Uni kato o yuwoyó khono raŋaró ŋuro tapara mande
(Mak 4:1-20; Luk 8:4-15)
1Ŋu naruko ŋuno naŋge Yesu ya noŋgo mirako umburo Galili Sono Towo tapémo kunditaró. 2Kunditiní unipare qambu parámi wuririyoyi waŋgo tomó ta quroko uro sono saŋano kunditero mande yimiraró. Yimironí unipare soso sono towo tapémo ŋuno kaŋaŋgurí. 3Ŋuno kaŋeyuri tapara mande yero o parámi yimiraró. Ŋande yaró, “Iŋoyi, naru kano uni kato o yuwoyó khono se kuriyaró. 4Kuriyoníqo, kumi muko kheko umbuyi númbo mahero nemukaŋgurí. 5Kowe kumi muko noko wondo seqemo quno ŋuno umburo noko ŋuno waka ta toŋí raŋoro wotaŋgurí. 6Quko hurí meté kama uró. Ŋuroko wotiqo, kosako qeniní asáqaŋgurí. 7Kumi kakari keweroko umburo wotaŋgurí, ko kakari muko noko kiruwó wosoro kosa saki riní eŋgé kama taŋgurí. 8Kowe kumi muko noko meté muno ŋuno umburo wotiqo, kumi eŋgé 100, kumi 60, ko kumi 30 ŋundiro eŋgé taŋgurí. 9Asa uni ka kusumbí moré tiníqo, mande ŋa iŋoní.”
10Tukúko iŋo-iŋo rewero unindo mahero Yesu ŋande oseseyaŋgurí, “Ke date koro tapara mande yero mande ka unipare yimitoyote?”
11Yi mande topé ŋande yaró, “Dokoro sambo simburímbo unipareyó wiri yereyote naruyó ŋuro mande tapuŋowí kumi rondaqe ye yunanowó, unipare meyowo ŋu kama yunanowó. 12Uni ka o kumi towote tiníqo, Anutuko o kumi kaŋuya saŋanímo rero inoní parámi towoweya. Ko uni oyó moré kini ŋuko, Anutuko o tomó ta qu towoyote ŋu siyoní kini teweya. 13Ŋa murí ŋaro naŋge nondo tapara mande ene yimitoyoteno, asa
“toŋeyembo toŋeteyoteŋgo,
quko oka kama qeneyoteŋgo.
Kusumboyembo iŋoyoteŋgo,
quko mande iŋoro iŋo-iŋo kama reyoteŋgo.
14Ŋu unipare ŋuko, Aisaia koro mande ka ŋuno hamó tunoqaró. Ene ŋande yaró,
“ ‘Yendo naru parámi mande iŋoyowaŋgo,
quko mande ŋuro murí kama iŋoyi tondaŋeweya.
Naru parámi qeneyowaŋgo,
quko kama iŋoyowaŋgo.
15Dokoro unipare ŋando newondeye komo kondéraró,
ko kusumboyembo meté mande kama iŋoyote,
ko toŋeye wisumuŋaŋgurí.
Toŋeyembo oka qenewaŋgo koro,
ko kusumboyembo oka iŋowaŋgo koro,
ko newondeyembo mande murí iŋowaŋgo koro,
ko rohoréŋoro nono mahi
nondo yorewe meté tewaŋgo koro.’
16Quko yendo puriŋo ka reteŋgo. Dokoro yeŋo toŋeyembo o qeneyote, kusumboyembo mande iŋoyote. 17Mande hamó yimiroteno, komo quno ye-ye uni qambu ŋuya uni roneneŋowí qambu ŋuyako o itaka qeneyoteŋgo ŋu qenewero surumí iŋoyaŋgurí, quko kama qeneŋgurí. Ko enendo mande itaka ye iŋoyoteŋgo ŋu iŋowero surumí iŋoyaŋgurí, quko kama iŋaŋgurí.
18“Ŋunde ŋuroko tapara mande uni yuwoyó khono kuriyaró ŋuro murí iŋoyi. 19Unipare soso qundo Anutuko unipareyó wiri yereyote naruyómboro mande iŋoyoteŋgo, quko kama iŋoyi tondaŋete, ŋuko yuwoyó kheko umbuŋgurí ŋundiro. Ŋunde ti Monimbuko mahero mande newondeyemo kuriyaró qu ŋu supiyo siyoyote. 20O yuwoyó noko wondo seqemo yote quno ŋuno umburó, ŋuko unipareto mandí ŋu iŋoro rero niŋgu-niŋgu teyoteŋgo. 21Quko hurí noko quroko kama uyote. Asa ko quhurí korowoyoteŋgope ma unindo ŋu mande ŋuro o piyimi te yunoyoteŋgo quno ŋuno waka ta rotoyoteŋgo. 22Ko yuwoyó kakari keweroko umbuŋgurí ŋuko ŋandiro: uni mande ŋu iŋoyote. Quko naru kano noko koro o quro iŋaŋawí teyote, ko mone parámi siyowero ŋuro murí ŋuko kanáŋoyote. O enesó ŋundo Anutu koro mande ŋu weheŋoní eŋgé moré kini. 23Kowe yuwoyó noko meté muno umbuŋgurí ŋuko ŋandiro: uni ŋundo Anutu koro mande ŋu iŋoro murí hamó-hamó iŋoyi tondaŋeyote. Ŋuko eŋgé teyoteŋgo, eŋgé 100pe ma 60pe ma 30.”
Komó piyimi khono woteyote ŋuro tapara mande
24Yesuko tapara mande kaŋuya ŋande yimiraró, “Sambo simburímbo unipareyó wiri yereyote naruyó ŋuko uni kato o yuwoyó meté mu khono rimiró ŋunde qembe. 25Asa uni rimiro eteyaró quno ŋuno saŋgirí kato mahero komó piyimi ŋuro yuwoyó siyoro wit keweroko ŋuno rimiro toŋeró. 26Wit wotero eŋgé tiníqo, komó piyimi ŋu ŋuya ŋuno woteyaró.
27“Asa kho simburímboro sunará simó kato uyaro ŋande miraŋgurí, ‘Awa, kepe o yuwoyó meté mu naŋge khokemo raŋarómbe, ma kini? Asa dokoro komó piyimi ŋuya ŋuno woteyote?’
28“Yi ŋande yimiraró, ‘Saŋgirí uni kato o ŋu taró.’
“Yiní oseseyaŋgurí, ‘Ke iŋoka nore uyareya komó piyimi ŋu kumo rato?’
29“Yi ŋande yimiraró, ‘Kini, ye komó piyimi ŋu kumoro wit ŋuya kumowaŋgo koro. 30Ye rotoyika irisa-irisa ŋuno woteyori. Eŋgé siyowero naruko ŋunoqota eŋgé siyowero uni ŋu ŋande yimirowano, “Koretero komó piyimi ŋu kumoro witumoro tepo qawero. Wit ŋu siyoro o newero yanemo ŋuno ri qembe.” ’ ”
Mastet yuwoyó ŋuro tapara mande
(Mak 4:30-32; Luk 13:18-19)
31Tapara mande kaŋuya ŋande yimiraró, “Sambo simburímbo unipareyó wiri yereyote naruyó ŋuko mastet koro musiyó ŋunde qembe. Asa uni kato mastet koro musiyó ŋu rero khoyómo rimiyoteŋgo. 32Musiyó ŋuko o khono woteyote kumi ŋuro taŋgurí ŋunde kini. Kini, ŋuko tomó ta horé. Quko wotero, yate parámi horé teweya ko o kate-kate khono woteyote ŋu takaro te parámi tunoqeweya. Asa ko númbo mahero kambinímo ŋuno ya reyoteŋgo.”
Yis ŋuro tapara mande
(Luk 13:20-21)
33Tapara mande kaŋuya ŋande yimiraró, “Sambo simburímbo unipareyó wiri yereyote naruyó ŋuko yis ŋunde qembe. Asa pare kato yis ŋu rero plaua parámi ŋuya huruworo rohoréŋoní koparó. Ko imemoŋgo plaua ŋu soso koŋero parámi taró.”
Tapara mande ŋuro murí
(Mak 4:33-34)
34Mande soso Yesuko unipare qambu yimiraró ŋuko tapara mandeko naŋge yeyaró. Enendo mande kako tapara mande kini ŋu kama yeyaró. 35Ŋu muríwore naŋge ye-ye unindo mande ka komo yaró riní hamó tunoqaró. Ŋande yaró,
“Tapara mande naŋge ye yimirowano,
mande ka komo suki-suki o quroko yora ŋuro yewano.”
Komó piyimi ŋuro tapara mande ŋuro murí
36Asa Yesuko unipare yorotoro ya quroko oró. Ko iŋo-iŋo rewero uniyó eneno mahero ŋande yaŋgurí, “Komó piyimi mu khono wotaró ŋuro tapara mande ŋuro murí ŋu ye nimito,” yaŋgurí.
37Yi mande topé ŋande yimiraró, “Uni ŋu taŋgurí meté qu kuriyaró, ŋuko Unindoro Naŋuní. 38Ko kho ŋuko noko parámi ŋa. Ko taŋgurí meté ŋu, ŋuko sambo simburímbo unipareyó wiri yereyote naruyómboro unipare meté qu. Ko komó piyimi ŋuko Monimbu koro unipareyó. 39Uni saŋgirí ŋundo o yuwoyó piyimi ŋu kuriyaró, ŋuko Monimbu. O rewero naruyó ŋuko naru weŋa qu. Kho uni o rewaŋgo ŋuko sambo simó naŋge.
40“Ŋunde ŋuroko komó piyimi ŋu koporo kewá qayote quno ŋuno qaŋgurí, ŋundiro naŋge naru weŋa quno ŋunde naŋge tewaŋgo. 41Unindoro Naŋunímbo sambo simóŋo asá yiriní enendo unindo unipare yowosoyi quhurí teyoteŋgo ŋuya uni hutuŋo mande wendaqeyoteŋgo ŋu soso wiri yereyote naruyó moŋgo se rotowaŋgo. 42Enendo yore raŋi kewá piyimi qayote quno ŋuno uwaŋgo. Kewáko ŋunoko tendo piyimi tero metoye kindotowaŋgo. 43Ŋu naruko ŋuno unipare roneneŋowí awayemboro wiri yereyote naruyómo kosa hiyóqeyote ŋundiro naŋge hiyóqewaŋgo. Uni ka kusumboye moré tiníqo, mande ŋa iŋoyi.
O meté parámi ka noko quroko yaró ŋuro tapara mande
44“Sambo simburímbo unipareyó wiri yereyote naruyó ŋuko ŋandiro. Uni kato o meté parámi ka noko kano noko quroko qenero rero kaŋuya tapuŋaró. Tapuŋoro hamó niŋgu-niŋgu tero uyaro onoŋoyó soso soweyoro uya noko ŋu kimaró.
Wondo sara meté horé karo tapara mande
45“Asa sambo simburímbo unipareyó wiri yereyote naruyó ŋuko ŋandiro. Situwi uni kato wondo sara kimoyó parámi ka kimowero quro seqayote ŋundiro. 46Seqayate wondo sara meté horé ŋunde qu qeneró, ko uyaro onoŋoyó soso soweyoro uya wondo sara ŋu kimaró.
Tirí-tirí karo tapara mande
47“Asa sambo simburímbo unipareyó wiri yereyote naruyó ŋuko ŋandiro. Unindo tirí-tirí ka re uro windiko raŋi uní sono qare murí-murí soso siyoyoteŋgo ŋundiro. 48Tirí-tirí ŋu maŋgoriní wosi tapémo mahiní kunditero sono qare meté-meté mu se kondó parámimo kopoteŋgo. Ko sono qare piyimi mu se raŋi ute. 49Asa naru weŋa quno ŋuno ŋunde naŋge tunoqeweya. Imemoŋgo sambo simómbo umburo uni piyimi, uni roneneŋowí keweroyemo yoteŋgo ŋu yorewaŋgo. 50Yorero raŋi kewá piyimimo uwaŋgo. Uro kewáko ŋuno tendo parámi tero metoye kindotowaŋgo.”
51Ŋunde yero Yesuko iŋo-iŋo rewero uniyó ŋu ŋande osese yereró, “Yembe mande ŋaro murí sosope iŋoteŋgope ma kini?”
Yiní mande topé yaŋgurí, “Iyo.”
52Yi ŋande yimiraró, “Ŋunde ŋuro uni ka hutuŋo mande ŋuro iŋo-iŋoyó moré ŋundo sambo simburímbo unipareyó wiri yereyote naruyó ŋuro iŋo-iŋo reyote, ŋu uni ŋuko ŋandiro. Enendo situwi yayó moŋgo rero, asa o keta quya o komo quya siyoro yendémo umbuyote.”
Nasaret unipareto Yesu huwóŋaŋgurí
(Mak 6:1-6; Luk 4:16-30)
53Yesuko tapara mande ŋu soso yesowoní kini temukoní yendé ŋu roto toŋeró. 54Toŋero eneŋo yendémo uyaro huru-huru yayemo ŋuno oro mande rondaqe yunaró. Yunoní iŋoro kondé yukuworo ŋande yaŋgurí, “Uni ŋuko iŋo-iŋo ŋu da noŋgo raró? Ene date teroqo, o wimbí moré ŋu teyote? 55Nore iŋoteto, uni ŋuko o towo-towo uni ŋuro naŋuní ka, Maria ŋuko eneŋo nimí. Ko Jems, Josep, Saimon ko Jutas ŋuko eneŋo kone-topé. 56Simó kuwí ŋuko, soso noreya yoteŋgo. Ene date o ŋunde qu teyote?” 57Ŋunde yero eneŋo piyimiŋoyaŋgurí.
Quko Yesuko ŋande yimiraró, “Yendé soso quno ŋuno unipareto ye-ye uni ará te inoyoteŋgo. Quko eneŋo mirayómo, yayó horémoko ará kama te inoyoteŋgo.” 58Ŋunde yero o wimbí moré qambu ŋu yendémo ŋuno kama taró, dokoro, ene kama iŋondutuwoyaŋgurí.