“Igira na tinoni ara tsaia na baba loki i laona na kao

agana na laveana na siliva ma na qolumila,

mara aqosigotoa na sasana tana kara kodogira ke gini vanoligi na papasa lê,

me ke totu moa na lakana na qolumila ma na siliva.

2Mara lavegotoa na tapala i laona na kao,

mara kodo rapasia na vatu agana na tsodoana ti vaga na tapalamila ke totu i laona.

3Ara tungia niqira bulu, mara liuvia na laona popono na kao i lao vasau i tana e rodo pulipuli,

mara lavegira na vatu e totu na tapalaka i laona.

4Ma na omea vaga ia ara tau dona na aqosiana tana nauna varangisia tana ara totu na tinoni.

Ara aqosia moa i longa vasau i tana e tau liu sa tinoni.

Migira segeniqira moa ara totu i tana,

mara soria na ropu katsi agana niqira mani dato tsuna kalina ara aqo i laona na qou loki ia.

5Na tinoni ara aqosi uta i kelana na kao,

mi vavana na kao ia, ara rapasigira na vatu mara pilo bamaia na kao,

me ke vaga moa ti na lake e liu i laona.

6Mi laoqira nogo na vatu ara totu tana, ara totu na vatu bora angaanga,

mi tana papasana nogo e totu na qolumila.

7Me tagara goto sa manuloki ke donaginia na sautu e liu bâ i tana,

se sa manusata ke dona na lovo gaukuti ba i konina.

8Me tagara goto sa laeone, se sa omea atsi veveiga tavosi,

ke dona na liu bâ i koniqira na sautu mangu lê vaga gira.

9“Na tinoni ara tsaigira na maragova kakai sosongo,

mara tsai tsoragira na tuaqira na vungavunga.

10Mi kalina igira ara puta ovatia na maragova,

mi tana ara ba reigira danga na vatu angaanga loki matena.

11Mara tsatsai poi ara ba tsau i tana e vura datomai na kô,

mara adimaigira tana mararana na omea loki matena ara tsodogira i tana.

12?Ma na sasaga loki iava nomoa tangomana ka ba tsodoa?

?Miava i tana tugua ka ba sasania na padagadovi omea?

13“Na sasaga loki e utu saikesa na tsodovulagiana i koniqira na tinoni lê;

me tagara goto ke kesa ke donaginia laka e koegua na douna popono.

14Ma na maona na kema ma na tasi,

ara tsaria laka na sasaga loki ara tau nogo tsodoa i tana.

15-19Me ti vaga kesa ke ngaoa na voliana na sasaga loki,

ma na qolumila ma na siliva ara tau tugua na voliginiana.

Na vatu angaanga loki matena, ma na tseu qilasi,

ara tau goto matega loki atsa kolua aia.

Ma na matana davi dou bâ, ma na qolumila laka saikesa,

ara tau goto vati tugua na voliginiana na sasaga loki.

20“?Me laka iava nomoa na uluna na sasaga loki?

?Miava tana ka ba sasania na padagadovi omea?

21E tagara goto sa omea mamauri tangomana ke reilakana.

Me atsa moa goto ti sa manu e lolovo i gotu me tagara goto.

22Ma na barangengo na mate e tsarivaganana goto,

‘Minau goto au rongomia na goko lovolovo lê tana rongona na sasaga loki, mau tau moa reilakana.’

23“Maia moa God e donaginia na sautuna,

Ma na nauna i tana e totu na sasaga loki.

24Rongona aia segeni moa e morosi poponoa na barangengo,

Me reigira pipi sui na omea ara totu i vavana na masaoka.

25Kalina God e sauvania na guguri na susuligana,

Me titivania i tana ke vosa bâ na damama na tasi;

26Mi kalina God e pedevania iava tana ke tumu bâ na usa,

Miava tana ke poda na vivisa,

27Mi tana nogo aia e reia na sasaga loki, me tovovania na douna,

Me reingaoa me molovania ke totu kalavata.

28Ma God e tû me tsarivaganana vanigira na tinoni,

‘Ti vaga kamu ngaoa kamu tamanina na sasaga loki,

ma nimui aqo kamu kukuni tania na Taovia.

Me ti kamu ngaoa kamu dona na padagadovi omea,

ma nimui aqo kamu piloligi tania pipi na nauseko.’ ”