhi.
At nan helong ya alyonyuh un mapatal,
ya nan mapatal hi helong.
Ya nan mumpait ya alyonyuh un munlameeh,
ya nan munlameeh ya alyonyuh un mumpait.
21Ya umat goh ay da'yun hay punnomnomyuh odolyu
ya nanomnoman ya nala'eng,
22ya da'yun nundongol an ma'innum hi bayah,
ya da'yu goh an nala'eng an mun'ammah ma'inum,
23ya da'yun nibahhaw di pangipanuhnah nan tatagun
dumalat hi numbayadanyuh nan numbahol
ya numbalinonyu nan mi'id di baholnah numbahol.
24At hiyanan mipaddung ayuh dagamin namaganan an mapuulan,
ya umat ayu goh hinan holo' an matano' di lamutda ya na'leng di habungda
ta mun'iyaddibdan ayda hupu'.
Ti pahiwonyun mangunud hinan inyuldin Apo Dios an nidugah di abalinana
an nan me'gonan an Dios ad Israel.
25At nidugah di bungot Apo Dios ay ditu'un tataguna,
at nundadaan an mummoltan ditu'u!
At umalyog nan duntug ta mun'a'atoy tu'un tataguna
ta mun'iwa'at hinan kalatay odol tu'un umat hinan galut.
Mu adi damdama ma'aan di bohol Apo Dios ay ditu'u.
26At ayagana goh nan buhul tu'uh nan nun'iyadagwin babluy
ta himbumagga ya immalidan mangubat ay ditu'u.
27Ya mi'id ah ohan didah mablay unu mida'leh,
ya adida idindinong ta mun'eblayda mah ni' unu molo'da.
Ya nihamad di balikisda ya hapatusda.
28Ya mun'atadom di panada,
at nidadaandan pumana.
Ya mun'abi'ah di kabayudan manguyud hinan kalesa an ayda tumayap.
29Ya nan tindaluda ya umatdah layon an humeel hi un way dempapnah animal,
at pundapap ditu'un tatagun Apo Dios,
ya nun'iyuy ditu'uh nan mi'id di mabalin hi mangibaliw ay ditu'u.
30Ya hitun dumatngan daten buhul ya nidugah an waday mumbungug hi madngol
an ay gongaah di danum hinan baybay.
At nomnomnomon tu'un nidugah di punlungdayaan tu'uh tud Judah.

*5:1 Heten engha an inalin Isaiah ya hi Apo Dios.

†5:1 Hay ipa"elna ya nan babluy ad Israel ya ad Judah (verse 7).

‡5:2 Hay kulugon nan udum ya hatun verses di nalpuwan nan nipa"el an inyulgud Jesus hi Mat. 21:33 ya Mk. 12:1.

§5:5 Hay nipaddungan nan atap an animal ya nan i'Assyria an buhul nan holag Israel an mama"id Jerusalem.

*5:6 Hin'umu'uddum ya adi ipa'alin Apo Dios di udan ta pummoltanah nan nangohoy an tataguna (Deut. 28:23-24; II Sam. 1:21; I Ki. 17:1).

†5:7 Nunhanul hi Isaiah an ta"on un adi umipakikiy hanulna ti nan hapit an nepto' hinan hapit di Hudyu ya mishpat, ya hinapitna ti henen hapit ya neheggon hi panapitdah nan hapit di Hudyu an mispah (unu pumatpatoy). Heten kalahin di hanul ya ma'alih pun hinan hapit di English. (Bahaom nan mehnod an footnote ya nan footnote di Isa. 10:6 ta innilaom di udumnan pohdonan ibaga.)

‡5:7 Impidwan Isaiah an nunhanul hi ma'alih pun ti nan hapit an pangat (unu sedaqah hinan hapit di Hudyu) ya neheggon hi panapitdah nan hapit an paligligaton (unu se'qah hinan hapit di Hudyu).

§5:8 Nan holag Israel ya mabalin an edondah lutan di i'ibbada, mu adi mabalin an pumla'da unu umepla'dah luta ti ginogodwada nan luta, at nepong an nipaboltan ay dida ta bagidah enggana (Num. 27:7-11; I Ki. 21:1-3).

*5:12 Hiyah ne it'ittang an alpa.

†5:19 Hinan Isa. 8:3 ya nginadnan Isaiah nan imbaluynan lala'i ta Maher-Shalal-Hash-Baz. Heten hapit an ginalon ya hash hinan hapit di Hudyu, ya hiyay miyatlun alimatung hinan ngadan nan imbaluy Isaiah an Maher-Shalal-Hash-Baz. Mid mapto' ya impingadanah ne ta mipanomnom ay didah nen nangalyanda.

‡5:19 Heten hapit an nunnaudon ya maher hinan hapit di Hudyu, ya hiyay nahhun an alimatung hinan ngadan nan imbaluy Isaiah an Maher-Shalal-Hash-Baz (bahaom nan footnote hi bagtuna).

§5:26 Daten buhulyu ya mabalin an nan i'Assyria an nangubat hi ad Israel ya ad Judah hidin 722 B.C. ya hidin 701 B.C. unu iBabylon an din nangubat hi ad Jerusalem hidin 605 B.C.