ማዤ ፆኦዛሢም ሺኢኬ ጋላታ
1ታ ሼምፔሌ! ናንጊና ናንጋ ጎዳ ዓንጄ!
ናንጊና ናንጋ ጎዳ ማዔ ታ ፆኦዛሢዮ! ኔኤኒ ኮሺ ዼኤፒኬ፤
ቦንቾና ዼኤፑሞና ኔ ማይንቴኔ።
2ኔ ኔና ፖዒና ካንቄኔ፤
ጫሪንጮ ኔኤኒ ዓፒላጉዲ ዳሬኔ።
3ማኣሮ ኔኤሲ ኔኤኒ ሎ ዋኣፆ ዑፃ ማዤኔ፤
ሻኣሮ ኔኤኮ ሳርጌሎ ዖይቶ ማሄኔ፤
ዢባራ ኔኤኮ ጋኣሲ ማዔም ኔ ባራናኔ።
4ኪኢታንቾ ኔኤኮ ኔ ዢባሬ
ዓይሎ ኔኤሲ ታሚ ሎስቴ ኔኤኒ ማሄኔ።
5ናንጊና ዓጊፁዋጉዲ
ሳዖ ማዢንቴ ቤዛ ዶዲሺ ኔ ዴይሤኔ።
6ባዞና ዓፒላጉዲ ሳዖ ኔ ካንቄኔ፤
ዋኣፃ ዹኮኮ ቶኦኪና ማዔኔ።
7ዔያቶ ኔ ጎሬ ዎዶና ጋዓንቴ ቤዞና ሺኢኬኔ፤
ኔኤኮ ጉጉንፆ ዑኡዞ ዔያታ ዋይዛዖ
ጳሽኪ ፑኔኔ።
8ዹኮኮ ዑፃ ዔያታ ላኣሊንቴኔ፤
ኔኤኒ ዔያቶም ጊኢጊሼ፥ ዶኦጫዼ ጊንፆ ዎቴኔ።
9ጊንሣ ዔያታ ሳዖ ዔኤዺ ባይዙዋጉዲ
ዑሣ ኬስኪያ ላኣሊንቱዋጉዲ
ጌዲ ኔ ጌሤኔ።
10ዓልቃ ዋኣፃ ዶኦጫዼ ጊንፆ ዎታንዳጉዲ ኔ ማሄኔ፤
ዹኮኮዋ ባኣኮና ዔያታ ዎታኔ።
11ካዮ ቦዓ ዒኢካፓ ዑሽካኔ፤
ኪርሞላ ዒኢካፓ ዼኤቦ ፔኤሲ ዛኣራኔ።
12ካፓ ማኣሮ ፔኤኮ ዎሮ ዓጫ ማዣኔ፤
ሚፆ ካኣፖ ባኣካኣ ዱላኔ።
13ኔኤኒ ሎ ኔ ማኣራፓ ዹኮ ዑሻኔ፤
ሳዓኣ ኔ ማዾ ዓኣፖ ሙይ ሚሽካኔ።
14ቆልሞም ሳዓፓ ማኣቲ ኔ ባቃልሳኔ፤
ዓሲም ሙኡዚ ማኣዳንዳ ዱማ ዱማ ባኣዚ ኔ ኬሳኔ።
15ዓሲ ዎዛሳ ዎይኔ
ዓኣፖ ካሮዋ ዓኣዒሳ ዛይቴ
ዎልቄ ዒንጊ ዶዲሻ ሃኣኮዋ ዒኢፓ ጴዻኔ።
16ዬያጉዲ ሃሣ ናንጊና ናንጋ ጎዳኮ ሚፃ
ዒዚ ቱኬ ሊባኖኦሴ ሚፃ ዋኣፆ ዑሽኪ ሚሽካኔ።
17ካፓ ፔኤኮ ማኣሮ ዒኢካ ማዣኔ፤
ቦኦካሢ ዚቢቆ ባኣካ ዎርቆ ቤሲ ዴንቃኔ።
18ዖዶዞ ዹካ ዎሻ ናንጋ ቤሲ
ላሎ ቆኦፓኣ ሾኦና ጌላ ቤሲኬ።
19ዓጊና ዎዶ ዱማሳንዳጉዲ ኔ ማዼኔ፤
ዓባኣ ፔ ጌላ ዎዶ ዔዔራኔ።
20ሳዓ ኔ ዓሚሻዛ ዹሚ ማዓኔ፤
ዒማና ካዮ ቦዓ ቢያ ኬስኪ ዲርጊ ሺራኔ።
21ሃጊ ዔቃ ዞባ ሙዖ ኮይ ጉዻኔ፤
ሙዖንዶ ባኮዋ ፆኦሲዳፓ ኮዓኔ።
22ዓባ ፆርቃኣና ዓኣሺንቲ ካዮ ጌላኔ፤
ፔኤኮ ቡኡላ ቡኡላ ጌሊ ላሃኔ።
23ዬካፓ ዓሳ ማዾይዳ ሶኦፓኔ፤
ሳዓ ዓማንዳያ ሄላንዳኣና ፔኤቃኔ።
24ናንጊና ናንጋ ጎዳሢዮ!
ማዻ ኔኤኮ ዎዚ ሚርጋይ!
ዬያ ቢያ ኔኤኒ ኔ ቢታንቶና ኮሼኔ፤
ሳዓ ኔኤኒ ማዤ ማዢንቶና ኩሜኔ።
25ሃይ ዼኤፖ ባዛ ዳልጊና ሚጪንቴያኬ፤
ዼኤፒንታ ዻካ ቦዖንታ ፓይዲባኣ ዓጊፃ ባኣዚ ዒኢካ ዓኣኔ።
26ዋኣፆ ካኣሚላ ዒኢካ ዑፃ ሃንታኔ፤
ኔኤኒ ማዤ ሌዋታኔያ ዒኢካ ዴማ ዓማላኔ።
27ዔያታ ሙዓንዳ ባኮ ዎዶና ኔ ዔያቶም ዒንጋኔ፤
ዬይ ቢያ ዎዛና ኔና ካፓኔ።
28ኔኤኒ ዔያቶም ዒንጋ ዎዶና ዬያ ዔያታ ቡኩሳኔ፤
ኔኤኮ ኩጮ ኔ ቡላ ዎዶና
ኮሺ ባኣዚ ሙዒ ዔያታ ሚሽካኔ።
29ዔያቶይዳፓ ዓኣፖ ካሮ ኔኤኮ ኔ ሺርሻዛ
ዲቃቲሢ ሌሊ ዔያታ ሚርጋኔ፤
ሼምፓሢ ኔ ዔያቶኮ ዔካዛ ሃሃይቃኔ፤
ኬስኬ ዓጮ ባንሢያ ማዓኔ።
30ኔኤኮ ዓያኖ ኔ ዳካዛ ዔያታ ማማዢንታኔ፤
ሳዖዋ ኔኤኒ ዓኪ ማሃኔ።
31ናንጊና ናንጋ ጎዳኮ ቦንቻ ናንጊና ዶዲ ናንጎም፤
ዒዚ ፔኤኮ ማዼ ማዾና ዎዛዾንጎ።
32ሳዖ ዒዚ ዛጋዛ ዓዓጊፃኔ፤
ዹኮዋ ካኣማዛ ጩጩባኔ።
33ታኣኒ ሼምፔና ዓኣና ናንጊና ናንጋ ጎዳም ዓይናዻንዳኔ፤
ዔቂ ታ ሃንታ ዎዳ ዒዛ ታ ዓኣሣንዳኔ።
34ታኣኒ ናንጊና ናንጋ ጎዳና ዎዛዻሢጉዲ
ታ ማሊፃ ዒዛ ዎዛሶንጎ።
35ጎሞ ዓሳ ሳዓፓ ባይቆንጎ!
ዋይዞ ዒፃ ዓሳ ማይ ሃይፓ ሴካ ጴዾፓ!
ታ ሼምፔሌ! ናንጊና ናንጋ ጎዳ ዓንጄ!
ጋላቲያ ዒዛ ጋላቴ።