ጌኤዦ ማፃኣፖ ዓይኑሞ ማፃኣፖ 106

ፆኦሲ ፔ ዴሮም ኮሽካ ኮሹሞ

1ናንጊና ናንጋ ጎዳ ጋላቱዋቴ!

ዒዚ ኮሺታሢሮና ናሹማኣ ናንጊና ናንጋያታሢሮ

ዒዛ ጋላቱዋቴ!

2ናንጊና ናንጋ ጎዳ ማዻ ዼኤፖ ማዾ ዛሎ

ዖኦኒ ኬኤዛኒ ዳንዳዓይ?

ዒዛም ማዓ ጋላቶዋ ቢያ ዖ ኬኤዚ ጋፒሳንዳይ?

3ፒዜ ዎጌ ዎቡዋጉዲ ካፓዞንሢ

ቢያ ዎዴ ፂሎ ማዔዞንሢ

ዓንጂንቴያኬ።

4ናንጊና ናንጋ ጎዳሢዮ!

ኔኤኮ ዴሮ ኔ ማኣዳ ዎዶና ማሊ ጶቂሤ፤

ዔያቶ ኔ ዓውሳ ዎዶና ታና ማሌ።

5ዬይያ ኔኤኒ ዶኦሬዞንሢኮ ዖርጎቹሞ ታ ዛጋኒ

ኔ ዴሮ ዎዞና ታ ዎዛዻኒ

ኔ ዓሶና ዎላ ታ ኔና ሄርሻንዳጉዲኬ።

6ኑኡኒ ኑ ዓዶንሢጉዲ ጎሜ ማዼኔ፤

ኑ ዻቢንቴኔ፥ ፑርታ ማዼኔ።

7ኑኡኮ ዓዶንሢ ጊብፄ ዓጫ ዓኣዖ

ኔ ዎልቆና ማዺንታ ዓኮ ባኮ ማሊ ጶቂሢባኣሴ፤

ኔኤኮ ሚጪንቲፆ ሚርጉሞዋ ዔያታ ማሊባኣሴ፤

ዞቄ ባዞ ዓጫ ዋይዚ ኔኤም ዒፄኔ።

8ዒዚ ጋዓንቴ ፔ ዎልቆኮ ዼኤፑሞ ቤኤዛኒ

ፔ ሱንፆሮ ዔያቶ ዒ ዓውሴኔ።

9ዞቄ ባዞ ዒ ጎሬኔ፤

ባዛኣ ሚጬኔ፤

ዓሲ ናንጉዋ ዳውሌ ቦኦሊና ዓኣዾሢጉዲ

ዋኣፆ ዔቶኮ ባኣኪና ዔኪ ዔያቶ ዒ ዓኣዼኔ።

10ዔያቶ ዒፃ ዓሶ ኩጫፓ ዒ ዓውሴኔ፤

ሞርኮ ኩጫፓኣ ዒ ሄሊ ዓይሴኔ።

11ሞርኮ ዔያቶኮ ዋኣፃ ሙዔኔ፤

ዬያ ሞርኮይዳፓ ፔቴታዖ ቶሊ ዓቲባኣሴ።

12ዬካፓ ዔያታ ዔያቶም ኬኤዞና ቃኣሎ ጉሙርቄኔ፤

ዓይኑሞናኣ ዒዛ ጋላቴኔ።

13ጋዓንቴ ዔያታ ዒ ማዼ ባኮ ቤዞና ዋሌኔ፤

ዒዛኮ ዞሮና ዓኣዻኒ ጊቢ ዳንዳዒባኣሴ።

14ዓሳ ናንጉዋ ዳውሎይዳ ሱኡካዺሢ ዔያታ ዓርቄኔ፤

ዒኢካ ፆኦሲ ዎይታቴያ ጌዒ ዒዛ ዛጌኔ።

15ዒዚ ዔያታ ዒዛ ዖኦጬሢ ዔያቶም ዒንጌኔ፤

ጋዓንቴ ዔያቶ ዖኦፒሳ ዶርዓ ዳኪንቴኔ።

16ጉርዶይዳ ዔያታ ዓኣዖ

ሙሴንታ ፆኦሲም ዱማዼ ዓኣሮኔንታ

ማዻ ማዾ ዛጊ «ዬይ ዔያቶም ሌሊ ዓይጋ ማዔይ» ጌዒ ማሌኔ።

17ሳዓ ዳርዒ ዳኣታኔ ጎዖሢ ዔኤዼኔ፤

ዓቤሮኔንታ ዒዛኮ ማኣሮ ዓሶዋ ጉኡፔኔ።

18ዔያቶኮ ቡኪንቶ ባኣካ ታሚ ዔኤቴኔ፤

ሎስታሢ ፑርቶ ዓሶ ሚቺ ባይዜኔ።

19ዔያታ ኮሬቤ ጌይንታ ቤዛ ዓኣዖ ዎርቄና ናኣሪ ኮሼኔ፤

ዬያ ዓንጎ ሼኤሺ ማዦና ፆኦዞም ዚጌኔ።

20ዔያቶኮ ቦንቾ ማዔ ፆኦዛሢ ዔያታ

ማኣቶ ሄንቃ ቆልሞ ማላ ባኮና ላኣሜኔ።

21ጊብፄ ዓጮይዳ ዼኤፒ ባኣዚ ማዺ

ዔያቶ ዓውሴ ፆኦዛሢ ዔያታ ዋሌኔ።

22ዒዚ ጋዓንቴ ካኣሜ ዓጮይዳ ዲቃሣ ማዾ

ዞቄ ባዞይዳኣ ዲቃሢ ሄርሺሳ ባኣዚ ማዼኔ።

23ዬያሮ ዱማ ዱማ ዎዻ ባኮና

ዔያቶ ዒ ባይዙዋጉዲ ማዻኒ

ዒዚ ዶኦሬ ሙሴ ፆኦሲንታ ዔያቶንታ ባኣኮ ጌሊ

ዒዛኮ ቤርታ ዔቂባኣያታቴ

ዔያቶ ዒ ባይዛንዳሢ ኬኤዜያኬ።

24ዬካፓ ዔያታ ኮዦ ዓጬሎ ቶኦቼኔ፤

ዒዚ ዔያቶም ዒንጌ ዎዞ ቃኣሎዋ ጉሙርቂባኣሴ።

25ዔያታ ዓፒሎና ማዢንቴ ፔ ማኣራ ማኣራ ጉንዱሜኔ፤

ናንጊና ናንጋ ጎዳሢ ዑኡዞዋ ዋይዚባኣሴ።

26ዓሳ ናንጉዋ ዳውሎ ቦኦላ ዔያቶ ኬኤራኒ

ኩጮ ፔኤሲ ዔቂሲ ዒ ጫኣቄኔ።

27ዜርፆ ዔያቶኮ ዒ ሜሌ ዴሮ ባኣካ ሃሻኒ

ዱማ ዱማ ዓጮ ዔያቶ ላኣላኒ ጫኣቄኔ።

28ዔያታ ፔና ቢዔልፔጎሬና ዎላ ፔቴ ማሄኔ፤

ሼምፓባኣ ፆኦዞም ሹኮና ዓሽኮዋ ሙዔኔ።

29ዔያታ ፔ ማዾና ናንጊና ናንጋ ጎዳ ዻጋሴኔ፤

ዱማ ዱማ ባይዛ ባካ ዔያቶ ሄሌኔ።

30ጋዓንቴ ፒንሃሴ ዔቂ

ዻቢንቶ ማዼ ዓሶ ዎዼ ዎዶና

ዱማ ዱማ ዎዻ ባካ ዎዺፆ ሃሼኔ።

31ዬይያ ሾይንቲፓ ሾይንቲ ሄላንዳኣና

ናንጊና ዒዛም ፂሉሞ ማዒ ፓይዲንቴኔ።

32ዬያጉዲ ሃሣ ሜሪባ ጌይንታ ዋኣፆ ዓጫ

ናንጊና ናንጋ ጎዳ ዔያታ ዻጋሴኔ፤

ሙሴያ ዬያ ዛሎና ሜቶይዳ ኬዴኔ።

33ሙሴ ዔያታ ዻጋሴሢሮ

ዒዚ ኮይሱዋ ዑኡሲ ፔ ዻንጋፓ ኬሴኔ።

34ናንጊና ናንጋ ጎዳ ዔያቶ ዓይሤ

ሜሌ ዴሮ ባይዚፆ ዔያታ ሃሼኔ።

35ዔያታ ሜሌ ዴሮና ዎላ ሲኢሪንቴኔ፤

ዬይ ዓሳ ማዺ ሃንታ ባኮ ዔያታኣ ዔሬኔ።

36ዬያቶኮ ካኣሽኮ ፆኦዞዋ ዔያታ ካኣሽኬኔ፤

ዬይ ዔያቶም ፒሮ ማዔኔ።

37ዔያቶኮ ዓቲንቆንታ ዉዱሮ ናኣቶንታ

ፑርቶ ዓያኖም ዔያታ ሹኬኔ።

38ዔያቶኮ ዓቲንቆንታ ዉዱሮ ናኣቶንታኮ ጌኤዦ ሱጉፆ

ሜሌ ካኣናኔ ፆኦዞም ላኣሊፆና

ሳዔሎ ሱጉሢ ሳዓ ማሂ ዔያታ ዒኢሴኔ።

39ዔያታ ፔ ማዾና ዒኢቴኔ፤

ዞኦስካ ኮኦማ ላኣሊጉዲ ፔ ፆኦዛሢም ዔያታ ጉሙርቂንቲባኣሴ።

40ዬያሮ ናንጊና ናንጋ ጎዳኮ ዻጋ

ዒዛ ዴሮ ዑፃ ዔኤቴኔ፤

ፔ ዓሶዋ ዒ ሻኣኪንቴኔ።

41ዔያቶ ዒዚ ሜሌ ዴሮም ዓኣሢ ዒንጌኔ፤

ሞርካ ዔያቶኮ ዔያቶ ዎይሣያ ማዔኔ።

42ሞርካ ሄርቂ ዔያቶ ዎሣያ ማዔኔ፤

ፔ ቢታንቶኮ ዴማ ማሄኔ።

43ዒዚ ሚርጌ ዎዴና ዔያቶ ሄሊ ዓውሴኔ፤

ዔያታ ጋዓንቴ ዋይዚ ዒፂሢ «ኑ ሃሻዓኬ» ጌዔኔ፤

ፔ ጎሞና ዔያታ ዻውሲንቴኔ።

44ጋዓንቴ ዒላቶ ዔያቶኮ ዒ ዋይዜ ዎዶና

ሜታሢ ዔያቶኮ ዛጌኔ።

45ዔያቶሮ ጌይጋፓ ጫኣቄ ጫኣቁሞ ዒ ማሌኔ፤

ዒዛኮ ዓኣ ሚጪንቲፆ ሚርጉሞጉዴያ

ዻጋፓ ዒ ማዔኔ።

46ዔያቶ ዲዒ ዔኬ ዓሳ ቢያ

ሚጪንታንዳጉዲ ዒ ማዼኔ።

47ናንጊና ናንጋ ጎዳ ማዔ ኑ ፆኦዛሢዮ! ዓውሴ ኑና፤

ኔኤኮ ዱማዼ ሱንፆም ጋላታ ኑ ሺኢሻንዳጉዲ

ኔና ኑ ኬኤዚ ሄርሻንዳጉዲ

ዴሮ ባኣካፓ ቡኩሲ ኑና ኔ ዔኪ ዬዔኔ።

48ናንጊና ናንጋ ጎዳ ማዔ ዒስራዔኤሌ ፆኦዛሢ

ናንጊፓ ናንጊ ሄላንዳኣና ዓንጂንቶንጎ!

ዴራ ቢያ ዓኣሜን ጎዖንጎ፤

ናንጊና ናንጋ ጎዳ ጋላቱዋቴ!

Notes