Siraw Ar-āri a Inābak ni Moyses
1Siraw tawotawo no Israel, ki nasākop darana iyaw tana do dayāen no Oksong Jordan a yapo do payahosongan no Arnon a manda do ammyānan do Tokon a Hermon kontodo tabo tana do dayāen Araba. Inābak da saw dadwaw a āri. 2No asa a āri, ki si Sihon a āri dan Amoreo a nangitoray yapo do Hesbon. Ki iyaw pagtorayan naw, ki yapo do Aroer do payis no payahosongan no Arnon, kan yapo do hobok no payahosonganaw a manda do Oksong a Jabbok a iyaw pandan dan Ammonita, as kan nairāman godwa no tana a Gilead. 3Intorayan na paw dayaēn Araba a yapo do Minānga a Kinneret a kominwan do abagātan do Bet-jesimot do dayāen no Nadiman a Tāw, kan kominwan do atngeh no Tokon Pisga.
4Siraw tawotawo no Israel, inābak da pa si Og a āri do Basan a iya asa dyirad kapanawdyanaw a kapotōtan dan Repaim. Nangitoray yapo do Astarot kan Edrei. 5Ki iyaw pagtorayan naw, ki nairāman Tokon a Hermon, Salekah, kan tabo no Basan a manda no payis no Gesor kan Maakah, kan godwa no tana a Gilead a manda no payis no tana ni Āri Sihon do Hesbon.
6Si Moyses a pachirawatan ni ĀPO kan siraw Israelita saw, ki inābak da no nya dadwa a āri. Intoroh ni Moyses tana da dyirad trībo saw a Ruben, Gad, kan Mamandāya a Manasses, a pinakabinglay da.
Siraw Ar-āri a Inābak ni Joswe
7Si Joswe kan siraw tawotawo no Israel, ki inābak da saw tabo ar-āri do tana do laōden no Oksong Jordan a yapo do Baal-gad a myan do Payahosongan Lebanon a manda do Tokon a Halak a myan do abagātan a masngen do Seir. Pinaychakarwa ni Joswe iyaw nya tana dyirad trībo saw, kan intoroh na dyira a pinakabinglay da. 8Iyaw nya binglay da, ki nairāman no katokotokonan, paytoytokonan saw do lāod, do tana a Araba kontodo barikir saw, do let-ang, kan do tana no Negeb. Siraw minyan do nya saya tana, ki siraw Heteo, Amoreo, Kananeo, Pereseo, Hibeo, kan Jeboseo. 9Siraw tawotawo no Israel, ki inābak daw kāda āri do kāda idi a Jeriko, Ai a masngen do Betel, 10Jerosalem, Hebron 11Jarmot, Lachis 12Eglon, Geser 13Debir, Geder 14Hormah, Arad 15Libna, Adollam 16Makkeda, Betel 17Tappoah, Heper 18Apek, Lasaron, 19Madon, Hasor, 20Simron-meron, Aksap, 21Taanak, Megiddo, 22Kedes, Jokneam do Karmel, 23Dor do aptan, Goiim do Galilya, 24kan Tirsa. Tabo nya saya āri, ki tatdo a poho kan asa.