1Siraw nyaw tana a pinakabinglay a narawat dan tawotawo no Israel do Kanaan do laōden no Oksong Jordan a pinaychakarwa da Eleasar a pādi, Joswe a pōtot ni Non, kan siraw pangpangōlo daw no partīdos no Israel. 2Iyaw pinakabinglay da saw a tana no sasyam kan godwa a trībo, ki nabinglay dyira sigon do nabōnot daw a akmas inbilinaw ni ĀPO di Moyses. 3-4Ta siraw dadwaw kan godwa a trībo, tinorohan dana sa ni Moyses so pinakabinglay da do dayāen Oksong Jordan. (As siraw kapotōtan ni Jose, ki naibidang sa a dadwa a trībo a sa Manasses kan Epraim.) Ki intoroh naba ni Moyses tanaw a pinakabinglay dan Lebita saw. Iya lang dyira da, ki idiidi saw a pagyanan da kontodo papasto a pagarāban dan bāka kan karniro da saw. 5Dawa, naychakarwan dan tawotawowaw no Israel tanaw a akmas inbilinaw ni ĀPO di Moyses.

6Do kayan da paw do Gilgal,* nangay pinakainawan da saw no trībo no Joda di Joswe. No asa dyira, ki si Kaleb a pōtot ni Jeponne a asa Keneseo, kan binata na di Joswe a kāna, “Chapatak mo naw inbaheyaw ni ĀPO di Moyses a tawo no Dyos do Kades-barnea a maynamot dyimo kan maynamot dyaken. 7Apat a poho a katawen ko do nakatoboyaw ni Moyses a pachirawatan no Dyos dyaken yapo do Kades-barnea a mangispya so nya tana. Inpadāmag ko dya iyaw oyod a yapo do manamonamo a pangtoktwan ko. 8Ki siraw rārayay ko saw, ki inamomo da saw tawotawo. Ki aran komwan, nainpapōswan a inonotan ko si ĀPO a Dyos ko. 9Dawa, do dāwri a araw, insapata ni Moyses dyaken a kāna, ‘Sigorādo a iyaw tanaw a nanakeyan mo, ki dyira monchi kan kapotōtan mo a abos pandan, ta nainpapōswan a inonotan mo si ĀPO a Dyos ko.’ 10Chiban mo pa. Akmas inbaheyaw ni ĀPO, inaywanan na yaken a nāw ko a sibibyay do apat a poho kan dadima katawen a nakayapo do nakaibahey naw so nya di Moyses do nakapanakey daw no tawotawo no Israel do let-ang. Wawaho danaya poho kan dadimaw tawen ko sicharaw. 11Mayit ako pas changori akma do arawaw a nakatoboy dyaken ni Moyses. On, no kayit ko, ki akmas sīgodaw a kangay ko a machigobat. 12Changori, itoroh mo pa dyaken iyaw nya katokotokonan a iyaw inkaryaw ni ĀPO do dāwri a araw. Do nakaipadāmag kwaw kan no rārayay ko saw so nya, imo mismo a nakadngey a omyan sa daw siganti saw a mayngaran so Ānakim,† kan rarakoh kan naahadan a idiidi da. Ki an myan pakono sidong ni ĀPO dyaken, payyayohen ko sanchi a akmas inbaheyaw ni ĀPO.”

13Do dāwri, binindisyonan ni Joswe si Kaleb a pōtot ni Jeponne, kan intoroh na dya iyaw idi a Hebron a pinakabinglay na. 14Dawa, aran manda sichangori, Hebron, ki pinakabinglay da pan kapotōtan ni Kaleb a pōtot ni Jeponne a Keneseo, ta polos a dyi na aryan kapagtalek na di ĀPO a Dyos no Israel. 15Do nakarahan, iyaw ngaran no Hebron, ki Kiryat-arba. As si Arba, ki iyaw nagdindināmag a mahakay dyirad Ānakim.

Do dāwri, nayhāt sa nachigobat do dawri a tana.