Nan Mangipadenol hinan Tatagun Apo Dios
1Hi Apo Dios ya inalinay,
“Al'alu'onyu ni' ahan nan tatagu'.
2At ephodyun ibagah nan wad Jerusalem an awniat malpah mahkay nan ipaligligatanda,
ya ma'aliwan mahkay di baholda ti nidugah di pummolta' ay didah nan numbaholanda.”
3Ya awniat waday umuy an manudtudu an it'u'it'u'nan alyonay,
“Idadaanyuh nan mapulun di owon nan Dios an dayawon tu'un holag Israel.
Ipaphodyu ta ma'andong hi dalanona.
4At paddungnay tababonyun amin di nun'aba"ungan,
ya nundotalonyun amin di duntug.
Ya andongonyu nan dalan an nun'apiku
ta maphod an ma'andong ya nundodottal nongkay.
5Ya mipa'innila mahkay di anabagbagtun Apo Dios ta tigon an amin di tatagu.
Hi Apu tu'uy nanimung an nangali ete.”
6Palpaliwan ya dengngol'u han hapit an inalinay, “Tum'u'a!”
Ya inali' di, “Hay it'u"u?”
Ya inalinay, “It'u'mun alyom di,
An amin di tatagu ya umat hi holo',
ya nan amaphodda ya umat hinan habhabung di holo' hinan punhabalan.
7Ti nan holo' ya malyaw,
ya nan habungda ya magahdan dumalat di dibdib an ipa'ali'.
Ya immannung an hay tagu ya mipaddung hinan aat di holo'.
8Ti nan holo' nongkay ya malyaw,
ya nan habhabung ya magahda,
mu nan Hapit'u ya munnananong hi enggana.”
9At ditu'un tatagun Apo Dios an umuy mangipa'innilah nan maphod an ulgud hinan i'ibba tu'un tatagud Jerusalem
ya umuy tu'uh nan ata'nang ahan an duntug,
ya enlo'enlot tu'un mangit'u' an adi' tu'u mun'og'ogon.
An alyon tu'uy,
“Wah tu nan Dios an dayawon tu'u!”
10Undan adiyu tigon nan na'abbagbagtun Dios an na'uy an nidugah di abalinanan mun'ap'apu?
Ya waday inta'inah idatnah nan tataguna.
11Ya halimunana nan tataguna
an umat hinan aton di mumpahtul hi kalniluh nan kalniluna.
An wa ayan inapupuna nan imbabaluy di kalnilu
ya ma'ma'ullay an mangitnud hinan pa'attungaw an kalnilu.
Hay Aid di Nipaddungan Apo Dios an Dayawon nan Holag Israel
12Undan waday way abalinanan munlukud hi danum hinan baybay an hay paladnay usalona?
Ya undan wada goh di way abalinanan munlukud hi inambilog ad daya?
Ya umat goh an mi'id di taguh nanginnilah damot tun luta ya nan numbino'ob'on an duntug.
13Ya undan way nanginnilah nomnom Apo Dios ta mabalin an itudunay atona?
14Ya umat goh an undan way numpatudtuduwan Apo Dios hinan nahamad an atona?
Ya undan way nanugun ay Hiya ta ma'awatanay ma'ma'at?
15Hay immannung ya mid hulbin di abablubabluy ay Apo Dios
ti umatdah nan hintidtid an danum ya nan itang ahan an hupu' hinan kiluan an mi'id di damotna.
Ya un man paddungnay hinggamal an hupu' nan do'ol an babluy hinan gagwan di baybay ay Hiya.
16An amin nan ayiw hinan inalahan ad Lebanon ya adi umanay
hi panunguh nan pun'onngan hi me'nong ay Apo Dios,
ya ta"on hi un nan animal hidi ya adi umdah me'nong hi Onong an Moghob.
17Hay pannig Apo Dios hi an amin an tataguh nan abablubabluy ya mi'id di niyatanda,
ya mi'id di hulbidan Hiya.
18At hay ngadan mah nin di pangipaddungan tu'un Apo Dios?
Mi'id ti na'i'innilan mi'id nongkay tuwaliy umat ay Hiya.
19Hiya ya adi umat hinan bulul an inyamman di tagu
an hay inyammada ya gumo',
ya inamyudandah balitu',
ya innal'altiandah silver an kanhel.
20At nan nawotwot ay ya mabalin an pilionay magangan ayiw,
ya inyuynah nan nala'eng an mumpa'ot hi bulul
ta nahamad an adi un itangan natu"in.
21Undan agguyyu inila unu dengdengngol nan hinapit Apo Dios
ya un malmu tun luta?
22Ti Hiya an inumbun hinan pumpapto'anah nan bagtun tun lutan
hay pannignah nan tataguh tun luta ya umatdah nan battat.
Ya ad daya ay ya Hiyay nangibe'lag ta ay kultina,
ya impaphodna ta umat hinan tuldan niyatap.
23Ya hanan a'ap'apuh tun luta ya mabalin an ipa'ampana dida,
at mi'id di hulbida.
24At mipaddungdah nan pa'itannom an wan ete"adan lumamut ya napuo',
at malyawda,
ya mun'iyaddibda an umatdah nan dugi.
25At hiyanan alyon nan me'gonan an Dios di,
“Mi'id di mabalin hi pangipaddunganyun Ha"in.
26Adya tangadonyud dayah nan mahdom ta tigonyu nan bittuan
ya undan hay inilayuh nunlumu ay dida?
Nan nunlumu ay danen numbino'ob'on an wad daya
ya inohha'ohhanan ngadnan dida,
ya dumalat nan nidugah an abalinana ya mi'id di ma'utaw ay dida.”
27At hiyanan ditu'un holag Israel ya adi tu'u alyon di agguy inilan Apo Dios nan pumpalpaligatan tu'u,
ya adi tu'u goh alyon hi un ditu'u inganuy.
28Ti undan agguyyu dengngol ya agguyyu inilan
hi Apo Dios ya Hiya nan munnananong hi enggana an nunlumuh tun luta.
Ya Hiya ya adi humiga,
ya adi mablay,
ya adi mabalin an ma'innilay nomnomnomona.
29Ya Hiyay mangidat hi bi'ah nan na"ablay
ya abalinan nan nakapuy.
30Ti ta"on hi un nan mumpangilog ya mabanbanollayda,
ya umat goh hinan ungungan linala'in ag'agadan lumungtuy,
31mu nan mange'kod ay Apo Dios ya bumi'ahda,
at umatdah nan agila an tumayapdah nan ata'nang.
At ta"on hi unda gun tagtagon ya adida mabmablay,
ya ta"on goh hi un adagwiy dalanonda ya adida lumungtuy.