1Siraw pangpangōlo dan Lebita, nangay sa da Eleasar a pādi, Joswe a pōtot ni Non, kan siraw pangpangōlo dan kadwan saw a trībo no Israel. 2Dawri do Silo do tana a Kanaan, binata dan Lebita dyira a kon da, “Si ĀPO, inbilin na di Moyses a matorohan kami so idiidi a pagyanan namen kontodo papasto a para animal namen.”* 3Dawa, akmas inbilinaw ni ĀPO, nanoroh saw Israelita dyirad Lebitaw so pinakadyira daw do kadwan saw a idiidi kontodo papasto da.

4Siraw nanma saw a Lebita a natorohan so idiidi, ki dyirad partīdos saw no Kohat† a kapotōtan ni Aaron a pādi. Narawat daw asa poho kan tatdo a idiidi a yapo do pinakabinglay a tana dan trībo no Joda, Simeon, kan Benhamin. 5Siraw kadwan saw a partīdos no Kohat a dya papādi, ki natorohan sa so asa poho a idiidi a yapo do pinakabinglay a tana dan partīdos saw no trībo no Epraim, Dan, kan Mamanlāod a Manasses.

6Siraw kapotōtan ni Gerson, natorohan sa so asa poho kan tatdo a idiidi a yapo do pinakabinglay a tana dan partīdos saw no trībo no Issakar, Aser, Naptali, kan Mamandāya a Manasses, do Basan.

7Siraw kapotōtan ni Merari pati kāda partīdos, natorohan sa so asa poho kan dadwa a idiidi a yapo do pinakabinglay a tana dan trībo no Ruben, Gad, kan Sabalon.

8Dawa, nanoroh saw Israelita dyirad Lebita so nya saya idiidi kontodo papasto da a naikeddeng do nakapagbibinōnot daw a akmas inbilinaw ni ĀPO di Moyses.

9-10Siraw nyaw ngarangaran dan idiidi a yapo do pinakabinglay a tana no trībo no Joda kan Simeon a naitoroh dyirad kapotōtan ni Aaron a yapo do partīdos a Kohat a kapotōtan ni Lebi. As iyaw naikeddeng a manma a mangrawat, ki nangay dyira. 11Natorohan sa so idi a Kiryat-arba‡ mana Hebron kontodo omdibonaw a papasto do katokotokonan no Joda. Arba, ki kapoonan ni Ānak. 12Ki siraw bengkagaw no idi kan siraw omdibon a sīcho, naitoroh darana di Kaleb a potōt ni Jeponne a pinakabinglay na a tana.

13Dawa, dyirad kapotōtan ni Aaron a pādi, intoroh daw idi a Hebron kontodo omdibonaw a papasto. (Hebron, ki asa dyirad idiidi a pagkamītan no makadimanaw so tawo a dyi na ingagāra.) Intoroh da paw nya idiidi kontodo omdibonaw a papasto da a sa Libna, 14Jattir, Estemoa, 15Holon, Debir 16Ain, Jotta, kan Bet-semes. Sasyam no bidang no idiidi a yapo do nya dadwa a trībo no Joda kan Simeon. 17Yapo do pinakabinglay a tana no trībo no Benhamin, naitoroh apat a idiidi a sa Gibeon, Geba, 18Anatot, kan Almon kontodo papasto da. Apat no bidang no idiidi. 19Asa poho kan tatdo no tabo idiidi kontodo papasto da a naitoroh dyirad papādi a kapotōtan ni Aaron.

20Siraw kadwan saw a partīdos no Kohat a Lebita a dya papādi, ki natorohan sa so idiidi a yapo do trībo no Epraim. 21Natorohan sa so apat a idiidi a sa Sikem do katokotokonan no Epraim a asa dyirad idiidi a pagkamītan no makadimanaw so tawo kontodo papasto na saw, Geser, 22Kibsaim, kan Bet-horon kontodo papasto da. 23Yapo do pinakabinglay a tana no trībo no Dan, naitoroh apat a idiidi a sa Elteke, Gibbeton, 24Aidyalon, kan Gat-rimmon kontodo papasto da saw. 25Yapo do pinakabinglay a tana no Mamanlāod a Manasses, naitoroh dadwa a idiidi a sa Taanak kan Gat-rimmon kontodo papasto da saw. 26Asa poho no tabo idiidi kontodo papasto da saw naitoroh dyirad kadwan saw a partīdos dan kapotōtan ni Kohat.

27Siraw kapotōtan ni Gerson a asa partīdos no trībo no Lebi, naitoroh dadwa a idiidi kontodo papasto da saw yapo do pinakabinglay a tana no Mamandāya a Manasses a sa Golan do Basan a asa dyirad idiidi a pagkamītan no makadimanaw so tawo, kan Beestera. 28Yapo do pinakabinglay a tana no trībo no Issakar, naitoroh apat a idiidi kontodo papasto da saw a sa Kision, Daberat, 29Jarmot, kan En-gannim. 30Yapo do pinakabinglay a tana no trībo no Aser, naitoroh apat a idiidi kontodo papasto da saw a sa Misal, Abdon, 31Helkat, kan Rehob. 32Yapo do pinakabinglay a tana no trībo no Naptali, naitoroh tatdo a idiidi kontodo papasto da saw a sa Kedes do Galilya a asa dyirad idiidi a pagkamītan no makadimanaw so tawo, Hammot-dor, kan Kartan. 33Asa poho kan tatdo no tabo idiidi kontodo papasto da saw naitoroh dyirad partīdos a Gerson.

34Siraw kadwan a Lebita a partīdos a Merari, ki naitoroh apat a idiidi kontodo papasto da saw yapo do pinakabinglay a tana no trībo no Sabalon a sa Jokneam, Kartah, 35Dimnah, kan Nahalal. 36Yapo do pinakabinglay a tana no trībo no Ruben, naitoroh apat a idiidi kontodo papasto da saw a sa Beser, Jahas, 37Kedemot, kan Mepaat. 38Yapo do pinakabinglay a tana no trībo no Gad, naitoroh apat a idiidi kontodo papasto da saw a sa Ramot do Gilead a asa dyirad idiidi a pagkamītan no makadimanaw so tawo, Mahanaim, 39Hesbon, kan Jaser. 40Asa poho kan dadwaw no tābo idiidi a naitoroh dyirad partīdos a Merari.

41-42Yapo do pinakabinglay a tana dan tawotawo no Israel, apat a poho kan wawaho a idiidi kontodo omdibonaw a papasto da, ki naitoroh dyirad Lebita.

43Dawa, nanoroh si ĀPO do tawotawo no Israel so tabo tana a insapata na a itoroh dyirad kapoonan da. As do nakasākop daw sya, minyan sa daw. 44As nanoroh si ĀPO dyira so talna da do intīro a tana a akmas insapata naw dyirad kapoonan da. Abaw aran asa dyirad tabo kabōsor da sa iyaw maparin a mangābak sira, ta si ĀPO nanoroh so kapangābak dan Israelita dyirad tabo kabōsor da. 45Abaw aran asa dyirad tabo maganay a kari ni ĀPO dyirad tawotawowaw no Israel iyaw dya natongpal. Tabo inchirin ni ĀPO, ki oyod a natongpal.