ዓይኑሞ ሱኡጋሢ ዓይሣ ጎይፆ ዔዶታሜ ዛሎ ዓይናዺንቴ ዓሳኣፔ ዓይኑሞ
ሜቶፓ ቶላኒ ሺኢቂንቴ ሺኢጲሢ
1ዑኡዞ ታኣኮ ዼጊዲ ፆኦሲ ባንሢ ዒላቴኔ፤
ዒዚ ታኣም ዋይዛንዳጉዲ ዒዛ ባንሢ ዔኤሊንቴኔ።
2ታኣኮ ሜታሢ ኬሎና
ናንጊና ናንጋ ጎዳ ታ ኮዔኔ፤
ዋንቶ ላቢሢ ባኣንቴ ኩጮ ታ ዒዛ ባንሢ ዔቂሴኔ፤
ሼምፔላ ጋዓንቴ ታኣኮ ዶዲፆ ዒፄኔ።
3ፆኦሲ ዛሎ ታ ማላ ዎዶና ታ ዖዬኔ፤
ዒናፓ ታ ማላዛ ዒና ታኣኮ ዶጬኔ።
4ዋንቶ ጉቤ ኔ ታና ጴቼኔ፤
ዖዪፃ ታኣኮ ሚርጌሢሮ ጌስታኒ ታ ዳንዳዒባኣሴ።
5ጊንሢም ዓኣዼ ኬሎ ታ ማሌኔ፤
ሚና ዓኣ ሌዖዋ ማሊ ታ ጶቂሤኔ።
6ዋንቶ ታ ዓይናዼ ዓይኑሞ ማሌኔ፤
ታኣኮ ዒኖና ታ ጌስቴኔ፤
ታ ዓያኖና ታ ማላዖ፦
7«ናንጊና ናንጋ ጎዳ ኑና ጋፒ ኬኬኤሪያ?
ሃካፓ ሴካ ፔ ኮሹሞ ዒ ፔቴታዖ ዻዋዓዳ?
8ዒዛኮ ማኣሪፃኣ ኑኡም ናንጊና ባይቂያ?
ጫኣቁማኣ ሃካፓ ሴካ ዶዲ ዴዑዋዓዳ?
9ፆኦሲ ፔኤኮ ኮሹሞ ዋሊያ?
ዻጎይዳፓ ዔቄያና ሚጪንቶ ዒ ሃሺያ?» ጌዔኔ።
10ታኣኒ፦ «ዼኤፖ ፆኦዛሢኮ ሚዛቆ ኩጫ ላኣሚንቴያ ማሂ ማሊፃ
ታኣኮ ላቢሢኬ» ጌዔኔ።
11ናንጊና ናንጋ ጎዳኮ ማዾ ታ ጶቂሣኔ፤
ሚና ዒ ፔ ዎልቆና ማዻ ዲቃሣ ማዻ
ጎኔና ታኣም ጶቃኔ።
12ማዾ ቢያ ታ ኔኤኮ ማላኔ፤
ዲቃሣ ዓኮ ማዾ ቢያ ማሊ ታ ሱካኔ።
13ፆኦሲዮ!
ኔኤኒ ማዻ ባካ ቢያ ዱማዼያኬ፤
ኔጉዴያ ዼኤፒ ፆኦሲ ዖናዳይ?
14ኔ ዎልቄና ማዺንታ ዓኪ ባኣዚ ማዻይ ኔናኬ፤
ሜሌ ዴሮ ባኣካ ኔ ዎልቆ ኔ ፔጋሲ ዻዋኔ።
15ያይቆኦቤንታ ዮሴፔንታ ናኣቶ
ኔ ዎልቆና ዴሮ ኔኤኮ ማሂ ሻንቂ ኔኤኒ ዓውሴኔ።
16ፆኦሲዮ!
ዋኣፃ ኔና ዛጋዖ ዒጊጬኔ፤
ዔቶ ባዞ ዋኣፃኣ ጎጋይቄኔ።
17ሻኣራ ዒሮ ዋርቄኔ፤
ጫሪንጫ ጉጉንፃ ጉጉንሤኔ፤
ዜኤሊንፃኣ ጫሪንጫፓ ቢያ ባንፆና ፖዔኔ።
18ኔኤኮ ጉጉንሣ ዑኡዛ ዓልጋሢ ዢባሮይዳ ዋይዚንቴኔ፤
ዜኤሊንፃ ኔኤኮ ዓጮ ፖዒሴኔ፤
ሳዓ ጎጋይቂ ዓጊፄኔ።
19ኔኤኮ ጎይፃ ባዞ ዋኣፆይዴና ዓኣዻኔ፤
ኔ ሃንቲፃ ዼኤፖ ዋኣፆይዳኬ፤
ኮጲሲ ጋዓንቴ ኔኤኮ ጴዺባኣሴ።
20ሙሴና ዓኣሮኔና ዎላ ኔ ማዒ
ዴሮ ኔኤኮ ዓዳ ማራይጉዲ ዔኪ ኔ ዓኣዼኔ።