ዓይኑሞ ሱኡጋሢ ዓይሣ ጎይፆና ዓይናዺንታ ፆኦሲ ዓይላሢ ዳውቴ ዓይኑሞ
ጎሞ ዓሶኮ ፑርቱሞና ፆኦሲኮዋ ኮሹሞ
1ፑርታ ባኣዚ ማዻ ዓሲ ፔ ዒኖና ዬያ ፑርቱሞ ማላኔ፤
ፆኦሲ ዒጊጩዋሴ፥ ቦንቺያ ቦንቹዋሴ።
2ፑርቶ ማዻ ዓሢ ዒዛኮ ፑርቱማ ሳልማሳሢሮ
ፔኤኮ ጎሞ ዛጋኒታቴያ ዒፃኒ ኮዑዋሴ።
3ጌኤዛ ዒዛኮ ጌኔ ማሊሢና ሉኡዙሞና ኩሜያኬ፤
ማሊ ጶቂሥሢና ኮሺ ባኣዚ ማዺሢያ ዒዛ ባሼኔ።
4ላሄ ቤዛ ዓኣዖ ጌኔ ባኣዚ ማሊ ቱካኔ፤
ፔና ዒ ፑርታ ጎይሢ ዔኪ ዓኣዻኔ፤
ፑርቱሞ ባኮዋ ፔ ኮራፓ ሃኪሱዋሴ።
5ናንጊና ናንጋ ጎዳሢዮ!
ኔኤኮ ናንጊና ናንጋ ናሹማ ጫሪንጮ
ጎኑማኣ ኔኤኮ ሻኣሮ ዴንዲ ሄላኔ።
6ናንጊና ናንጋ ጎዳሢዮ!
ዓሶንታ ቆልሞንታ ሜቶይዳፓ ኔኤኒ ዓውሳኔ፤
ፂሉማ ኔኤሲ ዓዳ ዹኮጉዲ ኮሺ ዼግ ጌዔያኬ፤
ኔኤኮ ዎጋ ባዚ ዔታዻጉዲ ዔታዻያኬ።
7ፆኦዛሢዮ!
ኔኤኮ ናንጊና ናንጋ ናሹማ ዎዚ ቦንቺንታያዳይ!
ዓሶ ኔኤኒ ካፓሢሮ ኔ ዴማ ካፒንቲ ዴዓኔ።
8ኔ ማኣራ ጊዲ ዑሣ ዓኣዻ ሙኡዚ ዔያታ ሙዓኔ፤
ኔኤኮ ዎዛሳ ዎራፓ ዋኣፆ ዔያቶ ኔ ዑሻኔ።
9ኔኤኒ ናንጊኮ ቢያ ዓልቃ ካራኬ፤
ኔኤኮ ፖዓ ፖዓሢሮ ኑ ዛጋኔ።
10ኔና ዔራዞንሢም ናንጊና ናንጋ ናሹማ ኔኤኮ ጋፖፓ፤
ዓውሲፃኣ ኔኤኮ ዒኖ ፒዜዞንሢም ጋፑዋያ ማዖንጎ።
11ዖቶርቃ ዓሶኮ ቶካ ታና ሄርቃንዳጉዲ
ፑርቶ ማዻ ዓሳ ዎልቃዺ ታና ዳውሳንዳጉዲ
ታና ሃሺፖ።
12ፑርቶ ማዻ ዓሳ ዎማይዲ ሎኦሚ ላሄቴያ ዛጌ!
ዔያታ ኬኤሪንቴኔ፥ ዔቃኒያ ያፓ ዳንዳዑዋሴ።