140
Te Devitgo asęani balia po me deli dao.
Bidigo te Godiba gedu haluasa po weyu, te aga bugagia tonalumainu yai
1 Genuai Bidi, nago ena te dwai sę ebo
bidi dabego nogode ma sao.
Awe, te dwai hwįbo bidi dabego
enaba boi bidi me idali weyu, nago ena tau sao.
2 Te sesemane sogo augwaligo dwai
kolesaga yabo homu ebo dao.
Tama te sę edelama, sesemane sogo
augwaligo te we bidi dabe tomode
konila po hodolama, wabo dao.
3 Te augwaligo po wabo te hasamanigo
kele poa pai tiwai mu elama,
tama augwaligo pedauwalide te bidi
dolabo po te hasamanigo dwai
nabi tiwai elalubo dao. * Rom 3:13
4 Genuai Bidi, nago ena bugagia tonaluao.
Tama tiyu, te dwai sę ebo bidi dabego
bomogo ena aiyaba elaluainu ebaso, usu me egobeo.
Nago ena bobogela selama,
tama te hwįabo bidi dabego ena dolabo po miani,
te augwaligo te tama me tegobeo.
5 Te hagoma ebo bidi dabego
te ena tola somainu ebo
bono gągą munama, elalubao.
Te bono gągą augwa te bomai kedoago nigai,
augwaligo te ena bilibo sunumide
gebelama, te ena te hasa tiwai gilama sainu yali.
6 Eno Genuai Bidiba te tama po walali,
“Nage eno God dao,” obao.
Genuai Bidi, nago ena homu dene eyu, tau sao.
Eno i wabo odao.
7 Genuai Bidi, eno God da,
nage te ena ma sali bomai bidi dao.
Te polobadu dago te boi bidi dabe dali
hwįani sogo, nago ena bugagia tonaluai dao,
bidigo sabelego aga tigi seselalubo tiwai gilama yali.
8 Genuai Bidi, nago te dwai sę ebo bidi
dabeba te augwaligo sainu ebo nai
dabe munu me magio.
Tama augwali hagoma idali weyu,
nago augwaligo te dwai sę yainu
po mia sali sę emainu me elamu dao.
9 Nago te eno boi bidi dabego
te ena aiyaba elalumainu me igio.
Augwaligo te ena silabo wado po wali.
Tiali goli, augwaligo enaba
te yainu yali sę, nago augwaba digi
ma pedalumainu ilao.
10 Awe, te nago augwaliba
te dabo sia tulalumainu ilao.
Tama nago augwali te genuai tǫ
dedageba aiya sąnama,
tama augwa edaba ma holainu ebo
te usu me egobeo.
11 Te gasa bidi odolali po tų ilibo bidi dabe,
nago augwaligo te po tųde gasa bidi aiyaba
elalumainu me elamuo.
Tama eno homugo te dwai nai te hwįbo
bidi dabeba pedelama,
tama bomonama eyu, augwali mu
silimainu homu ebao.
12 Genuai Bidi, eno te tama koneani,
nago te nai meni yai bidi dabe
te po tų ebode tau siyu,
tama te magi doado bage sǫą pali
bidi dabe tau sabo dao,
te bidi dabego augwaliba
dwai sę ebo sogo tama tibo dao.
13 Mu tama, te doloba pai we bidi
dabego te nago nogi ugwaba siyu,
tama te augwali nage dali sesemane bidada paibao.