1Ma Job e tsarigotoa,

“!Eo, mi kalina ia migira na tinoni vaolu ara tû mara gilugaqu!

Ma na tamaqira nogo igira ara tinoni sekoseko lê,

me utu kau tamivanigira kara sangagira niqu pai na mataliaqira niqu sipi.

2Igira ara matemateaga lê, me tau lelê tugugira na nauvaniaqu sa niqu aqo.

3Ara tau saikesa tamanina sa omea, mara vitoa mate,

mara ba qatagira moa na lamuna gai makede tana nauna mamatsa lê.

4Ara vutikaegira na omea ara dato lê tana kaomate mara ganigira,

me atsa moa goto ti na lamuna gai vavai mara ganigotoa kolu rauna.

5Mi kalina ti ara mailaba varangi kesa tana vera, migira na tinoni ni tana ara tsiagira,

mara gulaginigira vaga moa ti na mane komi.

6Mara ba totu ravi i laona na vatuluma,

ma na baba ara tsaigira tana maragova.

7Ara viri leleo vaga moa na omea tuavati atsi i laona na kaomate,

mara vaikapitsigi i vavaqira na gai tetelo ara dato i tana.

8!Igira na alaala na tinoni sekoseko lê, me tau goto tugua na soaginiaqira sa omea!

Mara tsialigigira lê tania na veraqira.

9“Mi kalina ia, migira nogo ara mai mara kiataginiau inau;

mau lia niqira omea na molokia ma na gilu.

10Igira ara reipeaau inau;

mara pada laka ara dou bâ liusiau,

mi kalina ara mai varangi i koniqu, mara tsuvelia na ngoraqu.

11Me rongona God nogo e molotsunaliau vaga ia, mau gini tau goto susuliga,

ti igira ara gini tau matagu na sekoliaqu.

12Na alaala na mane tsaikore girani ara vangaraua na sekoliginiaqu inau,

mara mai kaleau saviliu inau mara tsialigiau;

13Ara ponoti vaniau niqu sautu me gini utu vaniau kau tsogo;

mara pabovaniau goto bâ niqu rota,

me tagara goto kesa ke utusigira.

14Ara maiginiau vaga moa na alaala na mane vaumate kalina ara ba bokia kesa na verabau mara sage i laona,

mara vunu vataviau.

15E ngoli sosongoliau na matagu;

ma gaqu tangirongo e nangaligi sui vaga moa kalina na guguri e puasalaligigira lê na rau matemate,

migira sui niqu omea tatamani ara viri nanga lê sui vaga moa na kolina na guguri e lovosagini lea na parako.

16“Mi kalina kiki ia minau au totu vania moa na mate,

e tagara nogo sa tatalina na rota e gadoviau.

17Mi tana bongi ma na suliqu sui lakalaka ara viri sosongo;

ma na vatsangisavi e gitsiau me tau goto ngaoa ke totupuka.

18God e tatavaniau na liona na poloqu,

me buni lokulokugira na poloqu sui.

19Aia nogo God e tsonitsunaau i laona na bokoboko,

mau lia vaga moa na papasa lê ma na tora.

20“Eo niqu God, inau au ngangaidato vanigo, migoe o tau lelê tuguvisu vaniau niqu goko;

mi kalina inau au nonginongi vanigo, migoe o tau goto boeginiau.

21O tau lelê galuveau, mi tana susuligamu popono o rotasi sosongoliau moa.

22Mo tamivania na guguri me puasalaligiau;

mo kabokelisiau bamai i laona na qalina na koburu loki.

23Eo, inau au dona nogo laka igoe o vangaraunogoa na matesiaqu,

ma na moloaqu bâ i tana sauba kara totu igira na tinoni sui.

24?Megua igoe ti o ba tsangagotoa aia na tinoni e seko pitsu nogo,

aia e tau nogo tugua sa omea me totu matengana moa na nongi galuve?

25?Me laka inau au tau ngangai kolugira na tinoni ara totu tana rota,

mau tau galuvegira igira ara kili sasanga?

26Mi kalina inau au amesia laka ke dou na mauriqu, me laba vaniau na rota,

mi kalina au pitua na marara, me labamai vaniau moa na rodo pulipuli.

27Inau au gini seko pitsu na padasavi ma na sosongo;

me pipi dani moa e tau kuti na gadoviaqu na rota.

28Na vatsangisavi moa e naua me gini bora na kokoraqu, me tau tana rongona e rangiau na aso;

au totu malemale i levugaqira na toga mau ngasugira kara sangaau.

29Tana niqu rota loki inau au ngangai vaga moa ti na pai atsi se na tsou.

30Mau gini popogo popono na masagi, me boraboraga na kokoraqu.

31Mi tana nauna i tana au rongomia na tatangina na magemage tana idana,

au rongomia moa na tangitangi ma na ngangai kalina ia.”