2“?Sauba ke ngisa ti ko mololea na tsoniana nimu goko lovolovo lê vaga gira?

3God Susuliga Sosongo e utu saikesa ke piloa na pede mana me ke pede sekoliginia sa tinoni;

aia e nau saikesalia moa na omea e gotolaka.

4Migira na dalemu igoe, e tau utu kara sasi i matana God,

aia nogo na rongona ti aia e gini kedeginigira vaga e ulagana.

5Me dou ti kalina nogo ia igoe ko nongia na God Susuliga Sosongo ke galuvego.

6Me ti vaga ke gotolaka manana nimu sasaga, mo totumale saviliu i matana,

maia God sauba ke mai me ke sangago,

me ke aragovisu vanigo tugua na valemu.

7Maia sauba ke tusuvanigo tugua ke danga sosongo bâ nimu omea

me ke liusia bâ na omea o tamanina tana idana.

8“Au nongigo ko padatugua na sasaga loki ara tamanina igira na tinoni loki ni sau;

mo ko vilekedoua na manana vaga e totu i laona niqira sasaga igira na mumuada.

9Na maurida igita e kurikuri lê, migita a tau lelê donaginia sa omea;

ma liu putsi i barangengo vaga moa na auau lê e vano putsi me nanga.

10Me dou ti ko tamivanigira na mane sasaga ni sau kara sasanigo;

mo ko rongomi vatavidoua na omea igira ara tsarivanigo:

11“E tau tangomana na gaugau ke vovo dato tana nauna e tagara na kô;

me utu goto na tsodoana tana nauna e tagara na bokoboko.

12Me ti vaga na kô ke mamatsa lê, migira na gaugau sauba kara ida kara ruase lê kalina ara boruboru moa,

me ke tau vati tugua na kaviana ma na nauginiana sa omea.

13Migira na tinoni ara tau tutunina God ara vaga saikesa moa na gaugau;

mi kalina ara padalea God me gini nanga lê saikesa niqira amesi.

14Ara norua moa kesa na laolao lê e logoa na komitsi ke tangoligira.

15?Me ti vaga kara vataragi tana valena komitsi, me laka sauba ke tangoligira?

?Me ti vaga kara tatango bâ i konina kesa na laolao, me laka aia sauba ke sangagira na tukakai?

16Igira na tinoni vanga nauseko ara vovodato vaga moa na buruburu i laona na aso papara,

mara viri poko bamai pipi nauna i laona na uta,

17ma na lamuqira ara tatango kakai tana vatu.

18Me ti vaga kesa ke vutiligigira,

me sauba ke tau goto dona kesa laka ara totu i tana tana idana.

19Eo, e mana, igira sui ara sove tania God e kurikuri lê niqira tagu na mage.

Mi kalina kara mate ma kara mai visana ma kara adia na sasaqira.

20“Maia God e utu ke sove tania sa tinoni e totugoto i matana,

se ke sangagira na tinoni vanga tsutsukibo.

21Maia sauba moa ke tamivanigo mo ko donatugua na kiakia ma na gudato tana mage,

22me ke paluvangamaqira igira ara reisavigo igoe,

ma na valeqira igira na tinoni vanga tsutsukibo sauba kara viri nangaligi lê.”