10
Basef waminif atina indalelemb sipsipi
Jisas naꞌi, “Endilisi aeꞌ aꞌipipa, epen ami owaꞌ nusiꞌ uta indalelemb sipsipia ma anin nelota niwisi anagon daiagona, epen inimba nandaꞌ wali. Apaꞌ epen inimba usiꞌini nigawisi utai, anin nigimafi sipsipi. Aman nugumafi utai nawisiꞌman uta ma nugumafi sipsip. Amom sipsip mameꞌ malogol ananigili. Nofala agofa sipsip ananimi, eaꞌ naoꞌwam mawisi andoꞌ. * Jo 10:27 Naoꞌwa sipsip ananimi hiami mawisi andoꞌ hiꞌalam eaꞌ naliꞌ nafeꞌ, amom magiꞌmana. Deiꞌ main? Amom mogawa malogol ananigili. Apaꞌ sipsip ina magiꞌma anona daiana, owaꞌ. Naꞌamba mondafaꞌmana aꞌ mofaꞌ mefeꞌ atona biana. Deiꞌ main? Amom ina mogawa malogol ananigili, owaꞌ.?* Jo 16:25
Eaꞌ Jisas naꞌipasa basef waminif atin naꞌamba, apaꞌ esis ina sogawa basef kofagefa, owaꞌatin.
Jisas aman buꞌunai nugumafi sipsipi
Eaꞌ Jisas naꞌipas wapani naꞌi, “Endilisi aeꞌ aꞌipipa, aeꞌ siꞌi uta sipsip mugawisatai. * Jer 23:1-2; Esi 34:2-3 Amom fowaꞌ mugumafi sipsipi, hiami mandaꞌ wali apaꞌ sipsip ina mameꞌ malogof amamugufi, owaꞌ. * Sam 118:20; Jo 14:6 Aeꞌ siꞌi uta, epen ami niwisi aeꞌ nomon, God nuwambilai anin nokwahoman waf awafi nepe andeandeꞌ. Anin nifiꞌi niwisi niwis nepe netaga nefeꞌ nefaꞌ gwaꞌaisi buꞌwasi. 10 Amom mandaꞌ wali mafiꞌi ma mondaꞌ wal mohas sogaꞌ mogahambombagas. Apaꞌ aeꞌ afiꞌi ma ipaꞌ pegape andeandeꞌ ambal lopaipa endilisi aꞌowaꞌ. * Sam 23:1, Re 7:17 11 Aeꞌ aman buꞌuwai igimafi sipsipi, aꞌi ahoꞌ ma egagaꞌ ma egatopalopa sipsip igimafiami. * Ap 20:29 12 Iꞌi anona aman nondaꞌ kontrak dowafi ma nugumafi sipsip amambai, anen okom miꞌi nogofaꞌ otamba atembai, anen ina atiasi numafi sipsip andeandeꞌ, owaꞌ. Anen ina aman endilisi nugumafi sipsipi, owaꞌ. Eaꞌ nemaf mamahefa niti nombagw gwagail alupi gugafiꞌi, aꞌ ombal mohana nokwaha sipsip atom mulutu nofaꞌ nefeꞌ. Eaꞌ nombagw agwamba guwis goha sipsip mofaꞌ mefeꞌ atona biana. 13 Aman anamba nandaꞌ maola otamba atembai, anen nandaiwaꞌma nugumafi sipsip amamba andeandeꞌ, owaꞌ. Eaꞌ atiasi niti nombagw agwamba aꞌ ombal mohana nofaꞌ nefeꞌ.* Jo 10:27; 2 Ti 2:19
14 “Aeꞌ aman buꞌuwai igimafi sipsip andeandeꞌi. Aeꞌ egawa sipsip aeꞌami a sipsip mogawa aeꞌ wapani. * Mt 11:27; Jo 15:13; 1 Jo 3:16 15 Eaꞌ naꞌamba atin ahame aeꞌanai nogawa aeꞌ, aeꞌ egawa anen. Aeꞌ aꞌi ahoꞌma egaꞌ egatopalopa sipsip aeꞌami. * Ais 56:8; Jo 11:52; 1 Pi 2:25; Esi 34:23; Esi 37:24 16 Aeꞌ anom sipsip daiam malutumi. Apaꞌ amom ina malutu nomon indalelemb ambalemba, owaꞌ. Amom magalutu indalelemb anagon daiagini. Aeꞌ okom maꞌiam aꞌowaꞌ anef nemaf aꞌ efaꞌam mifiꞌi memeꞌ malogol aeꞌigili ekolasom mulutu indalelemb atelemb aeꞌ atowe imafiam. * Fl 2:8-9 17 Aeꞌ aꞌi ahoꞌma egagaꞌ ma atiasi esafel egape namowe wapani. Isimba atis ahame aeꞌanai okom maimaili aꞌowaꞌ. * Jo 5:26, 14:31; Jo 19:11 18 Ina anona aman noha ambal aeꞌali egaꞌ, owaꞌatin. Okom aeꞌami atom maꞌi ahoꞌma atiasi egagaꞌ. Aeꞌ efaꞌ agol luꞌwagili ma egaꞌ egesafel wapani. Agol agalemba ahame atona naseꞌeagol.”* Jo 7:43; Jo 7:20, 8:48
19-20 Esis Juda sameꞌ basef ifimba eaꞌ esis sandatopaꞌ biafis. Hiasi saꞌi, “Ambagof awami mapaona eaꞌ nahaga nagaol aꞌowaꞌ. Deiꞌ maina ipaꞌ pagameꞌ malogol ananigili?”
21 Apaꞌ anis daias saꞌi, “Anona aman ambagof awami magapaunai ina naꞌi anif basef siꞌi anen nagaꞌiefi, owaꞌ. Anona aman ambagof awami magapaunai ai, ina laꞌifinama nondaꞌ aman anamba naep pagasoꞌanai nogati wapani, owaꞌatin.”
Esis Juda sandaꞌ naumbih saloma Jisas
22-23 Nogota atamba asaf atef fagalatama esis Juda sandaꞌ anis gwaꞌaisi luꞌwasi ma ukup pagapoma fowaꞌ gani sagawisi ipat Godi. Eaꞌ Jisas nafeꞌ nomon ipat luꞌunai Godi ilafunama saleꞌw fowaꞌ Solomon nandaꞌakwi. * Ap 3:11, 5:12; Lu 22:67 24 Eaꞌ amom Juda mafiꞌi malutu malipana maꞌi, “Nimaguf mamahifa inaꞌ nendaꞌ opalef afaꞌilifi fetaga nomonas biafis? Iꞌi inaꞌ Kraisai, niꞌipafa basef alihif.”* Jo 4:26, 5:36; Jo 10:38
25 Jisas nagwamam naꞌi, “Aeꞌ aꞌipipa eaꞌ, apaꞌ ipaꞌ ina ukup pehafel pahapifi, owaꞌ. Aeꞌ andaꞌ hiahaom banagami ma agol ahamai, amamba mihimbaꞌmepa aeꞌ epen mamahowema. * Jo 6:64, 8:45 26 Apaꞌ ipaꞌ ina sipsip aeꞌipai, owaꞌ. Ipaꞌ anipa daipa. Naꞌamba deiꞌ ipaꞌ ina pahapifa aeꞌ, owaꞌ. * Jo 8:47, 10:3 27 Sipsip aeꞌami mameꞌ malogol aeꞌagili eaꞌ egawam mameꞌ basef aeꞌafi maili. * Jo 3:16, 6:39; Jo 18:9 28 Aeꞌ egasoꞌam ambal namili ma mogape andeandeꞌ dondol lifilafi. Amom ina mogaꞌ, owaꞌatin. Ina anin epen laꞌifina netagwahom lagof aeꞌagufi negefaꞌam, owaꞌatin endilisi. Amom mope lagof aeꞌagufi atapim dondol lifilafi.
29 “Ahame aeꞌanai naseꞌe epes isimba aeꞌasi. Ina anin epen atiasi laꞌifina nitagwahis lagol ahamai negefaꞌas, owaꞌatin. Deiꞌ main, ahame aeꞌanai banagonai aꞌowaꞌ nikilaꞌ epes hiasi hiꞌalas. 30 Aeꞌ aloma ahame, afaꞌ biafa wape atotofa.”* Jo 8:59
31 Eaꞌ amom Juda mafeꞌ mofaꞌi otamba wapani maꞌi mokwahemba mohana afuna.
32 Apa Jisas naꞌipam naꞌi, “Aeꞌ ihimbaꞌmepa maol buꞌwani hiami nagataga Ahamai eaꞌ patilin. Apaꞌ ukup ipeꞌipi papoma maol mamahina andaꞌani ma deiꞌ paꞌi pekwaha otamba pegahe?”* Lev 24:16; Mt 26:65; Jo 5:18
33 Amam Juda magwamana maꞌi, “Afaꞌ ina wakwaha otamba waꞌi ohena ma anin maol buꞌwani, owaꞌ. Inaꞌ aman falafunai nandaꞌ findiwa, naꞌi inaꞌ atina God. Eaꞌ afaꞌ waꞌi ohena otamba.”* Sam 82:6
34 Jisas nagwamam naꞌi, “Anif basef fagail muꞌuli ipeꞌini faꞌias faꞌi, ‘Aeꞌ aꞌipipa eaꞌ aꞌi, ipaꞌ siꞌi anom god daiam.’ * Mt 5:18 35-36 Fowaꞌ basef Godi fafeꞌma epes isimba faꞌi, ‘God naꞌi ipaꞌ siꞌi anom god daiam.’ Basef ifimba ina fenalo, owaꞌ. Fape atapif fandawalap endilisi. Ahame aeꞌanai atona nosaheꞌe nandaꞌe ape hililiꞌ ananiwai atowe nasapaꞌe afiꞌi itap apaꞌe endaꞌ maol ananini. Eaꞌ aꞌi aeꞌ Nogamana ananiwai. Deiꞌ maina ipaꞌ pagaꞌi, aeꞌ andaꞌ God findiwana?’ 37 Iꞌi aeꞌ ina andaꞌ maol Ahame aeꞌanaiai, daoꞌ andeandeꞌma ipaꞌ pindaiwaꞌ ma pigahapifi. * Jo 14:10-11 38 Apaꞌ aeꞌ andaꞌ maol ananini ma iꞌi ipaꞌ owaꞌ pihapifia, hapaimi. Ipaꞌ piti maol atin aeꞌani pegawa Ahame nape nalome, aeꞌ ape alomana.”* Lu 4:30; Jo 8:59
39 Eaꞌ amom maꞌi mombaloꞌana ma mogowaꞌana. Owaꞌ, owaꞌatin. Anen nakwaha amom aꞌ nafeꞌ.* Jo 1:28
40 Jisas notanima natopaꞌ walemb Jordan nambo fisana nafeꞌ nataga anamba fowaꞌ dambadamba Jon nagapisiꞌasa nape naꞌamba. 41 Eaꞌ amam nematawa hiasi safiꞌmai anen. Esis saꞌi, “Jon owaꞌ nondaꞌ anin maol banagania, apaꞌ basef ananifi hiafi nagaꞌifa Jisasi, ifimba endilisifi atif.”* Jo 7:31
42 Eaꞌ amam nematawa hiasi sahapifa Jisas naꞌamba.

*10:3: Jo 10:27

*10:5: Jo 16:25

*10:7: Jer 23:1-2; Esi 34:2-3

*10:8: Sam 118:20; Jo 14:6

*10:10: Sam 23:1, Re 7:17

*10:11: Ap 20:29

*10:13: Jo 10:27; 2 Ti 2:19

*10:14: Mt 11:27; Jo 15:13; 1 Jo 3:16

*10:15: Ais 56:8; Jo 11:52; 1 Pi 2:25; Esi 34:23; Esi 37:24

*10:16: Fl 2:8-9

*10:17: Jo 5:26, 14:31; Jo 19:11

*10:18: Jo 7:43; Jo 7:20, 8:48

*10:22-23: Ap 3:11, 5:12; Lu 22:67

*10:24: Jo 4:26, 5:36; Jo 10:38

*10:25: Jo 6:64, 8:45

*10:26: Jo 8:47, 10:3

*10:27: Jo 3:16, 6:39; Jo 18:9

*10:30: Jo 8:59

*10:32: Lev 24:16; Mt 26:65; Jo 5:18

*10:33: Sam 82:6

*10:34: Mt 5:18

*10:37: Jo 14:10-11

*10:38: Lu 4:30; Jo 8:59

*10:39: Jo 1:28

*10:41: Jo 7:31