1Mi tana ma Sopar e tû me tsaria,

2“A Job, nimu goko igoe e sekoli sosongolia na tobaqu

me siloviau na tuguvisuana.

3Ma nimu goko sui igoe o tsaria o gini palu tu vangamamami manana tugami,

minau au dona rago na omea kau tsarivisu vanigo.

4“Migoe o dona dou sosongo nogo laka e tu mai nogo tana tuturigana

kalina God e moloa na kesanina tinoni tana barangengo,

5me tagara nogo sa tinoni vanga tsutsukibo ke dona na magemage oka.

6Tangomana aia ke dato susuliga me ke suâ na masaoka,

me ke pelea na parako na lovana,

7maia sauba moa ke nangaligi lê vaga moa na papasa.

Migira sui ara donaginia i sau sauba kara tsaria, ‘?Laka iava e liu bâ aia?’

8Maia sauba ke nangaligi lê vaga moa na bolebole tana bongi,

ma kara tau goto reitugua.

9Me sauba ke nangaligi tania na nauna i tana aia e totu i sau;

10migira na dalena sauba kara tuguvisua na omea aia e komia i koniqira na tinoni ara tau tamanina sa omea.

11E vaolu sosongo rago na konina me susuliga,

me sauba moa ke tau oka me ke lia lê na papasa.

12-13“Na tinoni vanga tsutsukibo e padangao sosongolia na nauseko me tau goto ngaoa na mololeana,

vaga moa kalina kesa e padangaoa na ganiana na mutsa puipui,

me moloa i vavana na lapina gana ke gini totu oka na puina.

14Mi laona na tobana na mutsa puipui aia e gania e oli me vavai,

vaga moa na vavaina na omea ara dona na gini tabatu tinoni.

15Maia na tinoni vanga tsutsukibo e mumutaligira sui na omea levolevo aia e komigira;

God e adivisugira sui atsa moa ti ara totu nogo i laona tobana.

16Ma nagua sui moa aia na tinoni vanga tsutsukibo e konomigira,

migira ara vaga saikesa nogo ti na tabatu vania;

mara matesia vaga moa ti nina veiga kesa na muata vogata.

17Ma na tinoni ia e padâ laka sauba ke gini magemage

me ke gini totudou na omea aia e komigira.

18Me sauba moa aia ke mololegira na omea sui e gini rota tana aqo mateqira;

me ke tau goto tamani taguna na gini magemage nina omea levolevo sui,

19rongona aia e bingi sekoligira na tinoni ara tau tamanina sa omea me sove na sangaaqira,

me laugira lê na vale igira na tinoni tavosi ara rota na logoaqira.

20Me utu goto ke vatsa na nauana na susugu.

21Mi kalina e mutsa gana, me tau goto dona ke molovisua sa piqena.

Bâ, mi kalina ia ma nina omea tatamani sui ara nanga lê sui.

22Tana tagu tsotsodo aia e gini magemage nina omea dangadanga,

me sauba kara nangaligi sui tania, me ke tau goto tamanina sa omea.

23!Molovania ke gania pipi na omea sui aia e padangaoa!

God sauba ke kedeginia nomoa tana nina momosatoba loki.

24Me ke molomaigira visana gana gala kolua niqira isi tapala ma niqira parige tapalamila.

Me ti vaga na mane ia ke savilaginia na isi tapala,

me sauba na pipili tapalamila ke tsuku tsapatugu tana kokorana,

25me ke katsa laba tabana.

Mi kalina aia ke reia na gabu e roro tana pipili maia ke matagu mate.

26Me pipi sui lakalaka na omea aia e tamanina sauba kara viri seko takuti;

ma na lake ara tau soqoiginia na limana tinoni

ke iruvia aia kolugira sui nina tamadale.

27Na baragata sauba ke adilabatigira i malena nina sasi na mane ia,

ma na barangengo sauba ke tatamanga gana.

28Na korena God sauba ke obotigira pipi sui lakalaka nina omea tatamani.

29“Aia nogo ke vaga na kede e totupitugira na tinoni vanga tsutsukibo,

na kede aia God e pede manogatinogoa vanigira.”