ፆኦሲ ዎዚ ኮሺዳይ!

ሃሊፄም ሎኦማኒ ዻካሮ ዓቴኔ።

ዋይዞ ዒፃ ዓሶማኣ «ዬይ ዎዲ ማዔዖ»

ጌይ ማሌኔ።

ዑፃ ዔያቶሲ ኩሙሢ ኮሺኬ።

ዓይጎ ዓሲዳኣ ማዓ ሜታ ዔያቶ ዑፃ ማዑዋሴ።

ዋይዚ ዒፂሢያ ዓዳ ዔያታ ማኣዖጉዲ ማይንቴኔ።

ዒናኣ ዔያቶሲ ፑርታ ማሊሢ ኬሳኔ።

ሌካ ጪኢዺንቲ ጪኢዺንቲ ዋይዞ ዒፂፆና ዚርቃኔ።

ጌኤዛ ዔያቶኮ ሳዓ ማዔ ካሮ ሄላኔ።

ዋኣፆዋ ዔያቶኮ ካራባኣ ጎይሢና ዑሽካኔ።

ዼኤፖ ፆኦዛሢ ኮራ ዔራቶ ዓኣ?» ዔያታ ጋዓኔ።

ዔያቶኮ ዓኣ ቆላ ጊዳያኬ፤

ዬያይዴንቴያ ቃሲ ቆሎ ዔያታ ዴንቃኔ።

ዔኤቢ ታ ካኣሚባኣዋይ ጌዒ ኩጮ ማስታሢያ ጉሪኬ።

ጉቶ ጉቶዋ ሜቶ ታ ዔኬኔ።

ኔኤኮ ናኣቶ ሾይንቶይዳ ሄኤዶ ፑርታ ባኣዚ ማዼያናንዳኔ።

ላቢሢ ማዾ ማሊ ታኣም ጴዼኔ።

ጋፒንፆዋ ዔያቶኮ ታ ዛጋንዳያ ሄላንዳኣናኬ።

ባይሲንታ ባንሢያ ኔ ዔያቶ ኬይሴኔ።

ዲቃቲ ጋፒ ዔያታ ኩዴኔ።

ናንጊና ናንጋ ጎዳሢዮ!

ዒናኣ ታኣኮ ሜቄኔ።

ኔ ቤርታ ቆልሞጉዲ ታ ማዔኔ።

ኔኤኒያ ታኣኮ ሚዛቆ ኩጮ ዓርቄኔ።

ጊንፃፓ ኔ ታና ቦንቺሳንዳኔ።

ሳዖይዳ ኔ ጊዳፓ ሜሌ ታ ኮዓይ ባኣሴ።

ፆኦሲ ጋዓንቴ ዒኖኮ ታኣኮ ዶዱማሢና

ናንጊና ታኣሮ ማሂ ታ ዔኬሢኬ።

ኔኤኒ ኔኤም ጉሙርቂንቱዋዞንሢ ቢያ ባይዛንዳኔ።

ናንጊና ናንጋ ጎዳ ጊቲማሢ ታኣኮ ታ ማሄኔ፤

ኔኤኮ ማዾ ዛሎዋ ታኣም ኬኤዛኒ ኮሺኬ።