1Do kamalkēm danaw ni Joswe, nachisisirin si ĀPO dya a kāna, “Malkēm ka naya, ki āro paw tana a machita sākopen. 2Nya pa saw tana a natokos a sakōpen nyo do tabo tana dan Pilisteo kan Gesorita:* 3yapo do Oksong Sihor do dayāen no Egipto a komwan do idi a Ekron do ammyānan. Naibidang nya dyirad Kananeo a tana dan dadima ar-āri dan Pilisteo do Gasa, Asdod, Askelon, Gat, kan Ekron as kan tana da no Abbim 4do abagātan. As do ammyānan, siraw nya dyi pa nasākop, ki tabo tana dan Kananeo kan Mehara† a dyira da no taga Sidon, kan manda do Apek do tana dan Amoreo. 5As myan paw tana dan Gebalita, kan tabo Lebanon do dāya a yapo do Baal-gad do ibaba no Tokon a Hermon a manda do Lebo-hamat. 6As siraw tabo minyan do katokotokonan saya a yapo do Lebanon a manda do Misrepot-maim a siraw tabo taga Sidon, yaken anchi a mismo mapayyayo dyirad kabōsor nyo do kalongo dan Israelita. Ki machita mo a binglayen tanaw a itoroh dyirad Israelita saw a akmas inbilin kwaw dyimo. 7On, paychakarwahen mo nya tana dyirad sasyam saw a trībo kan do rayayaw a trībo no Manasses a pinakabinglay da.”

8Siraw trībo no Ruben, Gad, kan Mamandāya a Manasses, ki rinawat daranaw tana a pinakabinglay da do dayāen no Oksong Jordan a intoroh ni Moyses a pachirawatan ni ĀPO. 9Iyaw tana da, ki yapo do idi a Aroer do payis no payahosongan no Arnon,‡ kan yapo do idyaw do hobok no nawri a payahosongan, kan nairāman tabo tanap yapo do Medeba a manda do Dibon.§ 10Nairāman paw tabo idiidi ni Sihon a āri dan Amoreo a nangitoray a yapo do Hesbon, kan manda do tana da no Ammonita. 11Nairāman paw tana a Gilead a tana da no tawotawo no Gesor kan Maakah, tabo no Tokon a Hermon kan tabo a Basan a manda do Salekah.* 12Nairāman iyaw pagāryan no Og, iya asa dyirad kapanawdyanaw a kapotōtan dan Repaim a nangitoray do Astarot kan Edrei. Inābak ni Moyses saw nya tawotawo kan pinaksyat na sa. 13Ki siraw Israelitaw, ki pinaksyat da sabaw no tawotawo no Gesor kan Maakah. Dawa, omyan sa pa dyirad Israelita.

14Ki do trībo no Lebi, abaw intoroh ni Moyses a tana da. Ta iyaw dyira da, ki yapo do binglay no dāton da saw a masosohan a para di ĀPO a Dyos no Israel a akmas inbaheyaw ni ĀPO di Moses.

15Intoroh ni Moyses do trībo no Ruben tana daw sigon do kāda partīdos. 16Iyaw pinakabinglay da a tana, ki yapo do idi a Aroer do payis no payahosongan no Arnon, kan iyaw idi do hobok no nawri a payahosongan, kan tabo tanap a masngen do Medeba. 17Nairāman Hesbon kan tabo idiidi saw do tanap a Dibon, Bamot-baal, Bet-baal-meon, 18Jaas, Kedemot, Mepaat, 19Kiryataim, Sibma, Saratasar do paytokonan no payahosongan, 20Bet-peor, barikir saw no Tokon a Pisga, kan Bet-jesimot. 21Nairāman tabo idiidi do tanap kan no intīro a pagāryan ni Sihon a āri dan Amoreo a nangitoray a yapo do Hesbon. Inābak ni Moyses si Sihon kan siraw magtotoray saw no Midyan a sa Ebi, Rekem, Sor, Hor, kan Reba. Sira tabo, ki minyan do dawri a tana, kan nachipagtoray sa di Sihon. 22Siraw Israelita, ki inrāman da pa diniman asaw a nagosar so madyik a mamadto a si Balaam a pōtot ni Beor. 23As iyaw payisaw no tana no trībo no Ruben do lāod, ki iyaw Oksong Jordan. Siraw nya saya idiidi kan siraw dēdekeyaw a idiidi da, ki pinakabinglay no trībo no Ruben sigon do kāda partīdos.

24Intoroh ni Moyses do trībo no Gad tana daw sigon do kāda partīdos. 25Iyaw pinakabinglay da a tana, ki nairāman Jaser, tabo idiidi no Gilead, kan godwa no tana no Ammon a manda do Aroer do dayāen no Rabba. 26Iyaw tana da, ki yapo pa do Hesbon a manda do Ramat-mispa kan Betonim, kan yapo do Mahanaim a manda do tana no Debir. 27As do Payahosongan Jordan, ki nairāman Bet-haram, Bet-nimra, Sokkot, Sapon, kan iyaw kadwan pa do pagāryan ni Sihon a āri do Hesbon. As iyaw payis naw do lāod, ki iyaw Oksong Jordan a manda do tokaranaw no Minānga a Kinneret. 28Siraw nya saya idiidi kan siraw dēdekey a idiidi da, ki pinakabinglay no trībo no Gad sigon do kāda partīdos.

29Intoroh ni Moyses do Mamandāya a Manasses, tana daw sigon do kāda partīdos. 30Iyaw pinakabinglay da a tana, ki yapo do Mahanaim kan nairāman tabo no Basan a intīro a pagāryan ni Og a āri no Basan, as kan tabo anem a poho a idiidi a sinākop ni Jair† do Basan. 31Nairāman godwa no tana a Gilead kan siraw idiidi a Astarot kan Edrei a siraw idi no pagāryan ni Og do Basan. Siraw tabo nya saya, ki pinakabinglay no godwa dan partīdos no kapotōtan ni Makir a pōtot ni Manasses.

32Nyaw nakapaychakarwa ni Moyses so tana do dayāen no Jeriko kan Oksong Jordan do kayan naw do tanatanap saw no Moab. 33Ki do trībo no Lebi, abaw intoroh ni Moyses a pinakabinglay da. Ta si ĀPO a Dyos no Israel, ki inkari na a iya mismo pinakabinglay da.‡