Nan Pamhod Apo Dios hinan i'Israel
1Ya inalin Apo Dios di,
“Da'yun iJerusalem ya umat ayuh nan bahig an babai,
mu ad ugwan ya it'u'yuy umamlonganyun mungkanta.
Ti ta"on hi unyu agguy pinadah an immimbaluy
mu ad ugwan ya da'yuy do'do'ol di imbabaluyna ya un nan udumnan binabai!
2At ipa'ong'ongngolyu nan tuldan abungyu,
ya nunhu"upanyu nan hogwodna,
ya inhamadyuy pado'na.
3Ti umambilog di hakuponyuh nan napinpinangngel hinan appit hi agwan ya iggid,
ya hakuponyu nan numbino'ob'on an babluy an din hinakup nan udum an tatagu.
Ya ta"on hi un din nun'apa"in babluy ya mi'id ah nunhitu ya mababluyan.
4At adi ayu tuma'ot ti mi'id mahkay di abainanyu,
ya ipogpogyu an munnomnom hidin nabainanyuh a'ungayu
ya din numanomnomanyuh nunlungdayaanyu an ay ayu nabalu.
5Ti Ha"in an nunlumun da'yun paddungnay ahawayu
ya hay ngadan'u ya Dios an Nidugah di Abalinana
an Ha"in an Me'gonan ad Israel di Baliwyu.
Ya awniat Ha"in di dayawondan amin hinan babluy hitun luta.
6Ya umat ayuh nan babain pa"alhin an ingnganuy di ahawana,
at nidugah di punlungdayaanyu.
Mu Ha"in an Dios ya bangngado' da'yu
7an un na'amtang di nanginganuya' ay da'yu,
mu nidugah di homo"u,
ya ten bangngado' da'yu.
8Ti un na'amtang goh ya nidugah di bimmungta',
ya din'ug'u da'yu,
mu ten ipattig'un da'yu nan adi mapogpog an homo"u.
Ha"in an Dios an mamaliw ay da'yuy nanapit ete.
9Din gutud Noah ya intulag'u an adi' ipidpidwan lobngon tun luta,
at ad ugwan ya itulag'un adia' mahkay bumungot ay da'yu,
at adi' goh moltaon da'yu.
10Ya ta"on hi un miwogot nan aduntuduntug ya nun'a'ubah nan dudunduntug
mu nan pamhod'un da'yu ya minaynayun hi mid pogpogna.
Ya adi' al'alliwan hi enggana nan intulag'u an alenggopan
ti Ha"in an Dios an nammo' ay da'yuy nanapit ete.”
11Inalin goh Apo Dios di,
“Da'yun nunholholtap an mi'id ah mangal'alu'
ya ipaphod'u ta ipabangngad'uy babluyyun nun'apa"i
an hay nanginan batu an sapphires di paddungnay pamognad'u.
12Umat goh hinan abungyu an pun'adugan an hay iyamma' ya nan nanginan batu an ruby,
ya hay iyamma' hinan pantaw di allup nan babluyyu ya nan munletaa' an gumo',
ya hay iyamma' goh hinan allup di babluyyu ya nan udum goh an nun'abalul an batu.
13Ya ituduwa' ya wagaha' da'yun amin hina,
at pumhod ayun mid al'alin da'yu.
14Ya nan a'ap'apu an nepto' di pangatdan da'yuy dumalat hi pumhodanyu,
at mi'id mahkay di mangipaligligat ay da'yu,
ya mi'id goh di tumata'tanyu.
15Ya wada ay di umalin mangubat ay da'yu ya bo'on Ha"in di ad nomnom,
at abakonyu dida.
16Ti tigonyun undan bo'on Ha"in di nunlumuh nan mumbohal
an mangiyammah nan gina'un di mi'gubat?
Ya Ha"in goh di munlumuh nan mangusal hinan gina'un di mi'gubat.
17At mi'id almas hi amman di taguh manugat ay da'yu,
ya ta"on hi un way ipabaholdan da'yu ya abalinanyun tabolon.
Ti wagwada an nidadaan di pambalyu,
ya ibaliw'u da'yu an baal'u ta da'yuy pangabako'.
Ha"in an Dios di nanapit ete.”